ଢେଙ୍କାନାଳ: ତେଜିବାରେ ଲାଗିଛି ଆଇଜିଆଇଟି, ସରାଙ୍ଗରେ ଛାତ୍ରୀଙ୍କ ଅସଦାଚରଣ ମାମଲା । ଯାହାକୁ ଭିନ୍ନ ମୋଡ ଦେବାକୁ ଯାଇ ନୂଆ କାହାଣୀ ତିଆରି କରିଛନ୍ତି ଅଭିଯୁ୍କ୍ତ ଆକାଉଣ୍ଟାଣ୍ଟ ଅଫିସର । ଘଟଣାକୁ ନେଇ ପଚରାଯିବାରୁ ସମ୍ପୃକ୍ତ ଛାତ୍ରୀ ଜଣଙ୍କ ତାଙ୍କ ସମ୍ପର୍କୀୟ ବୋଲି ସଫେଇ ଦେଇଛନ୍ତି ସେ । ଅନ୍ୟପଟେ ଅଭିଯୁକ୍ତଙ୍କ ବହିଷ୍କାର ଦାବି ସହ 4ଟି ଦାବି ନେଇ ଅଧ୍ୟକ୍ଷଙ୍କ ପାଖରେ ଫେରଦ ହୋଇଛନ୍ତି ଅନ୍ୟ ସହକର୍ମଚାରୀ ।
ସୂଚନା ଅନୁଯାୟୀ ଗତ 22 ତାରିଖରେ ଇନ୍ଦିରା ଗାନ୍ଧୀ ବୈଷୟିକ ଶିକ୍ଷା ପ୍ରତିଷ୍ଠାନରେ ଆସିଥିଲା ଛାତ୍ରୀଙ୍କୁ ଅସଦାଚରଣ ଭଳି ଏକ ସଙ୍ଗୀନ ଅଭିଯୋଗ । ପଦାରେ ପଡିଥିଲା କଲେଜର ଡିପ୍ଲୋମା ପ୍ରଥମ ବର୍ଷର ଜଣେ ଛାତ୍ରୀଙ୍କ ସହ କଲେଜର ଆକାଉଣ୍ଟାଣ୍ଟଙ୍କ ସମ୍ପର୍କ । ଏହାର ଠିକ ପରେ ଛାତ୍ରୀ ଜଣଙ୍କ ହଷ୍ଟେଲରୁ ହଠାତ୍ ଚାଲିଯିବା ଓ ବିନା ନୋଟିସରେ ଆକାଉଣ୍ଟାଣ୍ଟଙ୍କ କଲେଜରୁ ଛୁଟି ନେବା କଥା ନିଆଁରେ ଘିଅ ଢାଳିବା ପରି ହୋଇଥିଲା ।
ଘଟଣାରେ ଏବେ ପର୍ଯ୍ୟନ୍ତ ସମ୍ପୃକ୍ତ ଛାତ୍ରୀ ଓ ତାଙ୍କ ପରିବାର ପକ୍ଷରୁ କୌଣସି ଅଭିଯୋଗ ହୋଇନଥିବା ବେଳେ ବୁଧବାର ଘଟଣାରେ ପ୍ରତିକ୍ରିୟା ଦେଇଛନ୍ତି ଅଭିଯୁକ୍ତ ଆକାଉଣ୍ଟାଣ୍ଟ । ଆକାଉଣ୍ଟାଣ୍ଟ ଘଟଣାକୁ ଭିନ୍ନ ରୂପ ଦେବାକୁ ଚେଷ୍ଟା କରୁଥିବା ବେଳେ ସହକର୍ମଚାରୀଙ୍କ କହିବା ଅନୁଯାୟୀ ଏହା କିଛି ନୂଆ ନୁହେଁ । ଏହାପୂର୍ବରୁ ମଧ୍ୟ ଆକାଉଣ୍ଟାଣ୍ଟ ଦେବଦତ୍ତ ପ୍ରଥାନଙ୍କର ଅନେକ ଝିଅଙ୍କ ସହ ସମ୍ପର୍କ ରହିସାରିଛି । ଏନେଇ ଦେବଦତ୍ତଙ୍କ ବହିଷ୍କାର ସହ 4ଟି ଦାବି ନେଇ କଲେଜ ଅଧ୍ୟକ୍ଷଙ୍କ ପାଖରେ ଫେରାଦ ହୋଇଛନ୍ତି ଅନ୍ୟ ସହକର୍ମଚାରୀ ।