மாநிலங்களவை உறுப்பினராவாரா சீதாராம் யெச்சூரி?

கொல்கத்தா: கட்சி விதிகளை தளர்த்தி மாநிலங்களவைக்கு சீதாராம் யெச்சூரியை இடதுசாரி கட்சிகள் அனுப்புமா எனக் கேள்வி எழுந்துள்ளது.

மேற்குவங்கத்தில் உள்ள ஐந்து மாநிலங்களவை இடங்களுக்கான தேர்தல் பிப்ரவரி மாதம் நடைபெறவுள்ளது. இதில், நான்கு இடங்கள் திரிணாமுல் காங்கிரஸ் கட்சிக்கு செல்லவுள்ளது. மீதமுள்ள ஒரு இடத்திற்கு மார்க்சிஸ்ட் கம்யூனிஸ்ட் கட்சியின் பொதுச்செயலாளர் சீதாராம் யெச்சூரியை களமிறக்கலாமா என அக்கட்சி ஆலோசித்துவருவதாகக் கூறப்படுகிறது.

ஆனால், இடதுசாரி கட்சிகளுக்கு போதிய சட்டப்பேரவை உறுப்பினர்களின் ஆதரவு இல்லாத காரணத்தால் காங்கிரஸ் கட்சியின் ஆதரவைக் கோரவுள்ளதாகக் கூறப்படுகிறது.

மேலும், சீதாராம் யெச்சூரியை வேட்பாளராகக் களமிறக்கினால், காங்கிரஸ் கட்சி உறுதியாக ஆதரவு தெரிவிக்கும் என மார்க்சிஸ்ட் கம்யூனிஸ்ட் கட்சியின் மூத்தத் தலைவர் ஒருவர் தெரிவித்துள்ளார். ஒருவரை தொடர்ந்து இருமுறைக்கு மேல் மாநிலங்களவைக்கு தேர்ந்தெடுக்கக் கூடாது என்பது மார்க்சிஸ்ட் கம்யூனிஸ்ட் கட்சியின் விதியாக உள்ளது.

ஆனால், நாட்டில் அசாதாரண நிலை தொடர்வதால் கட்சி விதிகளில் மாற்றம் கொண்டுவரலாம். நாடாளுமன்றத்தில் மோடியின் திட்டங்களை எதிர்கொள்வதற்கு சீதாராம் யெச்சூரி போல் ஒரு வலுவான குரல் தேவை எனவும் மார்க்சிஸ்ட் கம்யூனிஸ்ட் கட்சியின் மூத்தத் தலைவர் தெரிவித்துள்ளார்.

1964ஆம் ஆண்டு கட்சி தொடங்கப்பட்ட பிறகு மேற்குவங்கத்திலிருந்து மார்க்சிஸ்ட் கம்யூனிஸ்ட் கட்சியைச் சேர்ந்த ஒருவர்கூட நாடாளுமன்ற உறுப்பினராக இல்லாதது இதுவே முதல்முறை.

இதையும் படிங்க: மூன்று தலைநகரங்களைக் கோரும் தீர்மானம் - கூடும் ஆந்திர சட்டப்பேரவை!