ରାୟଗଡ଼ା:ଦୃଢ ଇଚ୍ଛାଶକ୍ତି ଆଗରେ ସବୁ କିଛି ହାର ମାନିଛି । ନା ଅଭାବ ଅନଟନ ନା ସାଂସାରିକ ଜଞ୍ଜାଳ । ସେ ଜଣେ ଅଭାବୀ ଚାଷୀ ପରିବାରର ପୁଅ, ଜଣେ ଦାଦନ ଶ୍ରମିକ ଓ ୨ଟି ସନ୍ତାନର ପିତା । କଠିନ ପରିଶ୍ରମ କରି ଡାକ୍ତରୀ ପ୍ରବେଶିକା ପରୀକ୍ଷା ନିଟ୍ (NEET)ରେ ଦୁଇ ଦୁଇ ଥର ଉତ୍ତୀର୍ଣ୍ଣ ହୋଇଛନ୍ତି । ଏହି ସଫଳତା ପାଇଁ ବାଃ ବାଃ ସାଉଣ୍ଟିଛନ୍ତି ରାୟଗଡ଼ା ଜିଲା ବିଷମକଟକ ବ୍ଲକ୍ ଥୁଆପାଡ଼ି ପଞ୍ଚାୟତ ଥୁଆପଡି ଗାଁର ଅଧିବାସୀ କୃଷ୍ଣଚନ୍ଦ୍ର ଅଟକ । ୨୦୨୦ ମସିହା କୋଭିଡ ସମୟରେ ମନ ଦେଇ ପାଠ ପଢିବା ପରେ ସେ ଆଜି ହୋଇପାରିଛନ୍ତି ଡାକ୍ତରୀ ଛାତ୍ର ।
ବୟସ ସାମାନ୍ୟ ଅତିକ୍ରାନ୍ତ ହୋଇଥିଲେ ସୁଦ୍ଧା କୃଷ୍ଣଙ୍କ ଇଚ୍ଛାଶକ୍ତି ଆଗରେ ସମସ୍ତ ଦାରିଦ୍ରତା ଯେପରି ଫେଲ୍ ମାରିଛି । ଆଉ କିଛି ବର୍ଷ ପରେ ସେ ଜଣେ ସଫଳ ଡାକ୍ତର ହୋଇ ଆଦିବାସୀ ଅଞ୍ଚଳକୁ ଫେରିବା ପାଇଁ ଆଶା ରଖିଛନ୍ତି । ଆର୍ଥିକ ସ୍ଥିତି ଦୁର୍ବଳ ଥିବାରୁ ଦାଦନ ଖଟିବାକୁ କେରଳ ଚାଲିଯାଇଥିବା ଦାଦନ ଶ୍ରମିକ କୋଭିଡ ସମୟରେ ଘରେ ରହି ଅନଲାଇନ ପଢି ନିଟ ପାସ୍ କରି ଡାକ୍ତରୀ ପଢିବାକୁ ସକ୍ଷମ ହୋଇଛନ୍ତି ଅଭାବୀ ଆଦିବାସୀ ଯୁବକ କୃଷ୍ଣଚନ୍ଦ୍ର । ପିଲାଟି ବେଳୁ ଆର୍ଥିକ ଅଭାବ ଅନଟନର ଶିକାର ହୋଇ ମଧ୍ୟ ପାଠପଢ଼ାରେ ରୁଚି ରଖିଥିବା କୃଷ୍ଣ ଶେଷରେ ଆଜି ସଫଳ ହୋଇଛନ୍ତି ।
