ବାଲେଶ୍ୱର:ବାହାନଗା ବଜାର ଷ୍ଟେସନ ନିକଟରେ ହୋଇଥିବା ରେଳ ଦୁର୍ଘଟଣାର ଯନ୍ତ୍ରଣା ଏବେ ବି ଛାତି ଚିରି ପକାଉଛି । ସେହି କାଳ ରାତି ଅନେକ ସଂସାର ଉଚ୍ଛନ୍ନ କରିଦେଇଛି । ଦୁର୍ଘଟଣା ସମୟରେ ରକ୍ତରଞ୍ଜିତ ହୋଇଯାଇଥିଲା ବାହାନଗା ମାଟି । ଚାରିଆଡେ କୁଢ କୁଢ ମୃତଦେହ ଗଦା ହୋଇଯାଇଥିଲା । ଆଉ ସେହି ମୃତଦେହର ପାହାଡ ତଳେ ଚାପି ହୋଇ ରହିଥିଲା ଜଣେ ୧୦ ବର୍ଷର ପୁଅ, ଦେବାଶିଷ । ପିଲାଟି ଉପରେ ପ୍ରାୟ ୧୦ଟି ମୃତଦେହ ପଡିଥିଲା । ଅନେକ ଘଣ୍ଟା ଧରି ଦେବାଶିଷ ସେମିତି ଲାସ୍ ତଳେ ଦବି ହୋଇରହିଥିଲା । ଲାସ୍ର ପାହାଡ ତଳେ ମୃତ୍ୟୁ ସହ ସଂଗ୍ରାମ କରୁଥିବାବେଳେ ଶେଷରେ ମୃତଦେହକୁ ଆଡେଇ ଦେବାଶିଷକୁ ବାହାର କରିଥିଲେ ଦଶମ ଶ୍ରେଣୀରେ ପଢୁଥିବା ତାଙ୍କର ବଡ ଭାଇ ।
ଦୁର୍ଘଟଣାରେ ନାବାଳକ ଜଣକ ଗୁରୁତର ଆହତ ହୋଇଥିବା ବେଳେ ତାଙ୍କୁ ସଙ୍ଗେ ସଙ୍ଗେ କଟକ ବଡ ମେଡିକାଲରେ ଭର୍ତ୍ତି କରାଯାଇଛି । ଏବେ ସେ ମେଡିକାଲର ସର୍ଜରୀ ୱାର୍ଡରେ ଚିକିତ୍ସିତ ହେଉଛନ୍ତି । ଏହି ୧୦ ବର୍ଷୀୟ ଦେବାଶିଷ ହେଉଛନ୍ତି ବାଲେଶ୍ବର ଜିଲ୍ଲା ଭୋଗରାଇ ବ୍ଲକ ନାଫରାଇ ଅଞ୍ଚଳର ନିଳାମ୍ବର ପାତ୍ରଙ୍କ ସାନପୁଅ । ତାଙ୍କୁ ବଡ଼ଭାଇ ଶୁଭାଶିଷ ଯିଏ କି ଦଶମ ଶ୍ରେଣୀରେ ପଢୁଛନ୍ତି ସେ ହିଁ ଉଦ୍ଧାର କରିଥିଲେ । ତାଙ୍କର ପୁରା ପରିବାର ଏବେ ମେଡିକାଲରେ ଚିକିତ୍ସିତ ହେଉଥିବା ଜଣାପଡିଛି ।
ଏହା ମଧ୍ୟ ପଢନ୍ତୁ:'ପ୍ରଭୁ ରକ୍ଷା କର ଗୁହାରି କରୁଥାଏ, ଆଖି ଖୋଲିଲା ବେଳକୁ ବଞ୍ଚିଛି'