பயணிகள் விமானத்தை சரக்கு விமானமாக மாற்றும் ஸ்பைஸ்ஜெட்

டெல்லி: சரக்கு விமானங்களின் தேவை அதிகரித்துள்ளதால் மூன்று பயணிகள் விமானங்களைச் சரக்கு விமானங்களாக மாற்றியுள்ளதாக ஸ்பைஸ்ஜெட் நிறுவனம் அறிவித்துள்ளது.

கோவிட்-19 பரவலைக் கட்டுப்படுத்த நாடு முழுவதும் மார்ச் 25ஆம் தேதி முதல் ஊரடங்கு அறிவிக்கப்பட்டது. ஊரடங்கு காரணமாகப் பயணிகள் விமானச் சேவை மார்ச் இறுதி வாரத்தில் நிறுத்திக் வைக்கப்பட்டது. வெளிநாட்டில் சிக்கியிருக்கும் இந்தியர்களை மீட்க இயக்கப்படும் சிறப்பு விமானங்களுக்கும் சரக்கு விமானங்களுக்கும் மட்டுமே அனுமதி அளிக்கப்பட்டது.

ஊரடங்கில் தளர்வுகள் அறிவிக்கப்பட்டதைத் தொடர்ந்து, திங்கள்கிழமை முதல் உள்நாட்டு விமானச் சேவை மீண்டும் தொடங்கியது. இருப்பினும், நாடு முழுவதும் மருத்துவ கருவிகள் உள்ளிட்ட பலவகையான பொருள்களை பாதுகாப்பாகவும் விரைவாகவும் எடுத்துச் செல்ல விமானப் போக்குவரத்தே பயன்படுத்தப்படுகிறது. இதற்காக இந்திய மருத்துவ ஆராய்ச்சி கழகம்கூட சமீபத்தில் இந்திய விமான நிறுவனங்களை பாராட்டியிருந்தது.

இந்நிலையில், தனது மூன்று Bombardier Q400 ரக பயணிகள் விமானத்தைச் சரக்கு விமானங்களாக மாற்றியுள்ளதாக ஸ்பைஸ்ஜெட் நிறுவனம் அறிவித்துள்ளது. இது குறித்து அந்நிறுவனத்தின் நிர்வாக இயக்குநர் அஜய் சிங் கூறுகையில், "எங்கள் சரக்கு விமான சேவை சிறப்பாக உள்ளது. தற்போதுள்ள தேவையைக் கருத்தில் கொண்டு மூன்று பழைய Bombardier Q400 ரக பயணிகள் விமானத்தைச் சரக்கு விமானங்களாக மாற்றியுள்ளோம்.

இந்த விமானங்கள் மூலம் 8.5 டன் சரக்குகளை எடுத்துச் செல்ல முடியும். சிறு நகரங்களுக்கும் ஜம்மு காஷ்மீர் போன்ற மலைப் பிரதேசங்களுக்கும் சரக்குகளை எடுத்துச் செல்ல இவை சிறப்பானதாக இருக்கும்.

தற்போது நாங்கள் சர்வதேச அளவில் 25 இடங்களில் சரக்கு விமானச் சேவையை வழங்கிவருகிறோம். இதற்கு வரும் காலத்தில் தேவை அதிகரிக்கும் என்று நாங்கள் கருதுகிறோம். எனவே சரக்கு விமானச் சேவையில் தொடர்ந்து நாங்கள் ஈடுபடுவோம்" என்றார்.

நாடு முழுவதும் ஊரடங்கு அறிவிக்கப்பட்டதிலிருந்து ஸ்பைஸ்ஜெட் நிறுவனம், 12 ஆயிரம் டன் மருத்துவ கருவிகளை நாடு முழுவதும் எடுத்துச் சென்றுள்ளது. தற்போது மூன்று பயணிகள் விமானங்கள் சரக்கு விமானங்களாக மாற்றப்பட்டிருப்பதன் மூலம், ஸ்பைஸ்ஜெட் நிறுவனத்திடம் உள்ள சரக்கு விமானங்களின் எண்ணிக்கை எட்டாக உயர்ந்துள்ளது.

இதையும் படிங்க: விமான டிக்கெட்டுகளை ரத்து செய்தால் பணம் வரும்... ஆனால்!