வழக்கறிஞர்களின் குடும்பம் பட்டினி சாவை சந்திக்கும் - பிரதமருக்கு கடிதம்

டெல்லி: கரோனா வைரஸ் நோயால் நாடு முடங்கியதைத் தொடர்ந்து, இளம் மற்றும் நலிந்த வழக்கறிஞர்களுக்கு உதவித் தொகை அளிக்க வேண்டும் என இந்திய வழக்கறிஞர்கள் சங்கம் சார்பில் பிரதமர் மோடிக்கு கடிதம் எழுதப்பட்டுள்ளது.

நாட்டில் கரோனா வைரஸ் நோயால் பாதிக்கப்பட்டோரின் எண்ணிக்கை தொடர்ந்து அதிகரித்துவருகிறது. இதையடுத்து, பல மாநிலங்கள் முடக்கப்பட்டுள்ளது. எனவே இளம் மற்றும் நலிந்த வழக்கறிஞர்களுக்கு உதவித் தொகை அளிக்க வேண்டும் என பிரதமர் மோடி, மாநில முதலமைச்சர்கள் ஆகியோருக்கு இந்திய வழக்கறிஞர்கள் சங்கம் கடிதம் எழுதியுள்ளது.

மாநில வழக்கறிஞர்கள் சங்கத்தில் பதிவு செய்துள்ள இளம் வழக்கறிஞர்களுக்கு மாதம் 20,000 ரூபாய் உதவித் தொகை அளிக்க வேண்டும் என அக்கடிதத்தில் குறிப்பிடப்பட்டுள்ளது. அதேபோல் இதற்காக பிரத்யேக உதவி எண்கள், வாட்ஸ்அப் எண்கள் அறிவிக்கப்பட வேண்டும் என கோரிக்கை விடுக்கப்பட்டுள்ளது.

இதுகுறித்து கடிதத்தில், "வழக்கறிஞர்கள் மற்றும் அவர்களின் குடும்பத்தாரை வாழ வைக்க உணவு, சுகாதார மற்றும் மருத்துவ தேவைகள் ஆகியவற்றை பூர்த்தி செய்ய வேண்டும். பல வழக்கறிஞர்களின் குடும்பம் பட்டினி சாவை சந்திக்கும் நிலையில் உள்ளது" என குறிப்பிடப்பட்டுள்ளது.

இதையும் படிங்க: ‘அடுத்த 21 நாள்களுக்கு நாடு முடக்கம்’ - பிரதமர் மோடி