ସମ୍ବଲପୁର:ଯୁବ ଉଦ୍ଭିଦ ବିଜ୍ଞାନୀଙ୍କ ନୂଆ ଆବିଷ୍କାର । କଳା ହଳଦୀରୁ ଜୈବିକ ବ୍ୟାଟେରୀ ତିଆରି କଲେ ସମ୍ବଲପୁରର ଯୁବ ଉଦ୍ଭିଦ ବିଜ୍ଞାନୀ ଦିବ୍ୟରାଜ ବେରିହା l ନିଜେ ଚାଷ କରିଥିବା କଳା ହଳଦୀରୁ ସେ ଏହି ଜୈବିକ ବ୍ୟାଟେରୀ ତିଆରି କରି ପୁଣି ଚର୍ଚ୍ଚାକୁ ଆସିଛନ୍ତି । ମୁଖ୍ୟତଃ ଆମେ ବ୍ୟବହାର କରୁଥିବା ବ୍ୟାଟେରୀର ଇଲେକ୍ଟ୍ରୋଲାଇଟ ପରିବେଶ ପାଇଁ ଭଲ ହୋଇନଥିବା ବେଳେ ଏହାକୁ ମାଟିରେ ମିଶିବାକୁ 300 ବର୍ଷ ଲାଗିଥାଏ ବୋଲି କୁହାଯାଏ ଓ ଏହା ପରିବେଶ ପାଇଁ କ୍ଷତିକାରକ ମଧ୍ୟ l ତେଣୁ ଏହାର ବିକଳ୍ପ ଖୋଜିବା ପାଇଁ ଅନୁସନ୍ଧାନ ଓ ଗବେଷଣା କରୁ କରୁ ସମ୍ବଲପୁରର ଯୁବ ବୈଜ୍ଞାନିକ ଦିବ୍ୟରାଜ ବେରିହା ତିଆରି କରିଛନ୍ତି ଜୈବିଜ ବ୍ୟାଟେରୀ । ଯାହାକୁ କଳା ହଳଦୀରୁ ତିଆରି କରିଛନ୍ତି ।
ପୂର୍ବରୁ ସେ କଳା ହଳଦୀ, କାଶ୍ମୀରୀ କେଶର, କଳା ଧାନ ସମ୍ବଲପୁରରେ ନିଜ ଫାର୍ମରେ ଉତ୍ପାଦନ କରି ଚର୍ଚ୍ଚାରେ ଥିବା ବେଳେ ଏବେ ଜୈବିଜ ବ୍ୟାଟେରୀ ତିଆରି କରି ଚର୍ଚ୍ଚା ସାଉଁଟୁଛନ୍ତି l କ୍ଷତିକାରକ ରାସାୟନିକ ଇଲେକ୍ଟ୍ରୋଲାଇଟ ବ୍ୟବହାର ବଦଳରେ ସେ କଳା ହଳଦୀ ଓ ଏକ ଜୈବିକ ମିଶ୍ରଣକୁ ନେଇ ପ୍ରସ୍ତୁତ ଇଲେକ୍ଟ୍ରୋଲାଇଟ ବ୍ୟବହାର କରି ଏହି ବ୍ୟାଟେରୀ ତିଆରି କରିଛନ୍ତି l ଏହା ରାସାୟନିକ ଶକ୍ତିକୁ ବୈଦ୍ୟୁତିକ ଶକ୍ତିରେ ପରିବର୍ତ୍ତନ କରି ଶକ୍ତି ପ୍ରଦାନ କରୁଛି l ବର୍ତ୍ତମାନ ସାଧାରଣ ଖୋଳରେ ସେ ଏହି ଜୈବିକ ମିଶ୍ରଣ ଭର୍ତ୍ତି କରି ବ୍ୟାଟେରୀ ପ୍ରସ୍ତୁତ କରୁଥୁବା ବେଳେ ଆଗାମୀ ଦିନରେ ଵୟୋ ପ୍ଲାଷ୍ଟିକ କଭର ବ୍ୟବହାର କରିବାକୁ ଲକ୍ଷ୍ୟ ରଖିଥିବା କଥା କହିଛନ୍ତି । ଏହି ଜୈବିକ ବ୍ୟାଟେରୀ ମଧ୍ୟରେ ବର, ପିପଲ ଜାତୀୟ କିଛି ମଞ୍ଜି ସଂରକ୍ଷିତ କରି ରଖାଯାଇଛି l ଏହି ବ୍ୟାଟେରୀକୁ ବ୍ୟବହାର କରିବା ପରେ ଯେବେ ବ୍ୟାଟେରୀକୁ ଫିଙ୍ଗି ଦିଆଯିବ ସେତେବେଳେ ସେଥିରେ ଥିବା ମଞ୍ଜିରୁ ଗଛ ଉଠିବ ଓ ତାହା ସବୁଜ ପରିବେଶ ସୃଷ୍ଟି କରିବ ବୋଲି ସେ ଆଶା ରଖିଛନ୍ତି l