சென்னை : சென்னை, அசோக் நகர் அரசு மேல்நிலைப் பள்ளியில் நடைபெற்ற ஆன்மீக சொற்பொழிவு விவகாரம் சர்ச்சையை ஏற்படுத்தி உள்ளது.
இதுகுறித்து ஜாக்டோ ஜியோ மாநில ஒருங்கிணைப்பாளரும், தமிழ்நாடு உயர்நிலை மேல்நிலைப் பள்ளி பட்டதாரி ஆசிரியர் சங்கத்தின் நிறுவனத் தலைவருமான மாயவன் கூறுகையில், "மாணவர்களை உற்சாகப்படுத்துகிறோம் என்ற பெயரிலே பள்ளிகளில் மத கருத்துக்கள், ஆன்மீக கருத்துக்களை எல்லாம் போதிக்கக்கூடிய தவறான, மோசமான வேலைகளில் சிலர் ஈடுபடுகின்றனர்.
தலைமை ஆசிரியர்களை ஏமாற்றி இது போன்ற செயல்களை செய்து வருகின்றனர். அசோக் நகர் அரசு மேல்நிலைப்பள்ளி தலைமை ஆசிரியர் எந்த தவறும் செய்யவில்லை. மாணவர்கள் தேர்விலே தேர்ச்சி பெற வேண்டும் என்ற நல் எண்ணத்தில் அனுமதித்தார்.
பள்ளியில் இருக்கக்கூடிய எஸ்எம்சி (school management committee) பரிந்துரையின் பெயரில், இந்த சொற்பொழிவு நடந்திருக்கிறது என தெரிய வருகிறது. ஆனால் இதை தலைமையாசிரியர் தடுத்து நிறுத்திருக்க வேண்டும். ஆனால், அதை செய்யவில்லை. பள்ளிக்கல்வித்துறை அமைச்சர் உடனடியாக இதில் தலையிட்டு இது போன்ற நிகழ்வுகள் இனி தமிழ்நாட்டில் எந்த பள்ளியிலும் நடக்கக்கூடாது என்பதை உறுதியளித்திருக்கிறார்.