ମୁମ୍ବାଇ: କିଛି ଦିନ ହେବ ବଲିଉଡ କୁଇନରୁ ବିବାଦୀୟ କୁଇନ ସାଜିଥିବା କଙ୍ଗନା ରଣାୱତ ଚୁପ ରହିବାର ନାଁ ନେଉନାହାଁନ୍ତି । ବିଏମସି ଦ୍ବାରା ବୁଧବାର ତାଙ୍କ ମଣିକର୍ଣ୍ଣିକା ଅଫିସ ଭାଙ୍ଗି ଯିବା ପରଠୁ ସେ ଶିବସେନା ପାର୍ଟି ଉପରେ ଖପ୍ପା ନଜର ଆସୁଛନ୍ତି । ସେପଟେ ୱାଇ ପ୍ଲସ ସୁରକ୍ଷା ସହ ସେ ମୁମ୍ବାଇରେ ପହଞ୍ଚିସାରିଛନ୍ତି ସେ । ଆଉ ପହଞ୍ଚିବା ପରେ ସେ ଟ୍ବିଟରରେ ଏକ ଭିଡିଓ ସେୟାର କରି ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ କଡା ଜବାବ ଦେଇଥିଲେ । ଦିନେ ଉଦ୍ଧବଙ୍କ ଅହଂକାର ଭାଙ୍ଗିବ ବୋଲି କହିଥିଲେ କଙ୍ଗନା ।
ସେ ଗୁରୁବାର ଗୋଟିଏ ପରେ ଗୋଟିଏ ଟ୍ବିଟ କରି ଶିବସେନା ପାର୍ଟିକୁ ଟାର୍ଗେଟ କରିବା ସହ ଅନେକ କଥାର ଦାବି ମଧ୍ୟ କରିଛନ୍ତି । ସେହିପରି ସେ ଏକ ଟ୍ବିଟରେ ଦାବି କରି ଲେଖିଛନ୍ତି, ‘ମୋର ଅନେକ ମରାଠୀ ବନ୍ଧୁ ଗତକାଲି ଫୋନରେ କାନ୍ଦୁଥିଲେ, କେହି କେହି ମୋତେ ସାହାଯ୍ୟ ପାଇଁ ଅନେକ ଯୋଗାଯୋଗ କରିଥିଲେ, ଆଉ କିଛି ଘରେ ଖାଦ୍ୟ ପଠାଉଥିଲେ ଯାହା ସୁରକ୍ଷା ପ୍ରୋଟୋକଲ କାରଣରୁ ମୁଁ ଗ୍ରହଣ କରିପାରିଲି ନାହିଁ, ମହାରାଷ୍ଟ୍ର ସରକାରଙ୍କ ଏହି କଳା କାର୍ଯ୍ୟ ମରାଠୀ ସଂସ୍କୃତି ଏବଂ ଗର୍ବକୁ କ୍ଷତି ପହଞ୍ଚାଇବା ଉଚିତ୍ ନୁହେଁ । ଜୟ ମହାରାଷ୍ଟ୍ର। ।’