கேரளாவில் கர்ப்பிணி யானை கொல்லப்பட்ட சம்பவம் நாடு முழுவதும் பெரும் பரபரப்பை ஏற்படுத்தியுள்ள நிலையில், பிரபல இந்திய தொழிலதிபர் ரத்தன் டாடா இதற்கு கடும் கண்டனம் தெரிவித்துள்ளார்.
கடந்த மே 27ஆம் தேதி அன்று சைலண்ட் வேலி வனப்பகுதியில் உயிரிழந்த இந்த யானைக்கு அன்னாசிப் பழத்தில் வெடி மருந்துகள் வைத்து உணவளிக்கப்பட்டதாகக் கூறப்படுகிறது.
தொடர்ந்து கர்ப்பிணி யானை அப்பழத்தை உண்ட போது வெடிமருந்து வெடித்ததில், அதன் வாய்ப் பகுதியில் பலத்த காயம் ஏற்பட்டுள்ளது. காயத்தினால் ஏற்பட்ட கடும் வலியுடன் வெள்ளாறு நதியில் இறங்கிய யானையை கும்கி யானையைக் கொண்டு மீட்கப் போராடியும் அது அனுமதிக்கவில்லை.
தொடர்ந்து ஆற்றிலேயே நீண்ட நேரம் நின்ற அந்த யானை, மே 27ஆம் தேதி பரிதாபமாக உயிரிழந்தது. இச்செய்தியை கேரள வனத்துறை அலுவலர் மோகன் கிருஷ்ணன் தனது ஃபேஸ்புக் பக்கத்தில் பகிர்ந்ததை அடுத்து, சமூக வலைதளங்களில் பல்வேறு தரப்பினரும் கடும் எதிர்ப்புகளையும் கணடனங்களையும் தெரிவித்து வருகின்றனர்.