கர்நாடகா; அயோத்தி ராமர் கோயில் நிதி திரட்டும் பணியில் 5 லட்சம் தொண்டர்கள்!

அயோத்தி ராமர் கோயில் நிதி திரட்டும் பணியில், கர்நாடகா மாநிலத்தில் 5 லட்சம் தொண்டர்கள் ஈடுபடுத்தப்படுவார்கள் என விஷ்வ இந்து பரிஷத் தெரிவித்துள்ளது.

பெங்களூரு: உத்தரப் பிரதேசம் அயோத்தி ராமர் கோயிலுக்கு நிதி திரட்டும் பணியில் விஷ்வ இந்து பரிஷத் அமைப்பை சேர்ந்த 5 லட்சம் தொண்டர்கள் கர்நாடகத்தில் ஈடுபடுவார்கள் என அமைப்பின் சர்வதேச செயல் தலைவர் அலோக் குமார் தெரிவித்தார்.

விஷ்வ இந்து பரிஷத் (விஹெச்பி) சர்வதேச செயல் தலைவர் அலோக் குமார் இன்று பெங்களூருவில் செய்தியாளர்களை சந்தித்தார். அப்போது அவர் கூறுகையில், “அயோத்தி ராமர் கோயில் கட்டுமானப் பணிக்கு நிதி திரட்டும் வகையில் நாங்கள் ஒரு குழுவை அமைக்க உள்ளோம்.

அந்தக் குழுவில் 5 லட்சம் தன்னார்வலர்கள் இருப்பார்கள். அவர்கள் மாநிலத்தில் 27 ஆயிரத்து 500 கிராமங்களுக்கு செல்வார்கள். அங்கு ஒரு கோடி பக்தர்களை சந்தித்து நிதி திரட்டுவார்கள்.

இந்த நிதி சேகரிப்பு இயக்கத்தை மேற்பார்வையிட மாநிலத்தில் ஸ்ரீ ராம் மந்திரி நிதி சமர்பன் அபியான் சமிதி என்ற குழு அமைக்கப்பட்டுள்ளது. பக்தர்களிடம் ரூ.10, ரூ.100, ரூ.1000 என டோக்கன் வழங்கப்பட்டு நிதி சேகரிக்கப்படும்.

ரூ.2,000 க்கும் மேல் நன்கொடை அளிப்பவர்களுக்கு ரசீது அளிக்கப்படும். இந்த நன்கொடைகளுக்கு வருமான வரிச் சட்டத்தின் 80ஜி கீழ் விலக்கு அளிக்கப்படும்.

ஒவ்வொரு குழுவும் ஐந்து நபர்களைக் கொண்டிருக்கும், அவர்கள் பணத்தை டெபாசிட்டரிடம் ஒப்படைப்பார்கள், அவர்கள் முழு பணத்தையும் 48 மணி நேரத்திற்குள் நியமிக்கப்பட்ட வங்கி கணக்குகளில் டெபாசிட் செய்வார்கள்” என்றார்.

இந்த நிதி ஸ்டேட் பாங்க் ஆப் இந்தியா, பாங்க் ஆப் பரோடா மற்றும் பஞ்சாப் நேஷனல் வங்கி ஆகிய மூன்று வங்கிகளில் ஏதேனும் ஒன்றில் சேகரிக்கப்பட உள்ளது.

அயோத்தி ராமர் கோயிலுக்கு ஆகஸ்ட் 5ஆம் தேதி, பிரதமர் நரேந்திர மோடி அடிக்கல் நாட்டினார். முன்னதாக அயோத்தி நில சச்சரவு வழக்கில், நவம்பர் 9, 2019 அன்று உச்ச நீதிமன்றம் தீர்ப்பு அளித்தது.

அதன்படி சர்ச்சைக்குரிய நிலத்தில் ராமர் கோயில் கட்டிக்கொள்ள உத்தரவிட்டது. அதேபோல், மேலும் மசூதி கட்டிக்கொள்ள 5 ஏக்கர் நிலம் அளிக்க உத்தரவிட்டது.

இதையும் படிங்க: 'ஜம்மு காஷ்மீரில் அடிமட்டத்திலிருந்து தலைவர்கள் உருவாகிறார்கள்'- அரசியல் நிபுணர் கருத்து!