କେନ୍ଦ୍ରାପଡା: ତାଳଚୁଆ ଥାନା ଅଧିନରେ ରହୁଥିବା ତିନିଜଣ ପ୍ରମୁଖ ବ୍ୟବସାୟୀଙ୍କ ଘରେ ଆୟକର ବିଭାଗ(Income Tax Raid in Talachua)ର ଚଢ଼ାଉ । ଚଢାଉକୁ ୪୮ ଘଣ୍ଟା ବିତିଯାଇଥିଲେ ମଧ୍ୟ ଆକଳନ କରି ହେଉନାହିଁ ସମ୍ପତ୍ତି । ଗୋଟିଏ ପରେ ଗୋଟିଏ ସ୍ଥାନରୁ ବାହାରୁଛି ପୁଳା ପୁଳା ଟଙ୍କା। ଯାହା ଦେଖି ତାଜୁବ ଆୟକର ବିଭାଗ । ୩୦ ରୁ ଉର୍ଦ୍ଧ୍ବ କର୍ମଚାରୀ ଚଢ଼ାଉରେ ସାମିଲ ହୋଇଥିଲେ ମଧ୍ୟ ବର୍ତ୍ତମାନ ପର୍ଯ୍ୟନ୍ତ କେତେ ସମ୍ପତ୍ତି ଜବତ ହୋଇଛି ସେନେଇ ସୂଚନା ହସ୍ତଗତ ହୋଇ ନାହିଁ। ୩୦ ରୁ ଉର୍ଦ୍ଧ୍ବ କର୍ମଚାରୀ ଚଢ଼ାଉରେ ସାମିଲ ହୋଇଥିଲେ ମଧ୍ୟ ବର୍ତ୍ତମାନ ପର୍ଯ୍ୟନ୍ତ କେତେ ସମ୍ପତ୍ତି ଜବତ ହୋଇଛି ସେନେଇ ନେଇ କେହିବି ମୁହଁ ଖୋଲୁନାହାନ୍ତି ।
ମିଳିଥିବା ସୂଚନା ଅନୁଯାୟୀ, ବୁଧବାର ବଡ଼ି ଭୋରୁ ଆୟକର ବିଭାଗ କେନ୍ଦ୍ରାପଡାରେ ଏହି ତିନି ବ୍ୟବସାୟୀଙ୍କ ଘରେ ଚଢାଉ କରିଥିଲା । କିନ୍ତୁ ବର୍ତ୍ତମାନ ପ୍ରଯ୍ୟନ୍ତ ଚଢାଉ ଜାରି ରହିଛି । ରାଜନଗର ବ୍ଲକ ତାଳଚୁଆର ବ୍ୟବସାୟୀ ମଦନ ଦେବନାଥ, ଅମଲ ପ୍ରଧାନ ଓ ସୁଜୟ ମଣ୍ଡଳଙ୍କ ଘରେ ଏହି ଚଢ଼ାଉକୁ ବିତିଛି ଦୁଇଦିନ। ଘରେତ ଘରେ ଚାଉଳ ହାଣ୍ଡି, ବହି ରାକ୍, ଗଦି, ଅବ୍ୟବହୃତ କାଗଜ ପେଟିରୁ ମିଳୁଛି ପୁଳାପୁଳା ରଶି ବନ୍ଧା ଯାଇଥିବା ୨ହଜାର, ୫ଶହ, ୨ଶହ ଓ ଶହେ ଟଙ୍କିଆ ବଣ୍ଡଲ । ଏତେ ପରିମାଣରେ ଟଙ୍କା ଗଚ୍ଛିତ ଦେଖି ଆୟକର ବିଭାଗର ଆଖି ଖୋସି ହୋଇ ଯାଇଥିବା ବେଳେ ରାଜ୍ୟର ବିଭିନ୍ନ ସହର ଓ ଜିଲ୍ଲାରେ ଏକାଧିକ ପ୍ଲଟ୍, ଟ୍ରଲର୍, ଟ୍ରକ୍, ସୌଖିନ୍ ଗାଡି, ମୂଲ୍ୟବାନ ଘରର ତାଲିକା ପ୍ରସ୍ତୁତ କରୁଛି ବିଭାଗ ।
ମଦନ ଦେବନାଥ
ମିଳିଥିବା ସୂଚନା ଅନୁଯାୟୀ, ବ୍ୟବସାୟୀ ମଦନ ଦେବନାଥଙ୍କ ପାଖରୁ ୧୪ଟି ଟୁ ଇନ୍ ୱାନ ଟ୍ରଲର ତାଲିକା ମିଳିଛି । ଯାହାର ଆନୁମାନିକ ମୂଲ୍ୟ ତିନିକୋଟି ଟଙ୍କା । ଏହାଛଡା ମଦନ ଦେବନାଥ "ନିଗମ ମେରାଇନ"ନାମରେ ଚଳାଉଥିବା ସଂସ୍ଥା ନାମରେ ଗୋଟିଏ ୧୪ ଚକିଆ ଟ୍ରକ, ଦୁଇଟି ୧୨ ଚକିଆ, ଛଅଟି ୬ ଚକିଆ ଓ ଦଶଟି ୨ ଚକିଆ ଗାଡି ରହିଛି ବୋଲି ଆୟକର ବିଭାଗ ଜାଣିବାକୁ ପାଇଛି। ଖାଲି ସେତିକି ନୁହେଁ, ମଦନଙ୍କ ନାମରେ ଗୋଟିଏ ବରଫ କଳ ସମେତ ଧାମରା ପୋର୍ଟ, ଭୁବନେଶ୍ୱର, ବାଲେଶ୍ଵର ଓ ତାଳଚୁଆରେ ମୂଲ୍ୟବାନ ସମ୍ପତ୍ତି ରହିଛି । ଏଥିସହ ଗୋଟିଏ ଲ୍ୟାଣ୍ଡ ରୋଭର, ଫର୍ଚ୍ୟୁନର, ଜିପ୍, ଦୁଇଟି ଟ୍ରାକ୍ଟର ଏବଂ ଗୋଟିଏ ଦାମୀ ବାଇକ୍ ସମେତ ସେ ବାର୍ଷିକ ୪ଶହ କୋଟି ଟଙ୍କାର କାରବାର କରୁଥିବା ଜାଣିବାକୁ ପାଇଛି ଆୟକର ବିଭାଗ।