கொங்கு மண்டலத்தில் சரிந்த அதிமுக கோட்டை.. இதுதான் காரணமா? - AIADMK Status in Kongu Belt

AIADMK status in Kongu belt: நடந்து முடிந்த நாடாளுமன்றத் தேர்தல் முடிவுகளின்படி அதிமுகவின் பலமான கொங்கு மண்டலத்திலேயே வாக்குகள் சரிந்திருப்பது தெரிய வருகிறது. இதன் காரணமாக கொங்கு மண்டலத்தை மீண்டும் தமது கோட்டையாக மாற்ற அதிமுக முற்பட வேண்டிய கட்டாயத்தில் உள்ளது.

சென்னை: நடந்து முடிந்த நாடாளுமன்றத் தேர்தலில் தமிழ்நாடு மற்றும் புதுச்சேரி உள்ளிட்ட 40 தொகுதிகளில் திமுக கூட்டணி வெற்றி பெற்றுள்ளது. கோவை உள்ளிட்ட கொங்கு மாவட்டங்களில் அதிமுகவே இதுவரை அதிக வெற்றி பெற்று வந்தது.

கடந்த 2006 தேர்தலில் ஆட்சி அமைத்தபோது கூட, கோவை மாவட்டத்தில் ஒரே இடத்தில் மட்டுமே திமுக வெற்றி பெற்றது. ஜெயலலிதா இறப்பிற்கு பின்னர் பாஜக கூட்டணியோடு 2021 தேர்தலில் அதிமுக போட்டியிட்ட போது, கோவை மாவட்டத்தில் திமுகவால் ஒரு தொகுதியில் கூட வெற்றி பெற முடியவில்லை.

இதனால் கொங்கு பகுதி அதிமுவின் கோட்டை என்றே கருதப்பட்டு வந்தது. ஆனால், கடந்த நகர்புற உள்ளாட்சித் தேர்தலில் அதிமுக-பாஜக கட்சிகள் தனித்து போட்டியிட்டன. இதில் திமுக மிகப்பெரிய வெற்றி பெற்றது. இதையடுத்து, லோக்சபா தேர்தலுக்கு முன்பு சிறுபான்மையினரின் வாக்குகளை குறிவைத்து அதிமுக, பாஜக கூட்டணியிலிருந்து வெளியேறியது.

அண்ணாமலை தலைமையிலான பாஜக, பாமக, அமமுக போன்ற கட்சிகளுடன் கூட்டணி வைத்திருந்தாலும், அவற்றிற்கு கொங்கு பகுதியில் ஓட்டு வங்கி இல்லாததால் தனது தனிப்பட்ட ஓட்டை நம்பியே களம் இறங்கியது. இதில் பாஜக மாநிலத் தலைவர் அண்ணாமலை கோவையில் போட்டியிட்டது அக்கட்சியினரிடையே உற்சாகத்தை ஏற்படுத்தியது.

அண்ணாமலை வெற்றிக்காக வெளியில் இருந்தும் ஆட்கள் வந்து தேர்தல் பணி செய்தனர். இது தவிர, பொள்ளாச்சி தொகுதியில் வசந்தராஜன், திருப்பூரில் ஏ.பி.முருகானந்தம், நீலகிரியில் மத்திய இணை அமைச்சர் எல்.முருகன் ஆகியோர் களம் இறங்கினர். இது பாஜவிற்கு நல்ல பலனைக் கொடுத்துள்ளது.

அதன் எதிரொலியாக கோவை, நீலகிரி மாவட்டங்களில் பாஜக அதிமுகவை பின்னுக்குத் தள்ளி இரண்டாம் இடத்தைப் பிடித்துள்ளது. பொள்ளாச்சி தொகுதியில் ஏறக்குறைய அதிமுகவிற்கு இணையான வாக்குகளை பாஜக வேட்பாளர்கள் பெற்றுள்ளனர். திருப்பூர் தொகுதியிலும் கணிசமான வாக்குகளை பாஜக பெற்றுள்ளது. இதன் காரணமாக, கொங்கு பகுதியில் அதிமுக தனது செல்வாக்கை இழந்திருப்பது உறுதியாகியுள்ளது.