କୃଷ୍ଣଙ୍କ ସଂଘର୍ଷମୟ ଜୀବନ:-୨୦୦୬ ମସିହାରେ ଆମ୍ବଦୋଲାରେ ଏକ ଆଦିବାସୀ ଆବାସିକ ବିଦ୍ୟାଳୟର ମ୍ୟାଟ୍ରିକ ପାସ୍ କରିବା ପରେ ୨୦୦୮ ମସିହାରେ ଏକ ସ୍ବେଚ୍ଛାସେବୀ ଅନୁଷ୍ଠାନ ସହାୟତାରେ ଖଲିକୋଟ କଲେଜରେ ଯୁକ୍ତ ଦୁଇ ପଢିବା ପରେ ପୁଣି ପାଠପଢ଼ାରେ ଡୋରି ଲାଗିଥିଲା । ପିତାମାତାଙ୍କ ସହିତ କୃଷି କାର୍ଯ୍ୟରେ ନିୟୋଜିତ ହେଲେ । କିନ୍ତୁ ଅଧିକା ପାଠ ପଢ଼ିବା ପାଇଁ କୃଷି କାର୍ଯ୍ୟରେ ସମର୍ଥ ନହେବା ଜାଣି ସେ ୨୦୧୦ ମସିହାରେ ଦାଦନ ଖଟିବାକୁ କେରଳ ରାଜ୍ୟକୁ ଚାଲି ଯାଇଥିଲେ । ସେଠାରେ ୨ ବର୍ଷ ରହିବା ପରେ ସୁଧିରିଲାନି ଆର୍ଥିକ ସ୍ଥିତି । ପୁଣି ଘରକୁ ଫେରି କୃଷି କାର୍ଯ୍ୟରେ ନିୟୋଜିତ ରହି ପାଠପଢାରେ ଧ୍ୟାନ ଦେଲେ । ୨୦୧୮ ମସିହାରେ ତାଙ୍କର ବାହାଘର ହୋଇଥିଲା ଓ ସେ ଏବେ ୨ଟି ସନ୍ତାନର ଜନକ ।
୨୦୨୦ରୁ ଆରମ୍ଭ ହୋଇଥିଲା ପ୍ରସ୍ତୁତି:-ପାଠ ପଢ଼ିବାର ଅଦମ୍ୟ ଇଛାଶକ୍ତି ଯୋଗୁଁ ପ୍ରାୟ ୧୩ ବର୍ଷ ପରେ ଅର୍ଥାତ ୨୦୨୦ ମସିହାରେ କୋଭିଡ ପାଇଁ ବାହାରକୁ ନ ବାହାରି ଘରେ ରହି ଅନଲାଇନରେ ନିଟ୍ ପାଇଁ ପ୍ରସ୍ତୁତ ହୋଇଥିଲେ । ଏହାପରେ ଗତ ବର୍ଷ ୨୦୨୨ ନିଟ ପରୀକ୍ଷାରେ କୃତକାର୍ଯ୍ୟ ହୋଇଥିଲେ । ହେଲେ ପୁଣି ପ୍ରତିବନ୍ଧକ ସାଜିଥିଲା ଅର୍ଥ ସାଙ୍ଗକୁ ଆବଶ୍ୟକ କାଗଜପତ୍ର । ହାର ନମାନି ପୁଣି ଚେଷ୍ଟା କରି ଚଳିତ ନିଟ ପରୀକ୍ଷାରେ ପାସ୍ କରି କଳାହାଣ୍ଡି ଭବାନୀପାଟଣା ମେଡିକାଲ କଲେଜର ଆଡିମିସନ୍ ନେଇଛନ୍ତି । ପିତା ବଇଦ ଅଟକାଙ୍କ ସରକାରଙ୍କଠାରୁ ପାଇଥିବା ଏକର,୭୧ ସେଣ୍ଟ ଜମିରେ ଚାଷକରି ୪ ପୁଅ ଓ ଜଣେ ଝିଅଙ୍କ ସହିତ ପରିବାର ପୋଷଣ କଷ୍ଟକର ହୋଇଥିଲେ ସୁଧା ପୁଅକୁ ଡାକ୍ତର କରାଇ ବହୁତ ଖୁସି ଅନୁଭବ କରୁଛନ୍ତି ପିତା, ପରିବାର ବର୍ଗ ଓ ଗ୍ରାମବାସୀ ।