ਚੰਡੀਗੜ੍ਹ: ਹਿੰਦੀ ਫਲਮ ਇੰਡਸਟਰੀ ਵਿੱਚ ਨਵੀਂ ਸਨਸਨੀਖੇਜ਼ ਅਦਾਕਾਰਾ ਦੇ ਤੌਰ 'ਤੇ ਉਭਰ ਰਹੀ ਹੈ ਖੂਬਸੂਰਤ ਅਤੇ ਪ੍ਰਤਿਭਾਵਾਨ ਅਦਾਕਾਰਾ ਪਾਇਲ ਘੋਸ਼, ਜੋ ਰਿਲੀਜ਼ ਹੋਣ ਜਾ ਰਹੀ ਬਹੁ-ਚਰਚਿਤ ਹਿੰਦੀ ਫਿਲਮ 'ਫਾਇਰ ਆਫ ਲਵ ਰੈੱਡ' ਦੁਆਰਾ ਸ਼ਾਨਦਾਰ ਪਾਰੀ ਦੇ ਆਗਾਜ਼ ਵੱਲ ਵਧਣ ਜਾ ਰਹੀ ਹੈ।
'ਅਵੰਤੀ ਪ੍ਰਾਜਕਿਤਾ ਆਰਟਸ' ਅਤੇ 'ਅਵੰਤਿਕਾ ਫਿਲਮਜ਼' ਦੇ ਬੈਨਰ ਹੇਠ ਬਣਾਈ ਗਈ ਉਕਤ ਫਿਲਮ ਦੇ ਨਿਰਮਾਤਾ ਰਾਜੀਵ ਚੌਧਰੀ, ਜਗਨਨਾਥ ਵਾਘਮਾਰੇ, ਰੇਖਾ ਸੁਰਿੰਦਰ ਜਗਤਾਪ ਅਤੇ ਸਹਿ ਨਿਰਮਾਤਾ ਸ਼ਾਤਨੂੰ ਬਾਮਰੇ ਹਨ, ਜਦਕਿ ਇਸ ਦਾ ਨਿਰਦੇਸ਼ਨ ਅਸ਼ੋਕ ਤਿਆਗੀ ਵੱਲੋਂ ਕੀਤਾ ਗਿਆ ਹੈ ਜੋ ਇਸ ਤੋਂ ਪਹਿਲਾਂ 'ਰਿਆਸਤ', 'ਸੁਰਖੀਆਂ', 'ਰਿਟਰਨਜ਼ ਆਫ ਜਵੈਲ ਥੀਫ' ਜਿਹੀਆਂ ਕਈ ਅਰਥ-ਭਰਪੂਰ ਅਤੇ ਬਿਹਤਰੀਨ ਫਿਲਮਾਂ ਦਾ ਨਿਰਦੇਸ਼ਨ ਕਰ ਚੁੱਕੇ ਹਨ ਅਤੇ ਬਾਲੀਵੁੱਡ ਦੇ ਅਜ਼ੀਮ ਨਿਰਦੇਸ਼ਕਾਂ 'ਚ ਆਪਣਾ ਸ਼ੁਮਾਰ ਕਰਵਾਉਣ ਵਿੱਚ ਸਫ਼ਲ ਰਹੇ ਹਨ।
ਮੁੰਬਈ ਦੇ ਐਸਜੇ ਸਟੂਡਿਓ ਕਾਂਦੀਵਲੀ ਸਮੇਤ ਬੀ-ਟਾਊਨ ਦੀਆਂ ਹੋਰ ਵੱਖ-ਵੱਖ ਲੋਕੇਸ਼ਨਾਂ 'ਤੇ ਮੁਕੰਮਲ ਕੀਤੀ ਉਕਤ ਫਿਲਮ ਕ੍ਰਾਈਮ ਡਰਾਮਾ ਥ੍ਰਿਲਰ ਸਟੋਰੀ ਅਧਾਰਿਤ ਇਸ ਫਿਲਮ ਵਿੱਚ ਛੋਟੇ ਪਰਦੇ ਦੇ ਮਸ਼ਹੂਰ ਕਮੇਡੀਅਨ ਕ੍ਰਿਸ਼ਨਾ ਅਭਿਸ਼ੇਕ ਅਜਿਹੇ ਖਤਰਨਾਕ ਅਤੇ ਨਿਵੇਕਲੇ ਨਵੇਂ ਅਵਤਾਰ ਵਿੱਚ ਨਜ਼ਰ ਆਉਣਗੇ, ਜਿਸ ਤਰਾਂ ਦਾ ਰੋਲ ਉਨਾਂ ਵੱਲੋਂ ਆਪਣੇ ਹੁਣ ਤੱਕ ਦੇ ਕਿਸੇ ਪ੍ਰੋਜੈਕਟ ਚਾਹੇ ਉਹ ਫਿਲਮਜ਼ ਹੋਣ ਜਾਂ ਸ਼ੋਅ ਆਦਿ ਵਿੱਚ ਅਦਾ ਨਹੀਂ ਕੀਤਾ ਗਿਆ ਅਤੇ ਉਨਾਂ ਦੇ ਨਾਲ ਹੀ ਲੀਡ ਫੀਮੇਲ ਭੂਮਿਕਾ ਵਿੱਚ ਵਿਖਾਈ ਦੇਵੇਗੀ ਅਦਾਕਾਰਾ ਪਾਇਲ ਘੋਸ਼, ਜੋ ਇਸ ਫਿਲਮ ਅਤੇ ਇਸ ਵਿਚਲੇ ਆਪਣੇ ਰੋਲ ਨੂੰ ਲੈ ਕਾਫ਼ੀ ਉਤਸ਼ਾਹਿਤ ਅਤੇ ਆਸਵੰਦ ਨਜ਼ਰ ਆ ਰਹੀ ਹੈ।
ਮੂਲ ਰੂਪ ਵਿੱਚ ਪੱਛਮੀ ਬੰਗਾਲ ਨਾਲ ਸੰਬੰਧਤ ਅਦਾਕਾਰਾ ਪਾਇਲ ਘੋਸ਼ ਬੰਗਾਲੀ ਅਤੇ ਤੇਲਗੂ ਫਿਲਮ ਜਗਤ ਵਿੱਚ ਵੀ ਵੱਡੇ ਨਾਂਅ ਵਜੋਂ ਆਪਣੀ ਭੱਲ ਸਥਾਪਿਤ ਕਰਦੀ ਜਾ ਰਹੀ ਹੈ, ਜੋ ਹੁਣ ਉਕਤ ਫਿਲਮ ਨਾਲ ਮੁੰਬਈ ਗਲਿਅਰਿਆਂ ਵਿੱਚ ਵੀ ਮਜ਼ਬੂਤ ਪੈੜਾਂ ਸਿਰਜਣ ਦਾ ਰਾਹ ਤੇਜ਼ੀ ਨਾਲ ਸਰ ਕਰਨ ਵੱਲ ਵੱਧ ਰਹੀ ਹੈ।