அதற்கு காரணம், அதிமுகவில் சரியான ஒருங்கிணைப்பு இல்லாதது, அதிமுக தலைமை வெற்றி பெற்றால் யாரை பிரதமர் வேட்பாளராக அறிவிப்பார்கள் என்ற கேள்வியும், ஒரு வேளை அதிமுக கூட்டணி வெற்றி பெற்றவுடன், மீண்டும் பாஜகவிற்கு ஆதரவு அளிக்கக்கூடும் என சிறுபான்மை மக்கள் சிந்தித்ததால் அவர்களின் வாக்குகள் அதிமுகவிற்கு வரவில்லை, அதுபோல் அருந்ததியின மக்களின் வாக்குகள் அதிமுகவிற்கு அப்படியே வந்து சேரும், கவுண்டர் சமுதாய வாக்குகள் அதிமுகவிற்கு தான் என்ற தவறான கணக்கு, அதிமுகவின் சரிவிற்கு காரணம் என கூறப்படுகிறது.

அதுபோல், கொங்கு மண்டல தளபதி என்று அதிமுகவினரால் அழைக்கப்படும் முன்னாள் அமைச்சர் எஸ்.பி.வேலுமணி, பொள்ளாச்சி தொகுதியில் மட்டும் சில பகுதிகளில் தேர்தல் பிரச்சாரம் செய்துவிட்டு அமைதியாக இருந்ததால் வாக்கு சரிவும், சமூக வலைத்தளங்களில் பாஜகவினர் அண்ணாமலை குறித்த வீடியோக்களை குக்கிராமங்கள் வரை கொண்டு சென்றது பாஜகவிற்கு மிகவும் சாதகமானதால், அவர்களின் வாக்கு சதவீதம் அதிகரித்து அதிமுகவின் வாக்கு சதவீதம் குறைய காரணமாக பார்க்கப்படுகிறது.

கொங்கு மண்டல தொகுதிகளில் திமுக வேட்பாளர்களுக்கும், இரண்டாம் இடம் பிடித்துள்ள வேட்பாளருக்கும் உள்ள ஓட்டு வித்தியாசம் மூன்றாம் இடம் பிடித்துள்ள கட்சியைவிட குறைவு என்பது குறிப்பிடத்தக்கது. ஈரோடு தொகுதியில் மட்டும் அசோக்குமார் என்ற வலுவான வேட்பாளரை நிறுத்தியதால், வெற்றி பெற முடியாவிட்டாலும் தனது ஓட்டு வங்கியை அதிமுக தக்க வைத்துள்ளது குறிப்பிடத்தக்கது.

இந்த தொகுதிகளில் பாஜக வேட்பாளர்கள் கணிசமான ஓட்டு பெற்றுள்ளது திமுகவினர் மத்தியிலும் சற்று அதிர்ச்சியை ஏற்படுத்தியுள்ளது. நாமக்கல் தொகுதியை பொறுத்தவரை, கவுண்டர் சமுதாய வாக்குகள் வெற்றியை நிர்ணயிக்கும் சக்தியாக உள்ளது.

அதிமுக சார்பில் களம் இறக்கப்பட்ட தமிழ்மணி, சரியாக தேர்தல் பிரச்சாரம் செய்யாதது உடல்நலக்குறைவு போன்ற காரணங்களால் நகர் பகுதியில் பிரச்சாரம் செய்யவில்லை, கிராமப்புறங்களில் மாலை நேரங்களில் மட்டுமே பிரச்சாரம் செய்ததால் வாக்கு குறைந்து 29,112 வாக்கு வித்தியாசத்தில் தோல்வி அடைந்தார்.

மேலும், கட்சியில் புதுமுகம், மக்களிடையே பரிச்சம் இல்லாதது போன்ற காரணங்களும், முன்னாள் அமைச்சர் தங்கமணி பரிந்துரைத்த நபர் என்பதால் வேட்பாளராக தமிழ்மணி அறிவிக்கப்பட்டது குறிப்பிடத்தக்கது. அதிமுகவிற்கு முதல் முறையாக சட்டமன்ற உறுப்பினரை கோவை தான் தந்தது.

அரங்கநாயகம் என்பவர் 1974ஆம் ஆண்டு நடைபெற்ற தேர்தலில் அதிமுக சார்பில் போட்டியிட்டு வெற்றி பெற்றார். அதன் பின்னர், அடுத்தடுத்து வந்த தேர்தல்களில் அதிமுக கொங்கு மண்டலத்தில் தனது வெற்றியை உறுதி செய்ததுடன், கடந்த காலங்களில் கொங்கு மண்டலத்தில் இருந்து ஏராளமான அமைச்சர்களையும் தந்துள்ளது குறிப்பிடத்தக்கது.

இதையும் படிங்க:தமிழகத்தின் பணக்கார அதிமுக வேட்பாளர் ஆற்றல் அசோக்குமார் ஈரோட்டில் தோற்றது எப்படி?