ਉੱਤਰਾਖੰਡ: ਸ਼ਰਧਾਲੂਆਂ ਲਈ ਖੁਸ਼ਖਬਰੀ ਹੈ ਕਿ ਕੇਦਾਰਨਾਥ ਧਾਮ ਦੇ ਕਪਾਟ ਇਸ ਸਾਲ 10 ਮਈ ਨੂੰ ਖੁੱਲ੍ਹਣਗੇ। ਕੇਦਾਰਨਾਥ ਧਾਮ ਗਿਆਰ੍ਹਵਾਂ ਜਯੋਤਿਰਲਿੰਗ ਹੈ। ਇਸ ਸਾਲ ਦੀ ਚਾਰਧਾਮ ਯਾਤਰਾ ਲਈ ਬਾਬਾ ਕੇਦਾਰ ਦੇ ਕਪਾਟ ਸ਼ੁੱਕਰਵਾਰ 10 ਮਈ ਨੂੰ ਸਵੇਰੇ 7 ਵਜੇ ਖੁੱਲ੍ਹਣਗੇ।
10 ਮਈ ਨੂੰ ਖੁੱਲ੍ਹਣਗੇ ਕੇਦਾਰਨਾਥ ਧਾਮ ਦੇ ਕਪਾਟ:ਮਹਾਸ਼ਿਵਰਾਤਰੀ 'ਤੇ ਅੱਜ ਕੇਦਾਰਨਾਥ ਧਾਮ ਦੇ ਕਪਾਟ ਖੋਲ੍ਹਣ ਦਾ ਐਲਾਨ ਕੀਤਾ ਗਿਆ। ਅੱਜ ਮਹਾਸ਼ਿਵਰਾਤਰੀ ਦੇ ਮੌਕੇ 'ਤੇ ਪੰਚਕੇਦਾਰ ਗੱਦੀਸਥਲ ਸ਼੍ਰੀ ਓਮਕਾਰੇਸ਼ਵਰ ਮੰਦਰ, ਉਖੀਮਠ ਵਿਖੇ ਬਦਰੀਨਾਥ-ਕੇਦਾਰਨਾਥ ਮੰਦਰ ਕਮੇਟੀ ਦੇ ਪ੍ਰਧਾਨ ਅਜੇਂਦਰ ਅਜੈ ਦੀ ਮੌਜੂਦਗੀ 'ਚ ਆਯੋਜਿਤ ਇਕ ਧਾਰਮਿਕ ਸਮਾਰੋਹ 'ਚ ਕਪਾਟ ਖੋਲ੍ਹਣ ਦੀ ਤਰੀਕ ਤੈਅ ਕੀਤੀ ਗਈ। 5 ਮਈ ਨੂੰ ਪੰਚਕੇਦਾਰ ਗੱਦੀ ਸਥਾਨ ਸ਼੍ਰੀ ਓਮਕਾਰੇਸ਼ਵਰ ਮੰਦਿਰ ਉਖੀਮਠ ਵਿਖੇ ਭੈਰਵ ਨਾਥ ਜੀ ਦੇ ਨਾਲ ਭਗਵਾਨ ਕੇਦਾਰਨਾਥ ਦੀ ਪੰਚਮੁਖੀ ਭੋਗ ਮੂਰਤੀ ਦੀ ਪੂਜਾ ਕੀਤੀ ਜਾਵੇਗੀ। ਪੰਚਮੁਖੀ ਡੋਲੀ 6 ਮਈ ਨੂੰ ਸ਼੍ਰੀ ਕੇਦਾਰਨਾਥ ਧਾਮ ਲਈ ਰਵਾਨਾ ਹੋਵੇਗੀ। ਡੋਲੀ ਵੱਖ-ਵੱਖ ਮੁਕਾਮਾਂ ਤੋਂ ਲੰਘ ਕੇ 9 ਮਈ ਸ਼ਾਮ ਨੂੰ ਕੇਦਾਰਨਾਥ ਧਾਮ ਪਹੁੰਚੇਗੀ। ਇਸ ਤੋਂ ਬਾਅਦ 10 ਮਈ ਨੂੰ ਚਾਰਧਾਮ ਯਾਤਰਾ 2024 ਲਈ ਰਸਮਾਂ ਨਾਲ ਕੇਦਾਰਨਾਥ ਧਾਮ ਦੇ ਦਰਵਾਜ਼ੇ ਖੋਲ੍ਹੇ ਜਾਣਗੇ।