ଢେଙ୍କାନାଳ :ଢେଙ୍କାନାଳ ବନଖଣ୍ଡରୁ କଲରପତରିଆ ବାଘର ମୃତଦେହ ଠାବ ହୋଇଛି । ହିନ୍ଦୋଳ ବନାଞ୍ଚଳ ଅନ୍ତର୍ଗତ ଦୁଦୁରୁକୋଟ ଗ୍ରାମ ନିକଟରେ ଏହି କଲରାପତରିଆ ବାଘର ମୃତଦେହ ପଡ଼ିଥିଲା । ଦୁଦୁରୁକୋଟ ବାରିହା ରଗଡି ଗ୍ରାମ୍ୟ ଜଙ୍ଗଲରେ ଏକ ବାଘ ମୃତ ଅବସ୍ଥାରେ ପଡିଥିବା ସୂଚନାପାଇ ବନକର୍ମଚାରୀ ଘଟଣାସ୍ଥଳରେ ପହଞ୍ଚିଥିଲେ । ସେଠାରେ ଏକ ବୁଦା ମୂଳରେ ଏକ ବାଘଟି ମୃତ ଅବସ୍ଥାରେ ପଡ଼ିଥିବା ଦେଖିବାକୁ ପାଇଥିଲେ ।
ଭୁବନେଶ୍ୱରରୁ ବିଶେଶଜ୍ଞ ଟିମ୍ ମଧ୍ୟ ତଦନ୍ତ ପାଇଁ ଘଟଣାସ୍ଥଳରେ ପହଞ୍ଚିଛି ବୋଲି ଜିଲ୍ଲା ବନଖଣ୍ଡ ଅଧିକାରୀ ପ୍ରକାଶ ଗୋଗି ନେନୀ ସୂଚନା ଦେଇଥିଲେ । ତେବେ ମୃତ ବାଘର ବୟସ କେତେ ଓ ମୃତ୍ୟୁର କାରଣ କ'ଣ ତାହା ସଠିକ ଭାବେ ଜଣାପଡିନାହିଁ । ତେବେ ବାଘଟି ଏକ ଫାଶରେ ପଡ଼ି ତାର ମୃତ୍ୟୁ ହୋଇଥିବା ସନ୍ଦେହ କରାଯାଉଛି । ବାଘର ମୃତ୍ୟୁକୁ ନେଇ ବନ ବିଭାଗର ସୁରକ୍ଷା ଉପରେ ପ୍ରଶ୍ନବାଚୀ । ସେହିପରି ଶିମିଳିପାଳରୁ ସୋମବାର ଏକ ବାଘ ଛୁଆର ମୃତଦେହ ଉଦ୍ଧାର କରାଯାଇଛି । ବାଘ ଛୁଆଟି Leopard Cat ପ୍ରଜାତିର ହୋଇଥିବା ବନ ବିଭାଗ ପକ୍ଷରୁ ସୂଚନା ମିଳିଛି ।
ନିକଟରେ ସମ୍ବଲପୁରରେ ମଧ୍ୟ ବାରହା ଶିକାର ପାଇଁ ବିଦ୍ୟୁତ ତାର ବିଛାଯାଇଥିଲା । ହେଲେ ଏଥିରେ ବାରାହା ନଫଶି ଫସିଥିଲା ହାତୀ । ଫଳରେ ହାତୀଟିର ମୃତ୍ୟୁ ହୋଇଥିଲା । ସମ୍ବଲପୁର ସଦର ରେଞ୍ଜରୁ ହାତୀର ମୃତଦେହ ଠାବ ହେବାପରେ ଜଣାପଡ଼ିଛି ଏହାର ମୃତ୍ୟୁର ରହସ୍ୟ । ଏହି ଘଟଣାରେ ବନବିଭାଗ ୩ଜଣଙ୍କୁ ଗିରଫ କରିଛି ।