ସ୍ବାଭିମାନ ଅଞ୍ଚଳରେ ବିଜୟ ଦିବସ ପାଳିତ ମାଲକାନଗିରି: ଗତ ୨୦୨୦ ମସିହାରେ ୨୫ ଜାନୁଆରୀ ମଧ୍ୟରାତ୍ରୀରେ ଚିତ୍ରକୋଣ୍ଡା ବ୍ଲକର ସ୍ବାଭିମାନ ଅଞ୍ଚଳର ଗ୍ରାମବାସୀ ପ୍ରଥମ ଥର ପାଇଁ ଲାଲ ଆତଙ୍କବାଦ ବିରୋଧରେ ବିଦ୍ରୋହ ଆରମ୍ଭ କରିଥିଲେ । ଜାନୁଆରୀ ୨୫ ମଧ୍ୟରାତିରେ ଜୋଡମ୍ବୋ, ଜନ୍ତୁରାୟ ଏବଂ ସିନ୍ଧିବାଡିର ସ୍ଥାନୀୟ ଗ୍ରାମବାସୀ ମାଓବାଦୀଙ୍କ ପ୍ରତି ଭୟ ଛାଡି ଏକ ମାଓବାଦୀ ଦଳ ଉପରେ ଆକ୍ରମଣ କରିଥିଲେ । ନକ୍ସଲ ଏବଂ ଗ୍ରାମବାସୀଙ୍କ ଯୁଦ୍ଧରେ ନକ୍ସଲ ପରାସ୍ତ ହୋଇଥିଲେ । ଏନେଇ ବୁଧବାର ସ୍ବାଭିମାନ ଅଞ୍ଚଳର ଜନ୍ତୁରାଇରେ ବିଜୟ ଦିବସ ପାଳିତ ହୋଇଛି ।
ସୂଚନାଯୋଗ୍ୟ ଯେ, ମାଓବାଦୀମାନେ ଗ୍ରାମବାସୀଙ୍କୁ ବନ୍ଧୁକ ମୁନରେ ଆତଙ୍କିତ କରିବାକୁ ଚେଷ୍ଟା କରୁଥିଲେ । ଗ୍ରାମବାସୀ ଏବଂ ମାଓବାଦୀଙ୍କ ଲଢେଇରେ କୁଡୁମୁଲୁଗୁମ୍ମା ଏରିଆ କମିଟିର ସଦସ୍ୟ ତଥା ମାଓବାଦୀ କ୍ୟାଡର ଆଡମା ମୃତ୍ୟୁବରଣ କରିଥିଲେ ଏବଂ ଅନ୍ୟ ଜଣେ ମାଓ ସଂଗଠନରର ଏସିଏମ କ୍ୟାଡର ଜିପ୍ରୋକୁ ଗ୍ରାମବାସୀମାନେ କାବୁ କରି ପୋଲିସକୁ ହସ୍ତାନ୍ତର କରିଥିଲେ । ଏହାର ପ୍ରତିଶୋଧ ନେଇ ମାଓ ସଂଗଠନର ସିସିଏମ ଉଦୟ ଏବଂ ଏସଜେଡସିଏମ କୃଷ୍ଣ ସାରଥିଙ୍କ ନେତୃତ୍ୱରେ ଆନ୍ଧ୍ର-ଓଡିଶା ସ୍ବତନ୍ତ୍ର ବଡର ଜୋନାଲ କମିଟି ଓ ମାଲକାନଗିରି-କୋରାପୁଟ ବଡର ଡିଭିଜନର ମାଓବାଦୀମାନେ ଉପରୋକ୍ତ ତିନୋଟି ଗାଁର ଲୋକଙ୍କୁ ଆକ୍ରମଣ କରି ସେମାନଙ୍କ ଘର ଏବଂ ମୋଟର ସାଇକେଲଗୁଡିକରେ ନିଆଁ ଲଗାଇ ଦେଇଥିଲେ ।
