“நாமக்கல் சவர்மா தான் துருப்பு..” - சிக்கன் ரைஸ் விவகாரத்தில் வெளிவந்த பேரனின் பக்கா ப்ளான்! - namakkal chicken rice issue

Namakkal Chicken Rice Issue: காதல் விவகாரத்தை கண்டித்ததால் பெற்ற தாய், சகோதரர், தாத்தா எனக்கூட பாராமல் கல்லூரி மாணவன் ஒருவர் குடும்பத்தையே கொலை செய்ய முயற்சித்து சிக்கன் ரைஸில் விஷம் கலந்து கொடுத்தது நாமக்கல்லில் பரபரப்பை ஏற்படுத்தியுள்ளது.

நாமக்கல்:நாமக்கல் பேருந்து நிலையம் எதிரில் ஓட்டல் வைத்து நடத்தி வருபவர் ஜீவானந்தம் (32). இவரது கடைக்கு கடந்த ஏப்ரல் 30ஆம் தேதி நாமக்கல் அருகே உள்ள கொசவம்பட்டியைச் சேர்ந்த தனியார் இன்ஜினியரிங் கல்லூரி மாணவர் பகவதி (20) சிக்கன் பிரியாணி சாப்பிட்டு உள்ளார்.

தொடர்ந்து, 7 சிக்கன் ரைஸ் பொட்டலம் வாங்கிக் கொண்டு, வீட்டில் உள்ள தனது தாயார் நதியா (40), இதனைத்தொடர்ந்து தேவராயபுரத்தில் வசித்து வரும் தாத்தா சண்முகநாதன் (67) வீட்டிற்குச் சென்று அங்கு தாத்தா மற்றும் குடும்பத்தினருக்கு கொடுத்து உள்ளார். இதற்கிடையே சிக்கன் ரைஸ் சாப்பிட்ட நதியா, சண்முகநாதன் ஆகியோருக்கு மட்டும் உடல் நலக்குறைவு ஏற்பட்டதால், மீதமுள்ளவர்கள் சிக்கன ரைஸ் சாப்பிடவில்லை.

இதையடுத்து உயிருக்கு ஆபத்தான நிலையில் இருந்த நதியா, சண்முகநாதன் ஆகிய இருவரையும் நாமக்கல் அரசு மருத்துவக் கல்லூரி மருத்துவமனையில் அவசர சிகிச்சைப் பிரிவில் அனுமதிக்கப்பட்டு, செயற்கை சுவாசம் உதவியுடன் சிகிச்சை பெற்று வந்தனர். முன்னதாக, சிகிச்சைக்கு வந்த இருவரும் வாயில் நுரை தள்ளியபடி வந்ததாக கூறப்படுகிறது.

எனவே, அவர்களுக்கு உணவு ஒவ்வாமையால் பிரச்சினை ஏற்பட்டு இருக்க வாய்ப்பு குறைவு எனவும், சாப்பாட்டில் விஷம் கலந்து இருக்க வாய்ப்பு இருக்கலாம் எனவும் மருத்துவமனை டாக்டர் குழுவினர் காவல்துறையினருக்கு தெரிவித்துள்ளனர். இதேபோல், இந்த ஓட்டலில் கடந்த 30ஆம் தேதி சுமார் 100 பேர் உணவருந்தியதாக கூறப்படுகிறது. ஆனால், அவர்களில் 2 பேருக்கு மட்டும் உடல்நிலை பாதிக்கப்பட்டதால், உணவு பாதுகாப்புத்துறையினருக்கும் சந்தேகம் எழுந்துள்ளது.

அதாவது உணவில் எவ்வித குறைபாடும் இருக்க வாய்ப்பு இல்லை என தெரிய வந்துள்ளது. இதற்கிடையே நேற்று முன்தினம் (புதன்கிழமை) ஓட்டலில் ஆய்வு மேற்கொண்ட ஆட்சியர் உமா, சம்பந்தப்பட்ட ஓட்டலுக்கு சீல் வைக்க உத்தரவிட்டார். இதையடுத்து, ஓட்டலுக்கு உணவு பாதுகாப்புத் துறையினர் சீல் வைத்தனர். மேலும், சிக்கன் ரைஸ் விவகாரம் தொடர்பாக விசாரணை நடத்த மாவட்ட ஆட்சியர் உமா போலீசாருக்கு உத்தரவிட்டார்.

அவர்களும் சிக்கன் ரைஸ் உணவு மாதிரியை எடுத்து , சேலம் உணவு பகுப்பாய்வு கூடத்துக்கு அனுப்பினர். மேலும், கல்லூரி மாணவர் பகவதி மற்றும் ஓட்டல் உரிமையாளர் ஜீவானந்தம் ஆகியோரிடம் தனித்தனியாக விசாரணை நடத்தினர். இதற்கிடையே உயிருக்கு ஆபத்தான நிலையில் சிகிச்சை பெற்று வந்த கூலித்தொழிலாளி சண்முகநாதன், நேற்று இரவு சிகிச்சை பலனின்றி உயிரிழந்தார்.

