கிராமப்புறங்களில் கட்டுமானப் பணிகள் மேற்கொள்வதற்கு ஊரடங்கு விலக்கு!

டெல்லி: கிராமப்புறங்களில் மேற்கொள்ளப்படும் கட்டுமானப் பணிகள், குடிநீர் விநியோகம் உள்ளிட்டவற்றை மேற்கொள்ள மத்திய அரசு அனுமதியளித்துள்ளது.

ஊரடங்கு உத்தரவு நடைமுறைகளிலிருந்து சில பணிகளுக்கு விலக்கு அளித்து மத்திய அரசு அறிவித்துள்ளது. இதுதொடர்பாக அனைத்து மாநில முதலமைச்சர்கள் மற்றும் யூனியன் பிரதேசங்களின் முதலமைச்சர்களுக்கு மத்திய உள்துறை செயலர் அஜய் பல்லா அறிக்கை அனுப்பியுள்ளார்.

அதில், கிராமப்புறங்களில் குடிநீர் விநியோகத்திற்கான குழாய் பதிப்பு, மின் விநியோகத்திற்கான மின்கம்பிகளை நடுவது, தொலைத் தொடர்புக்கான குழிகளை தோண்டுவது போன்ற பணிகளுக்கும், சிறிய வனங்களில் மேற்கொள்ளப்படும் பணிகளுக்கும் ஊரடங்கு உத்தரவில் இருந்து விலக்கு அளிக்கப்படுவதாக தெரிவிக்கப்பட்டுள்ளது.

பழங்குடியின மக்கள் வசிக்கும் காடுகளில் வனம் சார்ந்த சிறு விளைச்சல்களை அறுவடை செய்ய அனுமதியளித்துள்ள மத்திய அரசு, அதனை சந்தைக்கு எடுத்துச் சென்று விற்பனை செய்யவும் அனுமதியளித்துள்ளது. மேலும் ஊரடங்கின்போது, மூங்கில், தேங்காய் போன்ற விளைச்சல்களை அறுவடை செய்ய, பதப்படுத்த, விற்பனை செய்ய அனுமதி வழங்கப்பட்டுள்ளது.

இதையும் படிங்க:நோயின் தாக்கம் 27 மாவட்டங்களில் குறைந்துள்ளது - சுகாதாரத்துறை அமைச்சகம்