ਗ੍ਰਾਮੀਣ ਡਾਕ ਸੇਵਕਾਂ ਨੇ ਸੁਪਰੀਡੈਂਟ ਦੇ ਕਥਿਤ ਮਾੜੇ ਰਵਈਏ ਵਿਰੁੱਧ ਦਿੱਤਾ ਧਰਨਾ

ਫ਼ਰੀਦਕੋਟ ਦੇ ਪ੍ਰਮੁੱਖ ਡਾਕਘਰ ਦੇ ਬਾਹਰ ਗ੍ਰਾਮੀਣ ਡਾਕ ਸੇਵਕਾਂ ਨੇ ਡਾਕਖ਼ਾਨੇ ਦੇ ਸੁਪਰੀਡੈਂਟ ਦੇ ਕਥਿਤ ਮਾੜੇ ਰਵਈਏ ਦੇ ਖਿਲਾਫ਼ ਧਰਨਾ ਲਗਾਉਂਦਿਆਂ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ।

ਫ਼ਰੀਦਕੋਟ: ਇੱਥੋਂ ਦੇ ਪ੍ਰਮੁੱਖ ਡਾਕਘਰ ਦੇ ਬਾਹਰ ਗ੍ਰਾਮੀਣ ਡਾਕ ਸੇਵਕਾਂ ਨੇ ਡਾਕਖ਼ਾਨੇ ਦੇ ਸੁਪਰੀਡੈਂਟ ਦੇ ਕਥਿਤ ਮਾੜੇ ਰਵਈਏ ਦੇ ਖਿਲਾਫ਼ ਧਰਨਾ ਲਗਾਉਂਦਿਆਂ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ।

ਇਸ ਮੌਕੇ ਗੱਲਬਾਤ ਕਰਦਿਆਂ ਗ੍ਰਾਮੀਣ ਡਾਕ ਸੇਵਕਾਂ ਨੇ ਕਿਹਾ ਕਿ ਫ਼ਰੀਦਕੋਟ ਦੇ ਸੁਪਰੀਡੈਂਟ ਦਾ ਰਵਈਆ ਗ੍ਰਾਮੀਣ ਡਾਕਸੇਵਕਾਂ ਨਾਲ ਬਹੁਤ ਮਾੜਾ ਹੈ ਅਤੇ ਸੁਪਰੀਡੈਂਟ ਵੱਲੋਂ ਉਨ੍ਹਾਂ ਨੂੰ ਜਾਣ-ਬੁੱਝ ਕੇ ਪ੍ਰੇਸ਼ਾਨ ਕੀਤਾ ਜਾਂਦਾ ਹੈ।ਉਨ੍ਹਾਂ ਕਿਹਾ ਕਿ ਡਾਕਘਰ ਵਿੱਚ ਸਟਾਫ਼ ਦੀ ਕਮੀ ਹੈ ਜਿਸ ਕਾਰਨ ਗ੍ਰਾਮੀਣ ਡਾਕ ਸੇਵਕਾਂ ਉੱਤੇ ਕੰਮ ਦਾ ਵਾਧੂ ਬੋਝ ਪਾਇਆ ਜਾ ਰਿਹਾ ਹੈ। ਡਾਕਸੇਵਕਾਂ ਨੇ ਚੇਤਾਵਣੀ ਦਿੱਤੀ ਕਿ ਜੇ ਸੁਪਰੀਡੈਂਟ ਦੀ ਜਲਦ ਬਦਲੀ ਨਾ ਕੀਤੀ ਜਾਂ ਸੁਪਰੀਡੈਂਟ ਨੇ ਆਪਣਾ ਰਵਈਆ ਨਾ ਬਦਲਿਆ ਤਾਂ ਉਹ ਬੁੱਧਵਾਰ ਤੋਂ ਅਣਮਿੱਥੇ ਸਮੇਂ ਲਈ ਹੜਤਾਲ 'ਤੇ ਜਾਣਗੇ।ਇਸ ਮੌਕੇ ਜਦੋਂ ਸੁਪਰੀਡੈਂਟ ਐਮ.ਸੀ. ਮੀਨਾ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਕਰਮਚਾਰੀ ਕੰਮ ਕਰਨ ਤੋਂ ਜੀ ਚੁਰਾ ਰਹੇ ਹਨ ਤੇ ਉਨ੍ਹਾਂ ਉੱਤੇ ਜੋ ਵੀ ਦੋਸ਼ ਲਗਾਏ ਜਾ ਰਹੇ ਹਨ ਉਹ ਝੂਠੇ ਤੇ ਬੇਬੁਨਿਆਦ ਹਨ।