Adi purush trailer : ஆதி புருஷ் டிரெய்லர் ரிலீஸ் - திருட்டுத்தனமாக வெளியானதா ஆதிபுருஷ் டிரெய்லர்?

நடிகர் பிரபாஸ், கீர்த்தி சனோன் நடிப்பில் தயாராகி உள்ள ஆதிபுருஷ் திரைப்படத்தின் டிரெய்லர் வெளியாகி உள்ளது.

ஐதராபாத் :நடிகர் பிரபாஸ் நடிப்பில் தயாராகி உள்ள ஆதிபுருஷ் திரைப்படத்தின் டிரெய்லர் வெளியாகி உள்ளது. பிரபல பாலிவுட் நடிகர் ஓம் ராவத் இந்தப் படத்தை இயக்கி உள்ளார். இதிகாச கதைகளில் ஒன்றான ராமாயணத்தை மையமாகக் கொண்டு உருவாகி உள்ள இந்தப் படத்தில் நடிகர் பிரபாஸ் ராமனாக நடித்துள்ளார்.

அவருக்கு ஜோடியாக சீதை கதாபாத்திரத்தில் பாலிவுட் நடிகை கீர்த்தி சனோன் நடித்து உள்ளார். மேலும் இராவணனாக பாலிவுட் நடிகர் சயிப் அலிகானும், லட்சுமணனாக பாலிவுட் நடிகர் சன்னி சிங் உள்ளிட்டோர் முக்கிய கதாபாத்திரங்களில் நடித்து உள்ளனர். ஆதி புருஷ் திரைப்படம் தமிழ், தெலுங்கு, இந்தி, கன்னடம், மலையாளம் ஆகிய மொழிகளில் தயாராகி உள்ளது.

கடந்த ஆண்டு இந்தப் படத்தின் டீசர் வெளியான நிலையில், கடும் விமர்சனங்களை எதிர்கொண்டது. அனிமேஷன் படமான ஆதிபுருஷ் படத்தில் கிராஃபிக்ஸ் காட்சிகள் சுமாராக இருப்பதாகவும், அனிமேஷன் காட்சிகள் மிக மோசமாக இருப்பதாகவும் கூறி ரசிகர்கள் விமர்சித்தனர். இதனால், இந்தப் படத்தை மீண்டும் மெருகேற்றும் பணியில் படக்குழு ஈடுபடத் தொடங்கியது.

அதனால், ஆதிபுருஷ் படத்தின் ரிலீஸ் தேதி தள்ளிப்போனது. இதனிடையே, கடந்த ராம நவமி தினத்தன்று ஆதி புருஷ் திரைப்படத்தின் போஸ்டரை படக்குழு வெளியிட்டது. சமூக வலைதளங்களில் போஸ்டர் வைரலான நிலையில் படத்தின் மீதான எதிர்பார்ப்பு அதிகரிக்கத் தொடங்கியது. இந்நிலையில் பல கட்ட கிராஃபிக்ஸ் மற்றும் அனிமேஷன் பணிகள் நிறைவுபெற்று படத்தின் டிரெய்லர் இன்று (மே. 9) வெளியாகி உள்ளது.

டீஸரில் செய்த சொதப்பல்கள் டிரெய்லரில் சரி செய்யப்பட்டு வி.எஃப்.எக்ஸ். மற்றும் கிராஃபிக்ஸ் மேம்படுத்தப்பட்டு உள்ளதால், லைவ் ஆக்சன் படத்தைப் பார்ப்பதுபோல், இருப்பதாக ரசிகர்கள் கருத்து தெரிவித்து வருகின்றனர். ஏறத்தாழ 700 கோடி ரூபாய் பட்ஜெட்டில் படத்தைப் படக்குழு நிறைவு செய்துள்ளதாக தெரிவிக்கப்பட்டு உள்ளது.

முன்னதாக படத்தின் டிரெய்லர் ரிலீஸ் நேரத்திற்கு முன்பாகவே, திருட்டுத்தனமாக வெளியிடப்பட்டதாக தகவல் வெளியாகி உள்ளது. ஆதி புருஷ் டிரெய்லரை உலகமெங்கும் 70 நாடுகளில் ரிலீஸ் செய்ய படக் குழு திட்டமிட்டிருந்ததாகவும், ஒரே நேரத்தில் திரையரங்குகள் மற்றும் யூடியூப்பில் ரிலீஸ் செய்ய படக்குழு ஏற்பாடு செய்து இருந்ததாகவும் கூறப்படுகிறது.

3டி தொழில்நுட்பத்தில் ஆதி புருஷ் டிரெய்லரை ரிலீஸ் செய்ய படக்குழு திட்டமிட்டு இருந்த நிலையில், படக்குழு ரிலீஸ் செய்வதற்கு முன்பே திருட்டுத்தனமாக இணையத்தில் வெளியானதாக கூறப்படுகிறது. இருப்பினும் படத்திற்கு ஆதரவு கருத்துகள் வருவதால், படக்குழு சற்று நிம்மதி அடைந்து இருப்பதாக சொல்லப்படுகிறது. திருட்டுத்தனமாக இணையத்தில் வெளியான வீடியோக்களை நீக்கும் நடவடிக்கையில் படக்குழு ஈடுபட்டு உள்ளதாகவும் கூறப்படுகிறது.

இதையும் படிங்க :அமைச்சர் துரைமுருகன் முன்பு அடித்துக்கொண்ட திமுகவினர்.. நெல்லையில் பரபரப்பு!