ବଲାଙ୍ଗୀର: ବନ୍ଧୁତ୍ବର ଏକ ବଳିଷ୍ଠ ଉଦାହରଣ ଦେଖିବାକୁ ମିଳିଛି । ଜଣେ ବନ୍ଧୁ ନିଜ ବନ୍ଧୁ ପାଇଁ ବେଳେବେଳେ ଜୀବନ ଦେବା ଭଳି ଦୃଷ୍ଟାନ୍ତ ଦେଖିବାକୁ ମିଳିଥାଏ । ହେଲେ, ଜଣେ ନିଜର ପ୍ରିୟ ବନ୍ଧୁଙ୍କୁ ହରାଇବା ପରେ ତାଙ୍କର ସପ୍ନ ପୂରଣ କରିବା ପାଇଁ ବଲାଙ୍ଗୀରର ଜଣେ ବନ୍ଧୁ ଏବେ କରୁଛନ୍ତି ସମର୍ପିତ ସେବା । ବଲାଙ୍ଗୀରର ଯୁବକ ସୂର୍ଯ୍ୟକାନ୍ତ ମହାପାତ୍ର। ପେଶାରେ ଜଣେ ଡ଼ାକ୍ତର । ତେବେ ପଢା ସମୟରେ ତାଙ୍କର ବରଗଡ ଜିଲ୍ଲା ଘେଁସ ଗ୍ରାମର ସୌମ୍ୟରଞ୍ଜନ ଦେବତାଙ୍କ ସହ ଦେଖା ହୋଇଥିଲା । ତେବେ ଏ ଦୁଇ ଜଣଙ୍କ ମଧ୍ୟରେ ସ୍ଥାପିତ ହୋଇଥିଲା ଘନିଷ୍ଠ ବନ୍ଧୁତା ଏବଂ ଏମାନେ ଏକାସାଙ୍ଗରେ ପାଠ ପଢ଼ିବା ସହ ଡାକ୍ତରୀ ପଢ଼ିବା ପାଇଁ ମଧ୍ୟ ଚିନ୍ତା କରିଥିଲେ । ଦୁଇ ବନ୍ଧୁ ଅକ୍ଲାନ୍ତ ପରିଶ୍ରମ କରି ମେଡିକାଲ୍ ପ୍ରବେଶିକାରେ ସଫଳ ହୋଇ ପରବର୍ତ୍ତୀ ସମୟରେ ବୁର୍ଲା ମେଡିକାଲରେ ପାଠ ମଧ୍ୟ ପଢ଼ିଥିଲେ ।
ସେହିପରି ଡାକ୍ତରୀ ପାଠ ପରେ ଦୁଇ ଜଣ କଳାହାଣ୍ଡି ଜିଲ୍ଲାରେ ଡ଼ାକ୍ତର ଭାବରେ ଚାକିରୀ ପାଇଥିଲେ। ଏବଂ କଳାହାଣ୍ଡିରେ ଲୋକଙ୍କ ସେବା କରିବା ପରେ ସେମାନେ ଉପାନ୍ତରେ ଥିବା ଗରିବ ଓ ଅସହାୟ ଲୋକେ ଚିକିତ୍ସାରୁ ବଞ୍ଚିତ ଥିବାବେଳେ ସେମାନଙ୍କର ସେବା କରିବା ପାଇଁ ଡ଼ାକ୍ତର ସୌମ୍ୟରଞ୍ଜନ ଦେବତା ତାଙ୍କ ସାଙ୍ଗ ସହ ଆଲୋଚନା କରି ଗାଁ ଗାଁ ଯାଇ ଲୋକଙ୍କ ସେବା ଆରମ୍ଭ କରିଥିଲେ । ହେଲେ ଏହି ଦୁଇ ବନ୍ଧୁଙ୍କ ବନ୍ଧୁତ୍ବକୁ ସତେ ଯେମିତି ଦଇବ ସହିଲା ନାହିଁ । ଡ଼ାକ୍ତର ସୌମ୍ୟରଞ୍ଜନ ଦେବତାଙ୍କ ଅଳ୍ପ ବୟସରେ କୌଣସି ଏକ ରୋଗରେ ବିୟୋଗ ହୋଇଯାଇଥିଲା ।
ତେବେ ନିଜ ଘନିଷ୍ଠ ସାଙ୍ଗକୁ ହରାଇ ଡ଼ାକ୍ତର ସୂର୍ଯ୍ୟକାନ୍ତ ମହାପାତ୍ର ଭାଙ୍ଗି ପଡ଼ିଥିଲେ ସତ ହେଲେ ପରେ ସେ ନିଜ ସାଙ୍ଗଙ୍କ ସପ୍ନ ପୂରଣ କରିବାକୁ ଠାଣି ନେଇଥିଲେ । ତେବେ ସେ ବର୍ତ୍ତମାନ ବଲାଙ୍ଗୀର ଜିଲ୍ଲା ଗୁଡ଼ଭେଲା ବ୍ଲକ ଡ଼ାକ୍ତରଖାନାରେ କାର୍ଯ୍ୟରତ ଥିବାବେଳେ ନିଜ ଆରପାରିରେ ଥିବା ବନ୍ଧୁଙ୍କ ପାଇଁ କରିଆସୁଛନ୍ତି ସମର୍ପିତ ସେବା । ଯେଉଁଥିରେ ସେ ଡ଼ାକ୍ତରଖାନା କାର୍ଯ୍ୟରୁ ବିରତି ପରେ ଉପାନ୍ତ ଗାଁ ଗଣ୍ଡାକୁ ଯାଇ ଗରିବ ଲୋକଙ୍କ ଚିକିତ୍ସା କରୁଛନ୍ତି । ତେବେ ଦୀର୍ଘ ତିନି ବର୍ଷ ହେବ ସେ ଦିନ ରାତି ଖରା ବର୍ଷା କିଛିକୁ ଖାତିର ନକରି ଗାଁ ଗଣ୍ଡାକୁ ଯାଇ ଲୋକଙ୍କ ଚିକିତ୍ସା କରୁଛନ୍ତି । ଏହାସହ ଲୋକଙ୍କୁ ମାଗଣାରେ ଔଷଧ ମଧ୍ୟ ବଣ୍ଟନ କରୁଛନ୍ତି । ନିଜ ଆରପାରିରେ ଥିବା ବନ୍ଧୁଙ୍କ ସ୍ବପ୍ନକୁ ସେ ପୂରଣ କରିବା ପାଇଁ ଦୃଢ ମନୋବଳ ସହ କାମ କରିବେ ବୋଲି କହିଛନ୍ତି । ସେହିପରି ସେ ଓଡ଼ିଶାରେ ଯେଉଁଠିକୁ ଯାଆନ୍ତୁ ନା କାହିଁକି ଏହିଭଳି ଲୋକଙ୍କ ଉତ୍ସର୍ଗୀକୃତ ସେବା ଯୋଗାଇ ଦେବେ ବୋଲି କହିଛନ୍ତି । ତାଙ୍କ ସାଙ୍ଗକୁ ଏହିଭଳି ସେ ମନେ ରଖିବେ ବୋଲି କହିଛନ୍ତି ।