Virat Kohli 500th Match: ਆਪਣੇ 500ਵੇਂ ਮੈਚ 'ਚ ਇਹ 5 ਰਿਕਾਰਡ ਤੋੜਣਗੇ ਕਿੰਗ ਕੋਹਲੀ

ਕਰੀਬ 15 ਸਾਲ ਪਹਿਲਾਂ 18 ਅਗਸਤ 2008 ਨੂੰ ਆਪਣਾ ਅੰਤਰਰਾਸ਼ਟਰੀ ਡੈਬਿਊ ਮੈਚ ਖੇਡਣ ਵਾਲੇ ਭਾਰਤ ਦੇ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਅੱਜ ਤੋਂ ਵੈਸਟਇੰਡੀਜ਼ ਖ਼ਿਲਾਫ਼ ਸ਼ੁਰੂ ਹੋ ਰਹੇ ਦੂਜੇ ਟੈਸਟ ਮੈਚ ਵਿੱਚ ਆਪਣਾ 500ਵਾਂ ਮੈਚ ਖੇਡਣਗੇ। ਵਿਸ਼ਵ ਕ੍ਰਿਕਟ ਦੇ ਮੌਜੂਦਾ ਸਮੇਂ ਦੇ ਮਹਾਨ ਬੱਲੇਬਾਜ਼ ਕੋਹਲੀ ਇਹ 5 ਖਾਸ ਰਿਕਾਰਡ ਆਪਣੇ ਨਾਂ ਕਰਨਗੇ।

ਪੋਰਟ ਆਫ ਸਪੇਨ :ਦੁਨੀਆ 'ਚ 'ਰਨ ਮਸ਼ੀਨ' ਅਤੇ 'ਕਿੰਗ ਕੋਹਲੀ' ਦੇ ਨਾਂ ਨਾਲ ਜਾਣੇ ਜਾਂਦੇ ਭਾਰਤੀ ਸਾਬਕਾ ਕਪਤਾਨ ਅਤੇ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਅੱਜ ਭਾਰਤ ਅਤੇ ਵੈਸਟਇੰਡੀਜ਼ ਵਿਚਾਲੇ ਖੇਡੇ ਜਾਣ ਵਾਲੇ ਦੂਜੇ ਟੈਸਟ 'ਚ ਆਪਣਾ 500ਵਾਂ ਅੰਤਰਰਾਸ਼ਟਰੀ ਮੈਚ ਖੇਡਣਗੇ। ਵਿਸ਼ਵ ਕ੍ਰਿਕਟ 'ਚ ਕਈ ਰਿਕਾਰਡ ਬਣਾਉਣ ਵਾਲੇ ਕੋਹਲੀ ਆਪਣੇ 500ਵੇਂ ਮੈਚ 'ਚ ਇਹ 5 ਰਿਕਾਰਡ ਤੋੜਣਗੇ।

ਸਭ ਤੋਂ ਵੱਧ ਦੌੜਾਂ ਦਾ ਰਿਕਾਰਡ : ਵਿਰਾਟ ਕੋਹਲੀ 500 ਅੰਤਰਰਾਸ਼ਟਰੀ ਮੈਚਾਂ ਤੱਕ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਬੱਲੇਬਾਜ਼ ਬਣ ਜਾਣਗੇ। ਵਿਰਾਟ ਕੋਹਲੀ ਨੇ 499 ਮੈਚਾਂ 'ਚ 25461 ਦੌੜਾਂ ਬਣਾਈਆਂ ਹਨ ਅਤੇ ਉਨ੍ਹਾਂ ਤੋਂ ਪਹਿਲਾਂ ਸਿਰਫ ਸਾਬਕਾ ਆਸਟ੍ਰੇਲੀਆਈ ਕਪਤਾਨ ਰਿਕੀ ਪੋਂਟਿੰਗ ਨੇ 500 ਮੈਚਾਂ 'ਚ 25000 ਤੋਂ ਜ਼ਿਆਦਾ ਦੌੜਾਂ ਦਾ ਅੰਕੜਾ ਪਾਰ ਕੀਤਾ ਸੀ। ਆਪਣੇ 500ਵੇਂ ਮੈਚ 'ਚ ਐਂਟਰੀ ਕਰਦੇ ਹੀ ਕੋਹਲੀ ਪੋਂਟਿੰਗ ਦਾ ਰਿਕਾਰਡ ਤੋੜ ਕੇ ਇਹ ਰਿਕਾਰਡ ਆਪਣੇ ਨਾਂ ਕਰ ਲੈਣਗੇ।

