ਬੇਰੂਤ: ਲੇਬਨਾਨ ਦੀ ਰਾਜਧਾਨੀ ਬੇਰੂਤ ਵਿੱਚ ਵੀਰਵਾਰ ਨੂੰ ਬੰਦਰਗਾਹ ਉੱਤੇ ਭਿਆਨਕ ਅੱਗ ਲੱਗ ਗਈ। ਅੱਗ ਕਿਸ ਕਾਰਨ ਲੱਗੀ ਇਹ ਸਪਸ਼ਟ ਨਹੀਂ ਹੋ ਸਕਿਆ, ਜਦਕਿ ਬੀਤੀ 4 ਅਗਸਤ ਨੂੰ 3 ਹਜ਼ਾਰ ਟਨ ਅਮੋਨੀਆਮ ਨਾਇਟਰੇਟ ਵਿਸ਼ਫ਼ੋਟ ਨੂੰ ਅੱਗ ਲੱਗਣ ਕਾਰਨ ਵੱਡਾ ਧਮਾਕਾ ਹੋਇਆ ਸੀ।
ਇਸ ਅੱਗ ਦੀਆਂ ਲਪਟਾਂ ਕਾਫ਼ੀ ਦੂਰ ਤੱਕ ਵੇਖੀਆਂ ਗਈਆਂ ਹਨ। 4 ਅਗਸਤ ਦੇ ਧਮਾਕੇ ਵਿੱਚ 190 ਤੋਂ ਵੱਧ ਲੋਕ ਮਾਰੇ ਗਏ ਸਨ, ਲਗਭਗ 6,500 ਜ਼ਖ਼ਮੀ ਹੋਏ ਸਨ ਅਤੇ ਲੇਬਨਾਨ ਦੀ ਰਾਜਧਾਨੀ ਵਿੱਚ ਹਜ਼ਾਰਾਂ ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ ਸੀ। ਇੱਕ ਮਹੀਨੇ ਬਾਅਦ ਇੱਕ ਹੋਰ ਭਿਆਨਕ ਅੱਗ ਨੇ ਪਿਛਲੇ ਮਹੀਨੇ ਹੋਏ ਧਮਾਕੇ ਨਾਲ ਸਦਮੇ ਵਿੱਚ ਆਏ ਲੋਕਾਂ ਅੰਦਰ ਦਹਿਸ਼ਤ ਪੈਦਾ ਕਰ ਦਿੱਤੀ।
ਰਾਜ-ਵੱਲੋਂ ਚਲਾਈ ਜਾਂਦੀ ਰਾਸ਼ਟਰੀ ਨਿਊਜ਼ ਏਜੰਸੀ ਨੇ ਕਿਹਾ ਕਿ ਅੱਗ ਇੱਕ ਗੋਦਾਮ ਵਿੱਚ ਲੱਗੀ ਹੈ ਜਿੱਥੇ ਟਾਇਰ ਰੱਖੇ ਗਏ ਸਨ। ਅੱਗੇ ਦੱਸਿਆ ਗਿਆ ਕਿ ਅੱਗ ਬੁਝਾਉਣ ਵਾਲੀਆਂ ਟੀਮਾਂ ਇਸ ਨਾਲ ਨਜਿੱਠ ਰਹੀਆਂ ਹਨ।