ਮੁੰਬਈ : ਚੰਦਰਨ ਰਣਜੀਤ ਅਤੇ ਨਵੀਨ ਕੁਮਾਰ ਦੇ ਸ਼ਾਨਦਾਰ ਸੁਪਰ-10 ਦੇ ਦਮ ਨਾਲ ਦਬੰਗ ਦਿੱਲੀ ਨੇ ਪ੍ਰੋ-ਕਬੱਡੀ ਲੀਗ ਦੇ 7ਵੇਂ ਸੀਜ਼ਨ ਦੇ 14ਵੇਂ ਮੈਚ ਵਿੱਚ ਹਰਿਆਣਾ ਸਟੀਲਰਜ਼ ਨੂੰ 41-21 ਨਾਲ ਮਾਤ ਦੇ ਕੇ ਜਿੱਤ ਦੀ ਹੈਟ੍ਰਿਕ ਪੂਰੀ ਕੀਤੀ ਹੈ ਅਤੇ ਅੰਕ ਸੂਚੀ ਵਿੱਚ ਚੋਟੀ ਦਾ ਸਥਾਨ ਹਾਸਲ ਕੀਤਾ ਹੈ। ਇਸ ਜਿੱਤ ਦੇ ਨਾਲ ਹੀ ਦਬੰਗ ਦਿੱਲੀ ਨੇ ਪ੍ਰੋ-ਕਬੱਡੀ ਲੀਗ ਵਿੱਚ ਹਰਿਆਣਾ ਸਟੀਲਰਜ਼ ਵਿਰੁੱਧ ਆਪਣਾ ਰਿਕਾਰਡ 2-5 ਦਾ ਕਰ ਲਿਆ ਹੈ।
ਇਸ ਮੈਚ ਵਿੱਚ ਦਬੰਗ ਦਿੱਲੀ ਦੀ ਜਿੱਤ ਦੇ ਹੀਰੋ ਰਹੇ ਚੰਦਰਨ ਰਣਜੀਤ ਨੇ 11 ਅਤੇ ਨਵੀਨ ਨੇ 10 ਅੰਕ ਲਏ। ਨਵੀ ਨੇ ਇਥੇ ਪੀਕੇਐੱਲ ਵਿੱਚ ਆਪਣੇ 200 ਤੇ ਰਣਜੀਤ ਨੇ 500 ਰੇਡਾਂ ਦੇ ਅੰਕ ਵੀ ਪੂਰੇ ਕੀਤੇ ਹਨ।
ਹਰਿਆਣਾ ਸਟੀਲਰਜ਼ ਦੇ ਕਪਤਾਨ ਧਰਮਰਾਜ ਚੇਰਾਲਾਥਨ ਨੇ ਲੀਗ ਵਿੱਚ ਆਪਣੇ 400 ਟੈਕਲ ਅੰਕ ਵੀ ਪੂਰੇ ਕੀਤੇ ਹਨ।
ਦਬੰਗ ਦਿੱਲੀ ਦੀ ਤਿੰਨ ਮੈਚਾਂ ਵਿੱਚ ਇਹ ਲਗਾਤਾਰ ਤੀਸਰੀ ਜਿੱਤ ਹੈ ਅਤੇ ਹੁਣ ਉਹ 15 ਅੰਕਾਂ ਦੇ ਨਾਲ ਅੰਕ ਸੂਚੀ ਵਿੱਚ ਚੋਟੀ ਦੇ ਸਥਾਨ ਉੱਤੇ ਪਹੁੰਚ ਗਈ ਹੈ। ਉਥੇ ਹੀ, ਹਰਿਆਣਾ ਸਟੀਲਰਜ਼ ਦੀ 2 ਮੈਚਾਂ ਵਿੱਚ ਇਹ ਪਹਿਲੀ ਹਾਰ ਹੈ।
ਇਥੇ ਐੱਨਐੱਸਸੀਆਈ ਐੱਸਵੀਪੀ ਸਟੇਡਿਅਮ ਵਿੱਚ ਖੇਡੇ ਗਏ ਮੁਕਾਬਲੇ ਦੇ ਪਹਿਲੇ ਹਾਫ਼ ਵਿੱਚ ਦਬੰਗ ਦਿੱਲੀ ਦੀ ਟੀਮ 15-10 ਤੋਂ ਅੱਗੇ ਸੀ।