ਸਭ ਤੋਂ ਵੱਧ ਸੈਂਕੜਿਆਂ ਦਾ ਸਾਂਝਾ ਰਿਕਾਰਡ :ਵਿਰਾਟ ਕੋਹਲੀ ਦੇ ਨਾਂ 499 ਮੈਚਾਂ 'ਚ 75 ਸੈਂਕੜੇ ਹਨ। ਭਾਰਤ ਦੇ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਨੇ ਵੀ 500 ਮੈਚਾਂ 'ਚ 75 ਸੈਂਕੜੇ ਲਗਾਏ ਹਨ। ਵਿਰਾਟ ਵੈਸਟਇੰਡੀਜ਼ ਖਿਲਾਫ ਆਪਣੇ 500ਵੇਂ ਮੈਚ 'ਚ ਮੈਦਾਨ 'ਤੇ ਉਤਰਦੇ ਹੀ ਤੇਂਦੁਲਕਰ ਦੇ ਨਾਲ ਸਾਂਝੇ ਤੌਰ 'ਤੇ ਸਭ ਤੋਂ ਵੱਧ ਸੈਂਕੜਾ ਲਗਾਉਣ ਵਾਲੇ ਬੱਲੇਬਾਜ਼ ਬਣ ਜਾਣਗੇ। ਦੂਜੇ ਪਾਸੇ ਜੇਕਰ ਕੋਹਲੀ ਇਸ ਮੈਚ 'ਚ ਸੈਂਕੜਾ ਲਗਾਉਂਦੇ ਹਨ ਤਾਂ ਉਹ ਸਚਿਨ ਦਾ ਇਹ ਰਿਕਾਰਡ ਤੋੜ ਕੇ ਇਹ ਰਿਕਾਰਡ ਆਪਣੇ ਨਾਂ ਕਰ ਲੈਣਗੇ।

ਸਭ ਤੋਂ ਵੱਧ ਦੌੜਾਂ ਦੀ ਔਸਤ ਰਿਕਾਰਡ :ਅੰਤਰਰਾਸ਼ਟਰੀ ਕ੍ਰਿਕਟ 'ਚ 500 ਮੈਚ ਖੇਡਣ ਤੱਕ ਵਿਰਾਟ ਕੋਹਲੀ ਦੀ ਰਨ ਔਸਤ 53 ਦੇ ਨੇੜੇ ਹੈ, ਜੋ ਕਿ ਸਭ ਤੋਂ ਜ਼ਿਆਦਾ ਹੈ। ਇਸ ਤੋਂ ਪਹਿਲਾਂ ਇਹ ਰਿਕਾਰਡ ਦੱਖਣੀ ਅਫਰੀਕਾ ਦੇ ਆਲਰਾਊਂਡਰ ਜੈਕ ਕੈਲਿਸ ਦੇ ਨਾਂ ਸੀ, ਜਿਨ੍ਹਾਂ ਦੀ 500 ਮੈਚ ਖੇਡਣ ਤੱਕ ਰਨ ਔਸਤ 50 ਦੇ ਨੇੜੇ ਸੀ।

ਭਾਰਤੀ ਬੱਲੇਬਾਜ਼ਾਂ ਦਾ ਤੀਜੀ ਸਭ ਤੋਂ ਵੱਧ ਵਾਰ ਨਾਬਾਦ ਪਰਤਣ ਦਾ ਰਿਕਾਰਡ :ਵਿਰਾਟ ਕੋਹਲੀ 500ਵੇਂ ਮੈਚ ਤੱਕ ਸਭ ਤੋਂ ਵੱਧ ਵਾਰ ਨਾਟ ਆਊਟ ਹੋਣ ਵਾਲੇ ਤੀਜੇ ਭਾਰਤੀ ਬੱਲੇਬਾਜ਼ ਬਣ ਜਾਣਗੇ। ਵਿਰਾਟ ਕੋਹਲੀ ਹੁਣ ਤੱਕ ਤਿੰਨੋਂ ਫਾਰਮੈਟਾਂ ਵਿੱਚ 82 ਵਾਰ ਮੈਦਾਨ ਤੋਂ ਨਾਟ ਆਊਟ ਵਾਪਸੀ ਕਰ ਚੁੱਕੇ ਹਨ। ਸਾਬਕਾ ਕਪਤਾਨ ਐੱਮਐੱਸ ਧੋਨੀ ਭਾਰਤੀ ਬੱਲੇਬਾਜ਼ ਹਨ, ਜੋ ਸਭ ਤੋਂ ਵੱਧ 142 ਵਾਰ ਨਾਟ ਆਊਟ ਹੋਏ ਹਨ।

ਸਭ ਤੋਂ ਵੱਧ ਮੈਚਾਂ ਨਾਲ ਚੌਥੇ ਨੰਬਰ 'ਤੇ ਭਾਰਤੀ ਬੱਲੇਬਾਜ਼ :ਵਿਰਾਟ ਕੋਹਲੀ ਵੈਸਟਇੰਡੀਜ਼ ਦੇ ਖਿਲਾਫ ਦੂਜੇ ਟੈਸਟ ਮੈਚ 'ਚ ਮੈਦਾਨ 'ਤੇ ਉਤਰਦੇ ਹੀ ਚੌਥੇ ਸਭ ਤੋਂ ਜ਼ਿਆਦਾ ਕੈਪ ਲਗਾਉਣ ਵਾਲੇ ਭਾਰਤੀ ਬੱਲੇਬਾਜ਼ ਬਣ ਜਾਣਗੇ। ਵਿਰਾਟ ਤੋਂ ਪਹਿਲਾਂ ਸਚਿਨ ਤੇਂਦੁਲਕਰ, ਰਾਹੁਲ ਦ੍ਰਾਵਿੜ ਅਤੇ ਐਮਐਸ ਧੋਨੀ 500 ਤੋਂ ਵੱਧ ਮੈਚ ਖੇਡ ਚੁੱਕੇ ਹਨ।