ଆନନ୍ଦପୁର: ଭଳିକି ଭଳି ମନଲୋଭା ଧୋତି, ଶାଢୀ ଓ ଚଦର । ଏଠାକାର କଟିଆ ଚଦର ତଥା ମଠା ଶାଢୀର ରହିଛି ବେଶ ଆଦର । ୩ ଶହରୁ ଉର୍ଦ୍ଧ୍ବ ବୁଣାକାରଙ୍କ ଏହା ଜୀବନ ଜୀବିକା । ହେଲେ କୋରୋନା ପାଇଁ ହୋଇଥିବା ଲକଡାଉନ ପ୍ରଭାବରେ ଏବେ ଦୁଃଖରେ ବୁଣାକାର ପରିବାର । ଟସର କୋସା ସଂଗ୍ରହରୁ ଆରମ୍ଭ କରି ବୁଣା ସାମଗ୍ରୀ ବିକ୍ରୀବଟା ପାଇଁ ଏବେ ଅସୁବିଧା ଭୋଗ କରୁଛନ୍ତି ବୁଣାକାର ।
ଆନନ୍ଦପୁର ବୁଣାକାର ସମ୍ପ୍ରଦାୟ
କେନ୍ଦୁଝର ଜିଲ୍ଲା ଆନନ୍ଦପୁର ପୌରପରିଷଦ ଅନ୍ତର୍ଗତ ଫକୀରପୁର ବଙ୍ଗାଳୀସାହି । ଆଖି ଝଲସିଯିବା ଭଳି ଟସର ସାମଗ୍ରୀ ହାତରେ ବୁଣିବାରେ ସିଦ୍ଧହସ୍ତ ଏଠାକାର ବୁଣାକାର । ଏଠାରେ ହସ୍ତତନ୍ତ ଦ୍ବାରା ଟସର ସୂତାରୁ ଅତି ମସୃଣ, ହାଲୁକା ତଥା ସୁନ୍ଦର କପଡା ବୁଣାଯାଏ । ନିଜ ସୃଜନଶୀଳତାର ପରିପ୍ରକାଶ କରି ଟସରରୁ ମନଲୋଭା ଧୋତି, ଶାଢୀ ଓ ଚାଦର ତିଆରି କରିଥାନ୍ତି ବୁଣାକାର । ହେଲେ ଏବେ ଲକ ଡାଉନ ଯୋଗୁଁ ବୁଣା ପାଇଁ ଟସର କୋସା ଅଭାବ ହେଉଥିବା ବେଳେ ଉତ୍ପାଦିତ ସାମଗ୍ରୀ ବାହାରକୁ ଯାଇ ପାରୁ ନଥିବାରୁ ନାନା ସମସ୍ୟା ଦେଇ ଗତି କରୁଛନ୍ତି ବୁଣାକାର ସମୁଦାୟ।