விசாரணையில் திருப்பம்:உணவு மாதிரியின் பகுப்பாய்வு முடிவில் உணவில் விஷம் கலந்து இருப்பதும் உறுதியானது. இதனையடுத்து, போலீசாரின் பார்வை கல்லூரி மாணவர் பகவதியிடம் திரும்ப, பகவதியைப் பிடித்து போலீசார் தீவிர விசாரணை மேற்கொண்டனர். அதில் பல திடுக்கிடும் தகவல்கள் வெளியாகியுள்ளது. இந்த சம்பவம் தொடர்பாக பகவதி போலீசாருக்கு அளித்த வாக்குமூலத்தில், தனது கல்லூரியில் உடன் பயிலும் மாணவி ஒருவரை காதலித்ததாகவும், அதுமட்டுமின்றி திருமணமான பெண் ஒருவருடனும் உறவில் இருந்ததாக கூறியுள்ளார்.

மேலும், இந்த விவகாரம் தனது தாய் நதியா மற்றும் குடும்பத்தினருக்கு தெரிய வந்ததால் கண்டித்தனர் எனவும், கல்லூரி முடிந்த பின் மாலையில் வீட்டில் சும்மாக இருக்க வேண்டாம் எனவும், பகுதி நேரமாக இண்டர்நெட் சென்டர் ஒன்றில் வேலைக்குச் செல்ல தாய் நதியா வலியுறுத்தியதாக கூறினார். இதனையடுத்து, நாமக்கல்லில் உள்ள இண்டர்நெட் சென்டரில் பகுதி நேர பணிக்குச் சென்றதாகவும், இருப்பினும் தனது‌ மீது தாய் நதியா மற்றும் குடும்பத்தினர் கடுமையாக நடந்து கொண்டதாக தெரிவித்தார்.

இதனால் அனைவரையும் கொலை செய்ய திட்டம் தீட்டியதாகவும், அப்போது, தான் ஏற்கனவே நாமக்கல்லில் கடந்த 5 மாதங்களுக்கு முன்னர், சிக்கன் சவர்மா சாப்பிட்டு குழந்தை உயிரிழந்ததை ஞாபகம் வந்தது எனக் கூறிய பகவதி, அந்த பாணியில் சென்றால் போலீசாருக்கு தனது மீது சந்தேகம் வராது என எண்ணி, உணவில் நஞ்சு கலக்க திட்டம் தீட்டியுள்ளார். அதற்காக, இணையத்தில் எந்த பூச்சிக்கொல்லி மருந்து வாங்கலாம் எனத் தேடி, கடந்த ஏப்ரல் 27ஆம் தேதி பரமத்தி சாலையில் உள்ள உரக்கடைக்குச் சென்று மருந்தை வாங்கியுள்ளார்.

அதன் பின்னர், கடந்த மாதம் 30ஆம் தேதி இரவு, தான் பணிபுரியும் இண்டர்நெட் சென்டரில் ஒரு மாதம் ஊதியம் வாங்கியதாகவும், அதற்காக வீட்டில் உள்ளவர்களுக்கு டிரீட் வைப்பதாக கூறியுள்ளார் பகவதி. இதற்காக இரவு வீட்டில் யாரும் சமைக்க வேண்டாம் எனக்கூறி, பேருந்து நிலையம் எதிரில் உள்ள உணவகத்திற்குச் சென்று 7 சிக்கன் ரைஸ் பார்சல் வாங்கி, அதில் ஏற்கனவே வாங்கி வைத்திருந்த பூச்சி மருந்தை கலந்துள்ளார்.

அந்த உணவு பொட்டலங்களில் ஒன்றை கொசவம்பட்டியில் வசிக்கும் தாய் நதியாவிற்கு கொடுத்து விட்டு மீதமுள்ளதை தேவராயபுரத்தில் உள்ள தாத்தா சண்முகநாதன், உடன்பிறந்த சகோதரர், சித்தி மற்றும் சித்தியின் இரண்டு மகள்கள் என அனைவருக்கும் வழங்கியுள்ளார். மகன் பொறுப்பாக இருப்பதை நம்பிய தாய் நதியா அந்த சிக்கன் ரைஸ் பாதியை சாப்பிட்டுள்ளார்.

அதில், வித்தியாசம் அறிந்து சந்தேகம் எழுந்ததையடுத்து, உடனடியாக தனது மாமனாரான சண்முகநாதனை சாப்பிட வேண்டாம் எனக்கூற செல்போனில் தொடர்பு கொண்டுள்ளார் நதியா. ஆனால், அதற்கு முன்னதாகவே முதியவர் சண்முகநாதன் அதனை முழுவதும் சாப்பிட, நதியாவின் மற்றொரு மகன் சிறிது மட்டுமே அந்த உணவைச் சாப்பிட அதில் மாற்றம் உள்ளதாக உடனடியாக அந்த உணவை சாப்பிடாமல் விட்டுள்ளார்.

சிறுதி நேரத்தில், சண்முகநாதன் மற்றும் நதியா இருவருக்கும் வாயில் நுரை தள்ளியதால், உடனடியாக அரசு மருத்துவக் கல்லூரி மருத்துவமனைக்கு சிகிச்சைக்காக அனுமதிக்கப்பட்ட நிலையில், முதியவர் சண்முகநாதன் உயிரிழந்தார் என பகவதி வாக்குமூலம் அளித்துள்ளார். முதலில் உணவு ஒவ்வாமை ஏற்பட்டதாகக் கூறி உணவகத்திற்கு சீல் வைக்கப்பட்ட நிலையில், தற்போது சிக்கன் ரைஸ் விவகாரம் கொலை வழக்காக போலீசார் மாற்றியுள்ளனர்.