କଟକ: ଛତିଶଗଡ ପର୍ଯ୍ୟଟକଙ୍କୁ ମାରପିଟ୍ ଘଟଣା ପରେ ମୁଣ୍ଡଳୀ ଟୋଲ ଗେଟକୁ ଅନିର୍ଦ୍ଦିଷ୍ଟ କାଳ ଯାଏଁ ସିଲ୍ କରାଯାଇଛି । ଟୋଲ ଗେଟରେ ଗୁଣ୍ଡାରାଜ ବଢିଗଲାଣି । ତେଣୁ ଟୋଲ ଗେଟକୁ ସିଲ୍ ନୁହେଁ, ବରଂ ସବୁଦିନ ପାଇଁ ବନ୍ଦ କରାଯାଉ ବୋଲି ଏବେ ଦାବି ଉଠିଛି । ଏଠାରେ ଯାତ୍ରୀଙ୍କ ଠାରୁ ଅଧିକ ଟୋଲ ଟାକ୍ସ ଆଦାୟ କରାଯାଉଛି । ଟୋଲ୍ ଗେଟରେ ପାରି ହେବା ପାଇଁ ୩୦୦ ଟଙ୍କା ବଦଳରେ ୫୦୦ ଟଙ୍କା ଦାବି କରି ଆକ୍ରମଣ ଘଟଣା କେବେବି ଗ୍ରହଣୀୟ ନୁହେଁ । ମାରପିଟ୍ ପରେ ପ୍ରଶାସନ ମୁଣ୍ଡଳୀ ଟୋଲ୍ ଗେଟକୁ ସିଲ୍ କରି ତଦନ୍ତ ଜାରି ରଖିଛି । ତେବେ ଗୁଣ୍ଡାରାଜ ବଢି ଯାଇଥିବାରୁ ମୁଣ୍ଡଳୀରେ ସବୁଦିନ ଲାଗି ଟୋଲ ଟ୍ୟାକ୍ସ ଆଦାୟ ବନ୍ଦ ହେଉ ବୋଲି ଦାବି କରିଛନ୍ତି ସ୍ଥାନୀୟ ବାସିନ୍ଦା ଏବଂ ବିଭିନ୍ନ ସଂଗଠନ ।
ମୁଣ୍ଡଳୀ ବ୍ୟାରେଜ ଦେଇ ପ୍ରତ୍ୟେକ ଦିନ ହଜାର ହଜାର ଗାଡି ଯାତାୟତ କରୁଛି । ରାଜ୍ୟ ତଥା ରାଜ୍ୟ ବାହାରୁ ଲୋକମାନେ କଟକ ଆସୁଛନ୍ତି । ଟୋଲ ଆଦାୟ ନାଁରେ ଏପରି ଆକ୍ରମଣ କରିବା ଘଟଣାକୁ କେବେ ବି ସହଜରେ ଛଡାଯିବ ନାହିଁ । ଛତିଶଗଡ ପର୍ଯ୍ୟଟକଙ୍କୁ ମାରପିଟ୍ ଘଟଣା ଲୋକଲୋଚନକୁ ଆସିବା ପରେ ଏହି ରାସ୍ତା ଦେଇ ଯା'ଆସ କରୁଥିବା ଯାତ୍ରୀମାନେ ଏବଂ ବିଭିନ୍ନ ସଂଗଠନ ମୁଣ୍ଡଳୀ ଟୋଲ ଗେଟ୍ ସମ୍ପୂର୍ଣ୍ଣ ବନ୍ଦ କରିବା ପାଇଁ ଦାବି କରିଛନ୍ତି । ଅନ୍ୟପଟେ ଟୋଲ ଗେଟରେ ପର୍ଯ୍ୟଟକଙ୍କ ଉପରେ ଆକ୍ରମଣ ଘଟଣାକୁ ୨ ଦନ ବିତି ଯାଇଥିଲେ ବି ଅଦ୍ୟାବିଧି କେବଳ ୪ ଜଣକୁ ଗିରଫ କରି ଚୁପ୍ ବସିଛି ଆଠଗଡ଼ ପୋଲିସ । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି ।
୧୯୯୬ ମସିହା ଠାରୁ ଆଜି ଯାଏଁ ମୁଣ୍ଡଳୀ ଟୋଲ ଗେଟ୍ ଜରିଆରେ ଟିକସ ଆଦାୟକୁ ସ୍ଥାନୀୟ ଅଞ୍ଚଳବାସୀ ବିରୋଧ କରିଆସୁଛନ୍ତି । ଏବେ ଏଠାରେ ଗୁଣ୍ଡାରାଜ ଘଟଣା ପଦାକୁ ଆସିବା ପରେ ଏହାର ଉଚ୍ଚସ୍ତରୀୟ ତଦନ୍ତ କରି ତୁରନ୍ତ ଏହି ଟୋଲ ଗେଟକୁ ସବୁଦିନ ପାଇଁ ବନ୍ଦ କରିବା ସହ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଛି । ରାଜ୍ୟର ବିଭିନ୍ନ ଅଞ୍ଚଳରୁ ଟୋଲ ଗେଟ୍ ଉଠି ଯାଇଥିବା ବେଳେ OBCC(Odisha Bridge & Construction Corporation Limited Bhubaneswar) ପକ୍ଷରୁ କଟକ ଜିଲ୍ଲାରେ ଏହି ଗୋଟିଏ ସ୍ଥାନରୁ ଯାତ୍ରୀଙ୍କ ଠାରୁ ଜୋର ଜବରଦସ୍ତି ଅଧିକ ଟୋଲ୍ ଟାକ୍ସ ଆଦାୟ ହେଉଥିବାରୁ ଯାତ୍ରୀ ଅସନ୍ତୋଷ ଦେଖାଯାଇଛି ।