କଟକ: କଥାରେ ଅଛି ଡାକ୍ତର ହେଉଛନ୍ତି ଭଗବାନ ସଦୃଶ। ଏକଥା ବି ଅନେକ ବିଶ୍ବାସ ବି କରିଥାଆନ୍ତି। ତେବେ ଗଞ୍ଜାମ ଅଞ୍ଚଳର ପୂଜା ସେଠୀଙ୍କ ପାଇଁ ଭଗବାନ ସାଜିଛନ୍ତି ଡାକ୍ତର। ଆଜ୍ଞା ହଁ । ଆପଣ ଠିକ ଶୁଣିଛନ୍ତି । ନିଆଁ ଲାଗି ପୂଜାଙ୍କ ମୁହଁ, ଛାତିରେ ଲାଗି ଯାଇଥିଲା। ପରିସ୍ଥିତି ଏମିତି ହୋଇଥିଲା କି ପୂଜା ତଳକୁ କେବଳ ଚଟାଣକୁ ଚାହିଁ ବସୁଥିଲେ। ତେବେ ପୂଜା ଭଲ ହେବେ ଆଉ ଚଲବୁଲା କରିପାରିବେ। ଏକଥା ତାଙ୍କ ପରିବାର ଲୋକ କେବେବି କଳ୍ପନା ବି କରିପାରି ନଥିଲେ। ତେବେ ଏସସିବି ପ୍ଲାଷ୍ଟିକ ସର୍ଜରୀ ବିଭାଗର ଡାକ୍ତରଙ୍କ ପାଇଁ ପୂଜା ପାଇଛନ୍ତି ନୂଆ ଜୀବନ।
ଗଞ୍ଜାମ ଆସିକା ବ୍ଲକ ଅନ୍ତର୍ଗତ ବଡଖୋଲି ଗ୍ରାମର କାଳୀ ମନ୍ଦିର ସାହିର ସାନ୍ୟାସୀ ସେଠୀଙ୍କ 14ବର୍ଷର ଏକମାତ୍ର କନ୍ୟା ପୂଜା ସେଠୀ। ୨୦୧୯ ମାର୍ଚ୍ଚ ୧୩ରେ ସନ୍ଧ୍ୟା ସମୟରେ ନିଜ ଠାକୁର ଘରେ ସନ୍ଧ୍ୟା ଦେବା ସମୟରେ ପୋଡି ଯାଇଥିଲେ ପୂଜା। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ଆସ୍କା ହସ୍ପିଟାଲରେ ଓ ପରେ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିଲା। ଏସସିବି ପ୍ଲାଷ୍ଟିକ ସର୍ଜରୀ ବିଭାଗରେ ପ୍ରାୟ ୫ ମାସ ଧରି ଚିକିତ୍ସିତ ହେବା ପରେ ସୁସ୍ଥ ହୋଇ ଘରକୁ ଯାଇଥିଲେ। ପୋଡା ରୋଗ ଗୁରୁତ୍ବର ହେବାରୁ ଧୀରେ ଧୀରେ ପୂଜାଙ୍କ ବେକ ଓ ମୁହଁ ତଳ ଅଂଶ ଛାତିରେ ଲାଗିଯାଇଥିଲା।