ଭୁବନେଶ୍ବର: ଅର୍ଜୁନ ପୁରସ୍କାର ମିଳିବା ନେଇ ଓଡିଆ ଧାବିକା ଦୁତି ଚାନ୍ଦ ଆଶାବାଦୀ ଅଛନ୍ତି । କ୍ରୀଡାକ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ କରି ଦେଶକୁ ଗୌରବାନ୍ନିତ କରିଥିବା କ୍ରୀଡାବିତଙ୍କୁ ମିଳିଥାଏ ଏହି ସମ୍ମାନଜନକ ଅର୍ଜୁନ ପୁରସ୍କାର ।
2019 ବର୍ଷ ପାଇଁ ଏପ୍ରିଲ ମାସ ପର୍ଯ୍ୟନ୍ତ ଏହି ସମ୍ମାନଜନକ ପୁରସ୍କାର ପାଇଁ ଆବେଦନର ସମୟ ରହିଥିଲା । ଦୁତି ଏଥିପାଇଁ ଆବେଦନ କରିଛନ୍ତି । ଯୋଗ୍ୟତାର ମାନଦଣ୍ଡ ଅନୁଯାୟୀ ଗତ 3 ବର୍ଷ ଧରି କ୍ରୀଡାବିତଙ୍କ ପ୍ରଦର୍ଶନ ଉଚ୍ଚକୋଟୀର ରହିବା ଜରୁରୀ । 2016ରୁ 2019 ପର୍ଯ୍ୟନ୍ତ ଦୁତିଙ୍କ ପ୍ରଦର୍ଶନ ଦମଦାର ରହିଛି । ତେବେ ଓଡିଶା ସରକାରଙ୍କ ପକ୍ଷରୁ ବିଳମ୍ବରେ କ୍ରୀଡା ମନ୍ତ୍ରଣାଳୟକୁ ଦୁତିଙ୍କ ନାମ ସୁପାରିଶ କରାଯାଇଛି ବୋଲି ଚର୍ଚ୍ଚା ହେଉଛି । ସେଥିପାଇଁ ଦୁତି ଅର୍ଜୁନ ପୁରସ୍କାରରୁ ବଞ୍ଚିତ ହେବାନେଇ ଆଶଙ୍କା ଉପୁଜିଛି । ତେବେ ଦେଶ ପାଇଁ ଅଧିକ ପଦକ ଜିତିବା ତାଙ୍କର ଲକ୍ଷ୍ୟ ଓ ଖେଳାଳିଙ୍କୁ ଅର୍ଜୁନ ସମ୍ମାନ ଅଧିକ ପ୍ରେରଣା ଯୋଗାଇ ଥାଏ କହିଛନ୍ତି ଦୁତି । ତେଣୁ ସେ ପୁରସ୍କାର ପାଇବା ନେଇ ଆଶାବାଦୀ ଥିବା କହିଛନ୍ତି ।