ଭୁବନେଶ୍ବର: ଉପନିର୍ବାଚନ (Dhamnagar ByPoll) ନେଇ ଧାମନଗରର ରାଜନୈତିକ ପାଣିପାଗ ଉଷ୍ମ ହୋଇଛି । ବିଭିନ୍ନ ପ୍ରସଙ୍ଗକୁ ନେଇ ଧାମନଗର ସର୍ବଦା ଚର୍ଚ୍ଚାରେ ରହିଆସିଛି । ରାଜନୈତିକ ଦୃଷ୍ଟି କୋଣରୁ ସବୁବେଳେ ଧାମନଗର ଗୁରୁତ୍ୱ ବହନ କରିଆସିଛି । ଧାମନଗର ବିଧାନସଭା ଆସନ ସୃଷ୍ଟି ହେବା ପରଠାରୁ ଏଯାବତ ଏଠାରେ 17 ଥର ନିର୍ବାଚନ ହୋଇସାରିଛି । ଏଠାରୁ ବିଭିନ୍ନ ସମୟରେ 10 ଜଣ ନିର୍ବାଚିତ ହେବା ସହ ଅନ୍ୟୂନ 3 ଜଣ ରାଜ୍ୟ ମନ୍ତ୍ରିମଣ୍ଡଳରେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଛନ୍ତି ।
ଧାମନଗର ବିଧାନସଭା ନିର୍ବାଚନ ମଣ୍ଡଳୀ (Dhamnagar Assembly constituency) ସ୍ୱାଧୀନତା ପରେ 1951/52 ନିର୍ବାଚନ ପୂର୍ବରୁ ଗଠିତ ହୋଇଥିଲା । 1936 ମସିହାରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ପରେ 1937ରେ ହୋଇଥିବା ପ୍ରଥମ ବିଧାନସଭା ନିର୍ବାଚନ ବେଳକୁ ଭଦ୍ରକର 2ଟି ଆସନ ଥିଲା । ପୂର୍ବ ଭଦ୍ରକ ଓ ପଶ୍ଚିମ ଭଦ୍ରକ । ପଶ୍ଚିମ ଭଦ୍ରକ ଆସନରୁ ସାଧାରଣ ବର୍ଗ ଓ ତଫସିଲଭୁକ୍ତ ଜାତିର 2 ଜଣ ନିର୍ବାଚିତ ହେଉଥିଲେ । ପୂର୍ବ ଭଦ୍ରକ ଆସନରୁ କଂଗ୍ରେସ ପ୍ରାର୍ଥୀ ଚକ୍ରଧର ବେହେରା ଓ ପଶ୍ଚିମ ଭଦ୍ରକ ଆସନରୁ ସାଧାରଣ ବର୍ଗର ପ୍ରାର୍ଥୀ ଭାବେ ଜଗନ୍ନାଥ ଦାସ ଓ ସଂରକ୍ଷିତ ବର୍ଗରୁ ନିଧି ଦାସ ନିର୍ବାଚିତ ହୋଇଥିଲେ ।
1946 ନିର୍ବାଚନରେ ପୂର୍ବ ଭଦ୍ରକ ଆସନରୁ ହରେକୃଷ୍ଣ ମହତାବ ବିଜୟୀ ହୋଇ ଓଡ଼ିଶାର ପ୍ରଧାନମନ୍ତ୍ରୀ ହୋଇଥିଲେ । ଧାମନଗର ପୂର୍ବ ଭଦ୍ରକ ଆସନର ଅନ୍ତର୍ଭୁକ୍ତ ଥିଲା । ପଶ୍ଚିମ ଭଦ୍ରକ ଯୁଗ୍ମ ଆସନରୁ ଭାଗବତ ସାହୁ ଓ ବୃନ୍ଦାବନ ଚନ୍ଦ୍ର ଦାସ ନିର୍ବାଚିତ ହୋଇଥିଲେ । 1951/52 ନିର୍ବାଚନରେ ଧାମନଗର ବିଧାନସଭା କ୍ଷେତ୍ରରୁ କଂଗ୍ରେସ ପ୍ରାର୍ଥୀ ଭାବେ ନୀଳମଣି ରାଉତରାୟ ବିଜୟୀ ହୋଇ ନବକୃଷ୍ଣ ଚୌଧୁରୀଙ୍କ ମନ୍ତ୍ରିମଣ୍ଡଳରେ ସ୍ଥାନ ପାଇଥିଲେ । 1957 ଓ 1961 ନିର୍ବାଚନରେ କଂଗ୍ରେସ ପ୍ରାର୍ଥୀ ତଥା ବିଶିଷ୍ଟ ସ୍ୱାଧୀନତା ସଂଗ୍ରାମୀ ମୂରଲୀଧର ଜେନା ଧାମନଗରରୁ ବିଜୟୀ ହୋଇଥିଲେ । ତାଙ୍କ ମୃତ୍ୟୁ ପରେ 1967 ନିର୍ବାଚନରେ ତାଙ୍କ ପତ୍ନୀ ସତ୍ୟଭାମା ଦେଈ ମଧ୍ୟ ଏହି ଆସନରୁ ବିଜୟ ହୋଇଥିଲେ ।