கோயம்புத்தூர்: நாடாளுமன்ற மக்களவைத் தேர்தலுக்கு இன்னும் ஒரு வாரக் காலம் மட்டுமே உள்ள நிலையில் அனைத்து கட்சி வேட்பாளர்களும், கட்சி நிர்வாகிகளும் தமிழகம் முழுவதும் அனல் பறக்க பிரச்சாரம் மேற்கொண்டு வருகின்றனர். அந்த வகையில், கோவை நாடாளுமன்றத் தொகுதியில் திமுக,அதிமுக, பாஜகவினர் கடும் பிரச்சாரத்தில் ஈடுபட்டு வாக்கு சேகரிப்பில் தீவிரம் காட்டி வருகின்றனர்.
இந்நிலையில், தீவிர தேர்தல் பிரச்சாரத்தில் ஈடுபட்டுள்ள கோயம்புத்தூர் திமுக வேட்பாளர் கணபதி ராஜ்குமார் ஈ.டிவி பாரத் ஊடகத்திற்கு பிரத்தியேக பேட்டி அளித்துள்ளார். அப்போது பேசிய அவர், கோவை ஆவராம்பாளையம் பகுதியில் பாஜக வேட்பாளர் அண்ணாமலை இரவு 11 மணி வரையில் பிரச்சாரம் செய்திருக்கிறார். தேர்தல் சட்ட விதிமுறைகளின் படி, இரவு 10 மணிக்கு மேல் பிரச்சாரம் செய்யக்கூடாது.
ஆனால், இவர்கள் 10.45 மணி வரையிலும் பிரச்சாரம் மேற்கொண்டனர். இந்நிலையில், அங்கு இருக்கக்கூடிய பொதுமக்களும், திமுக கட்சியினரும் அதற்கு எதிர்ப்பு தெரிவித்த போது, அவர்கள் பாஜகவினரால் தாக்கப்பட்டுள்ளனர். மேலும், பாஜகவினர் தோல்வி பயத்தில் இருக்கின்றனர், அவர்களுக்குத் தோற்றுவிடுவோம் என்ற சந்தேகம் வந்துள்ளது.