கடத்தப்பட்ட ஆறு குழந்தைகளை மீட்ட காவல் துறையினர்!

லக்னோ: ரயில் மூலம் கடத்தப்பட்ட ஆறு குழந்தைகளை ரயில்வே காவல் துறையினர் உதவியுடன் பச்பன் பச்சாவ் அந்தோலன் அமைப்பினர் பாதுகாப்பாக மீட்டனர்.

உத்தரப் பிரதேசம் மாநிலத்தில் குழந்தைகள் கடத்தப்படுவதாக பச்பன் பச்சாவ் அந்தோலன் அமைப்பினருக்கு ரகசிய தகவல் கிடைத்தது. இதையடுத்து அவத்-அசாம் எக்ஸ்பிரஸ் ரயிலில் கடத்தப்பட்ட குழந்தைகளை பச்பன் பச்சாவ் அந்தோலன் அமைப்பினர் மீட்டனர்.

மீட்கப்பட்ட குழந்தைகள் ரயில்வே காவல் துறையினரிடம் ஒப்படைக்கப்பட்டனர்.

இது குறித்து பச்பன் பச்சாவ் அந்தோலன் அமைப்பைச் சேர்ந்த அர்ஷத் மெஹந்தி கூறுகையில், "அவத்-அசாம் எக்ஸ்பிரஸில் குழந்தை தொழிலாளியாகப் பயன்படுத்த சுமார் 10 முதல் 12 குழந்தைகள் டெல்லிக்கு அழைத்துவரப்படுவதாக நேற்று எங்களுக்குத் தகவல் கிடைத்தது.

அதைத்தொடர்ந்து அவத்-அசாம் ரயிலில் அழைத்துவரப்பட்ட ஆறு குழந்தைகளை எங்கள் குழுவினர் மீட்டனர். தற்போது மீட்கப்பட்டுள்ள குழந்தைகள் 9 முதல் 14 வயதுடையவர்கள், அவர்கள் பிகார், மேற்கு வங்காளம் ஆகிய மாநிலங்களிலிருந்து டெல்லிக்கு அழைத்துவரப்பட்டனர்" என்றார்.

தற்போது மீட்கப்பட்டுள்ள குழந்தைகளுக்குத் தேவையான மருத்துவ சோதனைகள் மேற்கொள்ளப்படும், அதைத்தொடர்ந்து அவர்கள் குழந்தைகள் நலக்குழுவினர் முன் ஆஜர்படுத்தப்படவுள்ளனர்.

இதையும் படிங்க:சுரேஷ் ரெய்னா உறவினர் கொலை: அப்டேட்டை உறுதிசெய்த பஞ்சாப் முதலமைச்சர்