ଭୁବନେଶ୍ବର :ଓଡିଶା ମଧ୍ୟ ଦେଇ ପଶ୍ଚିମ ଭାରତ ଓ ଉତ୍ତର ଭାରତକୁ ଗଡିବ ତୀର୍ଥଯାତ୍ରୀ ସ୍ୱତନ୍ତ୍ର ପର୍ଯ୍ୟଟକ ଟ୍ରେନ । ଭାରତୀୟ ରେଳ କ୍ୟାଟରିଂ ଆଣ୍ଡ ଟୁରିଜିମ୍ କର୍ପୋରେସନ୍ (IRCTC) ଭୁବନେଶ୍ୱର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ପଶ୍ଚିମ ଭାରତରେ ଥିବା ଗୁରୁତ୍ୱପୂର୍ଣ୍ଣ ତୀର୍ଥ ସ୍ଥାନ, ମାତା ବୈଷ୍ଣୋଦେବୀ ସହିତ ଉତ୍ତର ଭାରତ ଭ୍ରମଣ ପାଇଁ ସ୍ୱତନ୍ତ୍ର ଟୁର୍ ପ୍ୟାକେଜ୍ “ତୀର୍ଥଯାତ୍ରୀ ସ୍ୱତନ୍ତ୍ର ପର୍ଯ୍ୟଟନ ଟ୍ରେନ୍” ବ୍ୟବସ୍ଥା କରାଯାଇଛି । ଜାନୁୟାରୀ 2022ରେ ପଶ୍ଚିମ ଭାରତ ପାଇଁ ସ୍ପେଶାଲ୍ ଟୁର୍ ପ୍ୟାକେଜ୍ “ତୀର୍ଥଯାତ୍ରୀ ସ୍ପେଶାଲ୍ ଟୁରିଷ୍ଟ ଟ୍ରେନ୍” ଏବଂ ମାର୍ଚ୍ଚରେ ଭାରତ ଦର୍ଶନ ପର୍ଯ୍ୟଟନ ଟ୍ରେନ୍ ଉତ୍ତର ଭାରତ ଅଭିମୁଖେ ଯାତ୍ରା କରିବାକୁ ସ୍ଥିର କରାଯାଇଛି ।
ଭାରତୀୟ ରେଳବାଇ କ୍ୟାଟରିଂ ଆଣ୍ଡ ଟୁରିଜିମ କର୍ପୋରେସନ ଦ୍ୱାରା ସ୍ୱତନ୍ତ୍ର ପର୍ଯ୍ୟଟନ ପ୍ୟାକେଜ ଆରମ୍ଭ ହେବ । ବ୍ରହ୍ମପୁର, ଖୋର୍ଦ୍ଧା ରୋଡ୍, ଭୁବନେଶ୍ୱର, କଟକ, ତାଳଚେର ରୋଡ୍, ଅନୁଗୁଳ, ସମ୍ବଲପୁର ଏବଂ ଝାରସୁଗୁଡା ମାର୍ଗ ଦେଇ 2022 ଜାନୁଆରୀ 21 ତାରିଖରେ ପଶ୍ଚିମ ଭାରତର ଗୁଜୁରାଟକୁ ପର୍ଯ୍ୟଟନ ଟ୍ରେନ ଯାତ୍ରା କରିବ। ବ୍ରହ୍ମପୁର, ଖୋର୍ଦ୍ଧା ରୋଡ୍, ଭୁବନେଶ୍ୱର, କଟକ, ଯାଜପୁର କେନ୍ଦୁଝର ରୋଡ଼, ଭଦ୍ରକ ଏବଂ ବାଲେଶ୍ୱର ମାର୍ଗଦେଇ 2022 ମାର୍ଚ୍ଚ 19 ତାରିଖରେ ମାତା ବୈଷ୍ଣୋଦେବୀ ସହିତ ଉତ୍ତର ଭାରତକୁ ପର୍ଯ୍ୟଟନ ଟ୍ରେନ ଯାତ୍ରା କରିବ।
ସାଧାରଣ ଲୋକ ଗୁଜୁରାଟର ଧାର୍ମିକ, ପର୍ଯ୍ୟଟନ ସ୍ଥାନଗୁଡିକ ସହିତ ମାତା ବୈଷ୍ଣୋଦେବୀ ଓ ଉତ୍ତର ଭାରତର ଧାର୍ମିକ ଏବଂ ପର୍ଯ୍ୟଟନ ସ୍ଥାନ ଗୁଡିକୁ ଅତି ସୁଲଭ ମୂଲ୍ୟରେ ପରିଦର୍ଶନ କରିବା ପାଇଁ ଏଭଳି ସୁଯୋଗ ଯୋଗାଇ ଦିଆଯାଉଛି। ଏହି ପରିକଳ୍ପନା ମଧ୍ୟରେ ଟ୍ରେନ ଓ ସଡକ ପରିବହନ, ଆବାସ, ଭ୍ରମଣ ସ୍ଥାନ ବୁଲାଇବା, ଶାକାହାରୀ ଭୋଜନ (ଜଳଖିଆ, ମଧ୍ୟାହ୍ନ ଭୋଜନ ଏବଂ ରାତ୍ରୀ ଭୋଜନ), ଆଇଆରସିଟିସି ଟୁର୍ ଏସକର୍ଟ ଏବଂ ଟ୍ରାଭେଲ୍ ଇନସୁରାନ୍ସ ଗୁଡିକ ଅନ୍ତର୍ଭୂକ୍ତ କରାଯାଇଛି । ପଶ୍ଚିମ ଭାରତ ଆଡକୁ ଗୁଜୁରାଟ ଟୁରିଷ୍ଟ ପ୍ୟାକେଜରେ ଷ୍ଟାଣ୍ଡାର୍ଡ ପ୍ୟାକେଜ ପାଇଁ 10,400 /- ଟଙ୍କା ଏବଂ ଆରାମଦାୟକ ଯାତ୍ରା ପାଇଁ 17,300 /- ଟଙ୍କା (10 ରାତି / 11 ଦିନ) ପାଇଁ ବ୍ୟୟ ଦେବାକୁ ପଡିବ ।