ନିଆଳି: ମଦ ନିଶାରେ ମାତାଲ ହୋଇ ରୋଗୀ ଚିକିତ୍ସା କରୁଛନ୍ତି ଡାକ୍ତର । ଏପରିକି ତାଙ୍କ ଆଲମାରି ଥାକରେ ମଧ୍ୟ ମଦ ବୋତଲ ରଖା ହୋଇଥିବା ଦେଖିବାକୁ ମିଳିଛି । ଏତେ ମଦ ପିଇଛନ୍ତି ଯେ, ଠିକରେ ଛିଡ଼ା ମଧ୍ୟ ହୋଇ ପାରୁନାହାନ୍ତି । ଏନେଇ ପଚାରିବାରୁ ରୋଗୀଙ୍କୁ ଖରାପ ବ୍ୟବହାର ମଧ୍ୟ କରିଛନ୍ତି ଡାକ୍ତର । ଏହାର ଭିଡିଓ ଉତ୍ତୋଳନ ସହ ଥାନାରେ ଅଭିଯୋଗ କରିଛନ୍ତି ଚିକିତ୍ସା ପାଇଁ ଯାଇଥିବା ବ୍ୟକ୍ତି । ଖୋର୍ଦ୍ଧା ଜିଲ୍ଲା ବାଲିପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା । ମଦୁଆ ଡାକ୍ତର ଜଣଙ୍କ ବାଲିପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କାର୍ଯ୍ୟରତ ଡାକ୍ତର ଶ୍ରୀମୟ ମିଶ୍ର ।
ମିଳିଥିବା ସୂଚନା ଅନୁସାରେ, ଗୁରୁବାର ବିଳମ୍ବିତ ରାତି ପ୍ରାୟ ୧୧.୩୦ରେ କୁଳନ୍ତିରା ଗ୍ରାମର ସମ୍ବିତ ରାୟ ଓ ତାଙ୍କ ପତ୍ନୀ ଅସୁସ୍ଥ ପୁଅକୁ ନେଇ ବାଲିପାଟଣା ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରକୁ ଆସିଥିଲେ । ଡାକ୍ତର ଶ୍ରୀମୟ ମିଶ୍ର ସେଠାରେ ଡ୍ୟୁଟିରେ ଥିଲେ । କିନ୍ତୁ ସମ୍ବିତ ତାଙ୍କୁ ଡାକିବାର ୩୦ ମିନିଟ୍ ପର୍ଯ୍ୟନ୍ତ ମଧ୍ୟ ରୁମ୍ ଭିତରୁ ବାହାରି ନଥିଲେ ଡାକ୍ତର ବାବୁ । ରୁମ୍ରୁ ଓପିଡିକୁ ବାହାରିବା ବେଳକୁ ସେ ନିଶାରେ ଚୁର୍ ଥିଲେ । ମଦ ପିଇବାକୁ ନେଇ ସମ୍ବିତ ପ୍ରତିବାଦ କରିବାରୁ ତାଙ୍କୁ ଅସଭ୍ୟ ବ୍ୟବହାର କରିଥିଲେ ଡାକ୍ତର । ପରେ ସମ୍ବିତ ତାଙ୍କ ପୁଅକୁ ସେଠାରୁ ଅନ୍ୟ ଡାକ୍ତରଖାନାକୁ ନେଇ ଚିକିତ୍ସା କରାଇଥିଲେ ।