ମୁମ୍ବାଇ: ଚଳିତ ଇଣ୍ଡିଆନ ପ୍ରିମିୟର ଲିଗ (IPL 2022) 61ତମ ମ୍ୟାଚରେ ଜବରଦସ୍ତ ବିଜୟ ହାଇସ କରିଛି ଶ୍ରେୟସ ଆୟରଙ୍କ ନେତୃତ୍ବାଧୀନ କୋଲକାତା ନାଇଟ ରାଇଡର୍ସ । ଆନ୍ଦ୍ର ରସେଲଙ୍କ ଅଲରାଉଣ୍ଡର ପ୍ରଦର୍ଶନ ବଳରେ କୋଲକାତା କବଜାକୁ ଯାଇଛି ମ୍ୟାଚ । ମହାରାଷ୍ଟ୍ର କ୍ରିକେଟ ଆସୋସିଏସନ (MCA) ଷ୍ଟାଡିୟମରେ ଖେଳାଯାଉଥିବା ମ୍ୟାଚରେ ହାଇଦ୍ରାବାଦକୁ 54ରନରେ ପରାସ୍ତ କରିଛି କୋଲକାତା । ଫଳରେ KKRର ପ୍ଲେ-ଅଫ ଆଶା ଉଜ୍ଜୀବିତ ରହିଛି । 49 ରନର ଅପରାଜିତ ଇନିଂସ ସହ 3ଟି ୱିକେଟ ନେଇ ବିଜୟରେ ପ୍ରମୁଖ ଭୂମିକା ତୁଲାଇଥିବା ରସେଲ ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଛନ୍ତି ।
ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ କୋଲକାତା ଅଧିନାୟକ ଶ୍ରେୟସ ଆୟର । ଦଳ ଆରମ୍ଭରୁ ବିପର୍ଯ୍ୟୟର ସମ୍ମୁଖୀନ ହୋଇଥିଲା । 6 ବଲରେ 7 ରନ କରି ପାଭିଲିୟନ ଫେରି ଯାଇଥିଲେ ଭେଙ୍କେଟଶ ଆୟର । ଏହାପରେ ଅଜିଙ୍କ୍ୟ ରାହାଣେ ଏବଂ ନୀତିଶ ରାଣା ସତର୍କତାର ସହ ପାଳି ଆରମ୍ଭ କରିଥିଲେ । ରାହାଣେ ୨୮ ରନ କରିଥିବାବେଳେ ରାଣା ୨୬ ରନ କରି ଉମରାନ ମଲିକଙ୍କ ଘାତକ ବୋଲିଂର ଶିକାର ହୋଇଥିଲେ । ଅଧିନାୟକ ଶ୍ରେୟାସ ଆୟର 15 ରନ କରି ଉମରାନ ମଲିକ ଏବଂ ସାମ ବିଲିଙ୍ଗ୍ସ ୩୪ ରନ କରି ଭୁବନେଶ୍ବର କୁମାରଙ୍କ ଶିକାର ହୋଇଥିଲେ । ମାତ୍ର ଶେଷ ବେଳକୁ ଆସିଥିବା ଆନ୍ଦ୍ରେ ରସେଲ ଶକ୍ତିଶାଳୀ ବ୍ୟାଟିଂ ଆରମ୍ଭ କରିଥିଲେ । ଧୂଆଁଧାର ବ୍ୟାଟିଂ ବଳରେ ୨୭ ବଲରୁ ଅପରାଜିତ ୪୯ ରନ କରିଥିଲେ ରସେଲ । ଏଥିରେ 4ଟି ଛକା ଏବଂ 3ଟି ଚୌକା ରହିଥିଲା । ନିର୍ଦ୍ଧାରିତ 20 ଓଭରରେ 7 ୱିକେଟ ହରାଇ 177 ରନ୍ ସଂଗ୍ରହ କରିଥିଲା କୋଲକାତା । ହାଇଦ୍ରାବାଦ ସମ୍ମୁଖରେ 178 ରନର ବିଜୟ ଲକ୍ଷ୍ୟ ରହିଥିଲା । ସେପଟେ ହାଇଦ୍ରାବାଦ ପକ୍ଷରୁ ଉମରାନ ମଲିକ ସର୍ବାଧିକ ୩ଟି ଓ୍ବିକେଟ ନେଇ ଥିବାବେଳେ ମାର୍କୋ ଜନସନ, ଭୁବନେଶ୍ବର କୁମାର ଏବଂ ଟି.ନଟରାଜନ ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।