ਨਵੀਂ ਦਿੱਲੀ: ਰਸੋਈ ਗੈਸ ਦੇ ਗਾਹਕਾਂ ਨੂੰ ਨਵੇਂ ਸਾਲ ਦੇ ਪਹਿਲੇ ਹੀ ਦਿਨ ਮਹਿੰਗਾਈ ਦੀ ਮਾਰ ਝਲਣੀ ਪੈ ਰਹੀ ਹੈ। ਦੱਸ ਦਈਏ, ਬਿਨਾਂ ਸਬਸਿਡੀ ਦੇ ਸਿਲੰਡਰ ਦੀ ਕੀਮਤ ਵਿਚ 19 ਰੁਪਏ ਦਾ ਵਾਧਾ ਕੀਤਾ ਗਿਆ ਹੈ।
ਹੁਣ ਘਰੇਲੂ ਸਿਲੰਡਰ 749 ਰੁਪਏ ਦਾ ਹੋ ਗਿਆ ਹੈ। ਜਦਕਿ ਕਮਰਸ਼ੀਅਲ ਸਿਲੰਡਰ (19 ਕਿੱਲੋ) ਵਿੱਚ 29.50 ਰੁਪਏ ਦਾ ਵਾਧਾ ਹੋਇਆ ਹੈ। ਵਪਾਰੀਆਂ ਨੂੰ ਹੁਣ ਸਿਲੰਡਰ ਲਈ 1325.00 ਰੁਪਏ ਦੇਣੇ ਪੈਣਗੇ। ਇਸ ਦੇ ਨਾਲ ਹੀ ਛੋਟੇ-ਛੋਟੇ 5 ਸਿਲੰਡਰ 'ਤੇ 7 ਰੁਪਏ ਦੇ ਵਾਧੇ ਤੋਂ ਬਾਅਦ ਇਸ ਦੀ ਕੀਮਤ 276 ਰੁਪਏ ਹੋਵੇਗੀ। ਇਸ ਵਾਰ ਘਰੇਲੂ ਗੈਸ ਖ਼ਪਤਕਾਰਾਂ ਦੇ ਖਾਤਿਆਂ ਵਿੱਚ 238.10 ਰੁਪਏ ਦੀ ਸਬਸਿਡੀ ਮਿਲੇਗੀ। ਵਧੀਆਂ ਕੀਮਤਾਂ ਬੁੱਧਵਾਰ ਸਵੇਰ ਤੋਂ ਲਾਗੂ ਹੋ ਗਈਆਂ ਹਨ।
ਅਗਸਤ 2019 ਵਿੱਚ 611 ਰੁਪਏ ਦਾ ਸੀ ਘਰੇਲੂ ਸਿਲੰਡਰ
ਅਗਸਤ 2019 ਵਿੱਚ 611.50 ਰੁਪਏ ਦਾ ਘਰੇਲੂ ਗੈਸ ਸਿਲੰਡਰ, ਜਨਵਰੀ 2020 ਵਿੱਚ 749 ਰੁਪਏ ਦਾ ਹੋ ਗਿਆ ਹੈ। ਭਾਵ ਕਿ ਪਿਛਲੇ ਪੰਜ ਮਹੀਨਿਆਂ ਵਿੱਚ ਰਸੋਈ ਗੈਸ ਦੀ ਬਾਜਾਰ ਵਿੱਚ ਕੀਮਤ 137 ਰੁਪਏ ਵਧੀ ਹੈ। ਜਦਕਿ ਵਪਾਰਕ ਸਿਲੰਡਰ ਦੀ ਵਰਤੋਂ ਕਰਨ ਵਾਲੇ ਕਾਰੋਬਾਰੀਆਂ 'ਤੇ ਪ੍ਰਤੀ ਸਿਲੰਡਰ' ਤੇ 230 ਰੁਪਏ ਦਾ ਭਾਰ ਵੱਧ ਗਿਆ ਹੈ।