"அதிமுக தேர்தல் அறிக்கை குழுவின் கருத்து கேட்பு பிப்ரவரி 5ல் தொடங்குகிறது" - எடப்பாடி அறிக்கை

AIADMK’s election manifesto panel to tour across T.N.: அதிமுகவின் தேர்தல் அறிக்கை தயாரிக்கும் குழுவினர் முக்கிய தரவுகளை பெறுவதற்காக பிப்ரவரி 5 முதல் 10 தேதி வரை மண்டல வரியாக பொதுமக்களிடம் கருத்து கேட்கப்பட உள்ளதாக எடப்பாடி பழனிசாமி அறிக்கை வெளியிட்டுள்ளார்.

சென்னை:நாடாளுமன்ற மக்களவைத் தேர்தல் விரைவில் நடைபெற உள்ளதை முன்னிட்டு பல்வேறு அரசியல் கட்சிகள் தேர்தல் பணிகளில் மும்முரமாக ஈடுபட்டுள்ளது. இந்நிலையில் அதிமுக தரப்பில் தேர்தல் அறிக்கை தயாரிக்க நத்தம் விஸ்வநாதன், பொன்னையன், பொள்ளாச்சி ஜெயராமன், ஜெயக்குமார், சி.வி.சண்முகம், செம்மலை, வளர்மதி, ஓ.எஸ்.மணியன், ஆர்.பி.உதயகுமார், வைகைச் செல்வன் ஆகியோர் அடங்கிய குழு அமைக்கப்பட்டது.

இந்நிலையில், தமிழகத்தினுடைய நலனை முன்னிலைப் படுத்தவும் ஆக்கப்பூர்வமான பங்களிப்பை வழங்குவதுமான ஒரு தேர்தல் அறிக்கை தயாரிக்கும் வகையில் அதிமுக தேர்தல் அறிக்கை தயாரிக்கும் குழுவினர் தமிழக முழுவதும் வருகின்ற பிப்ரவரி 5ஆம் தேதி முதல் 10ம் தேதி வரை மண்டல வாரியாக சுற்றுப் பயணம் மேற்கொள்ள உள்ளதாக அதிமுகவினுடைய பொதுச் செயலாளர் எடப்பாடி பழனிசாமி அறிக்கையினை வெளியிட்டுள்ளார்.

இந்த சுற்றுப்பயணத்தில் பல்வேறு தரப்பு மக்களைச் சந்தித்து தரவுகளைச் சேகரித்துச் சிறந்த தேர்தல் அறிக்கை தயாரிக்கச் செய்ய உள்ளதாகவும் அதன்படி பிப்ரவரி 5ஆம் தேதி காலை 9 மணி சென்னை மண்டலத்திலும் மாலை 5 மணிக்கு வேலூர் மண்டலத்திலும் 6ஆம் தேதி காலை 10:30 மணிக்கு விழுப்புரம் மண்டலத்திலும் மாலை 5 மணிக்குச் சேலம் மண்டலத்திலும் கருத்துக் கேட்புக் கூட்டங்கள் நடைபெறும் என கூறப்பட்டுள்ளது.

இதையும் படிங்க:தூத்துக்குடியில் கருத்து வேறுபாடால் மனைவியை கொலை செய்துவிட்டு கணவன் தற்கொலை..!

இதன்படி, 7ஆம் தேதி காலை 10 மணிக்குத் தஞ்சாவூர் மண்டலத்திலும் மாலை 5 மணிக்குத் திருச்சி மண்டலத்திலும் என பொதுமக்களைச் சந்தித்து கருத்துக் கேட்க உள்ளதாகவும் பிப்ரவரி 8ஆம் தேதி மாலை 4 மணிக்குக் கோவை மண்டலத்திலும் 9ம் தேதி காலை 10 மணி மற்றும் மாலை 4 மணிக்கு மதுரை மண்டலத்திலும் 10ம் தேதி காலை 10 மணிக்குத் திருநெல்வேலி மண்டலத்திலும் கருத்துக் கேட்புக் கூட்டங்கள் நடைபெறும் எனவும் அந்த அறிக்கையில் குறிப்பிடப்பட்டுள்ளது.

தேர்தல் அறிக்கை தயாரிப்பு குழுவினர் வரும்பொழுது அந்தந்த மண்டலத்துக்கு உட்பட்ட மாவட்டச் செயலாளர்களும் நிர்வாகிகளும் அந்த மாவட்டங்களில் உள்ள விவசாயிகள், தொழிலாளர்கள், மகளிர், மாணவர்களிடம் என அனைத்து தரப்பினர் தேவைகள் மற்றும் எதிர்பார்ப்புகள் என்னென்ன என்று நேரடியாகக் கேட்க வேண்டும் எனவும் தரவுகளைப் பெற்று வந்து குழுவினருடன் ஒப்படைக்குமாறு கேட்டுக் கொள்ளப்படுவதாக அதிமுகவினுடைய பொதுச் செயலாளர் எடப்பாடி பழனிசாமி வெளியிட்டுள்ள அறிக்கையில் குறிப்பிடப்பட்டுள்ளது.

இதையும் படிங்க:சேலத்தில் மகளை கொலை செய்துவிட்டு தந்தை, மகன் தற்கொலை.. நடந்தது என்ன?