କିନ୍ତୁ ଗ୍ରାମବାସୀମାନେ ବିନା ଭୟରେ ମାଓବାଦୀଙ୍କ ପ୍ରତିରୋଧ ଜାରି ରଖିଥିଲେ । ଏହି ଘଟଣା ସ୍ବାଭିମାନ ଅଞ୍ଚଳର ବାକି ଗାଁର ଲୋକଙ୍କ ମଧ୍ୟରେ ଆତ୍ମବିଶ୍ୱାସ ସୃଷ୍ଟି କରିଥିଲା । ଧୀରେଧୀରେ ସେମାନେ ସିପିଆଇ ମାଓବାଦୀ ବିରୋଧରେ ସ୍ୱର ଉତ୍ତୋଳନ କଲେ । ମୂଳ ଅଞ୍ଚଳରେ ନୂତନ ସୁରକ୍ଷା ଶିବିର ପ୍ରତିଷ୍ଠା କରି ଏହି ଅଞ୍ଚଳରେ ମାଓବାଦୀଙ୍କ ପ୍ରଭାବକୁ ଦୂର କରିବା ପାଇଁ ଓଡିଶା ପୋଲିସ୍ ଏବଂ ପାରା-ସାମରିକ ବାହିନୀର ନିରନ୍ତର ପ୍ରୟାସର ଫଳାଫଳ ଏହା ଥିଲା । ସ୍ଥାନୀୟ ଲୋକଙ୍କ ଉନ୍ନତି ପାଇଁ ଓଡିଶା ସରକାର ଲଗାତାର ବିକାଶ ଧାରା ଜାରି ରଖିଛନ୍ତି । ଆଜିର ଦିନରେ ଅସତ୍ୟକୁ ହରାଇ ସତ୍ୟର ଜୟ ହୋଇଥିବାରୁ ଏହି ଗ୍ରାମର ଲୋକମାନେ ଜାତୀୟ ପତାକା ଉତ୍ତୋଳନ କରି ବିଜୟ ଦିବସ ପାଳନ କରିଛନ୍ତି ।
ଏହି ବିଜୟ ଦିବସ ସୂର୍ଯ୍ୟ ଚନ୍ଦ୍ର ଥିବା ପର୍ଯ୍ୟନ୍ତ ପାଳନ କରାଯିବ ବୋଲି ଗ୍ରମବାସୀ କହିଥିଲେ । ନକ୍ସଲଙ୍କୁ ଧରାଶାୟୀ କରିବା ସହ ଜଣେ ଲୋକଙ୍କୁ ବି ନକ୍ସଲ ହତ୍ୟା କରିପାରିନଥିଲେ । ରାଗରେ ଘର ଜାଳିଲେ, କିନ୍ତୁ ଲୋକଙ୍କୁ ଟାର୍ଗେଟ କରିପାରିନଥିଲେ । ତେବେ ଏହି ମାଓବାଦୀ ବିରୋଧୀ ସଂଗଠନ ଆଗକୁ ମଧ୍ୟ ସୁଦୃଢ ହୋଇ ମାଓବାଦୀ ବିରୋଧରେ ଲଢେଇ ଜାରି ରଖିବ ବୋଲି କୁହାଯାଇଛି । ଦୀର୍ଘ ବର୍ଷ ପରେ ମାଓବାଦୀ ବିରୋଧରେ ସେମାନଙ୍କ ଗଡରେ ତାଙ୍କୁ ହରାଇବା ଏତେ ସହଜ ନଥିଲା ବୋଲି ଗ୍ରାମବାସୀ ଆଜି ପତାକା ତଳେ କହିଥିଲେ । ଏହି ବିଜୟ ସମସ୍ତ ସ୍ବାଭିମାନ ଅଞ୍ଚଳବାସୀଙ୍କର ବୋଲି କୁହାଯାଇଥିଲା । ଏହି କାର୍ଯ୍ୟକ୍ରମରେ ପେପରମେଟଲା ଓ ଯଡାମ୍ବ ପୋଲିସ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ ।
ଇଟିଭି ଭାରତ, ମାଲକାନଗିରି
