ବରଗଡ: ଦେଶର ଆର୍ଥିକ ସ୍ଥିତି ଏବେ ସଙ୍କଟ ଦେଇ ଗତି କରୁଛି । ସୃଷ୍ଟି ହୋଇଥିବା ମାନ୍ଦାବସ୍ଥାର ସିଧାସଳଖ ପ୍ରଭାବ ଶିଳ୍ପ ଅନୁଷ୍ଠାନ ଓ କଳକାରଖାନା ଉପରେ ପଡିଛି । ତେବେ ଏହି ପ୍ରଭାବ ଓଡିଶାର ଭାତହାଣ୍ଡି ବରଗଡ ଜିଲ୍ଲାର କୃଷି ଓ ବୁଣାକାର ମାନଙ୍କ ଉପରେ ଉପରେ ମଧ୍ୟ ସମାନ୍ତରାଳ ଭାବରେ ପଡିଥିବା ଦେଖିବାକୁ ମିଳିଛି ।
ବରଗଡ ଜିଲ୍ଲାରେ ମୁଖ୍ୟତଃ ୭୦ % ଲୋକେ ପରିବାର ପୋଷଣ ପାଇଁ ଚାଷକାମ ଉପରେ ନିର୍ଭର କରନ୍ତି । ଏହା ସହିତ ହଜାର ହଜାର ବସ୍ତ୍ର ବୁଣାକାର ଲୁଗାବୁଣି ନିଜ ଗୁଜୁରାଣ ମେଣ୍ଟାନ୍ତି । କିନ୍ତୁ ଦେଶର ଆର୍ଥିକ ମାନ୍ଦାବସ୍ଥା ସେମାନଙ୍କ ଭାତ ହାଣ୍ଡିରେ ଲାତ ମାରିଛି । ଆର୍ଥିକ ମାନ୍ଦାବସ୍ଥା ଯୋଗୁଁ ଲୁଗାବୁଣାର କଞ୍ଚାମାଲର ଦର ବୃଦ୍ଧି ପାଇଛି । ଫଳରେ ଲୁଗାଦାମ ମଧ୍ୟ ବୃଦ୍ଧି କରିବାକୁ ବାଧ୍ୟ ହେଉଛନ୍ତି ସେମାନେ । ସେପଟେ ଆକାଶ ଛୁଆଁ ଲୁଗା ଦର କିଣିବାକୁ ନାରାଜ ହେଉଛନ୍ତି ସାଧାରଣ ଲୋକେ । ତେବେ ଲୁଗା ବିକ୍ରି ମାନ୍ଦା ହୋଇଯାଇଥିବାରୁ ଦୋକାନ ମାଲିକ ମାନେ ଆଉ ଲୁଗା ବୁଣିବାକୁ ଦେଉନାହାନ୍ତି |