ଭୁବନେଶ୍ବର: ପଞ୍ଚାୟତ ଓ ପୌର ନିର୍ବାଚନରେ ବିଜୟ ପରେ ମୁଖ୍ୟମନ୍ତ୍ରୀଙ୍କୁ ଶୁଭେଚ୍ଛା ଜଣାଇବାକୁ ନବୀନ ନିବାସ ଯାଇଥିଲେ ସରକାରୀ ଅଧିକାରୀ । ଏହାକୁ ନେଇ ଗତ ଦୁଇ ଦିନ ହେଲା ବିଭିନ୍ନ ଚର୍ଚ୍ଚା ଚାଲିଛି । ଆଜି ଏହି ପ୍ରସଙ୍ଗରେ ସାମ୍ବାଦିକ ସମ୍ମିଳନୀ କରି ମୁଖ୍ୟମନ୍ତ୍ରୀ, ସରକାରୀ ଅଧିକାରୀ ଓ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲା ବିଜେପି । ଏପଟେ ପ୍ରେସ ବିବୃତି ମାଧ୍ୟମରେ ଜବାବ ରଖିଛି ବିଜେଡି । ପରାଜୟ ପ୍ରସଙ୍ଗରୁ କର୍ମୀଙ୍କ ନଜର ହଟାଇବାକୁ ବିଜେପିର ଏହା ଉଦ୍ୟମ ବୋଲି ବିଜେଡି କହିଛି ।
ବିଜେଡି ମୁଖପାତ୍ର ଲେନିନ ମହାନ୍ତି କହିଛନ୍ତି ଯେ, ଜିଲ୍ଲା ପରିଷଦ ଏବଂ ପୌର ନିର୍ବାଚନରେ ଓଡିଶାର ଲୋକଙ୍କ ଆତ୍ମବିଶ୍ବାସ ହାସଲ କରିବାରେ ବିଫଳ ହୋଇଛି ରାଜ୍ୟ ବିଜେପି । ଏହା ପରେ ବିଜେପି ଆଜି ପୁଣିଥରେ ସାମ୍ବାଦିକ ସମ୍ମିଳନୀ ଜରିଆରେ ଶସ୍ତା ରାଜନୀତି ଖେଳିବାର ପୁରୁଣା ଅଭ୍ୟାସକୁ ଦୋହରାଇଛି । ଓଡିଶା ବିଜେପି ବୋଧହୁଏ ଜାଣି ନାହିଁ ଯେ ନିକଟରେ ବିଜେପି ଶାସିତ ରାଜ୍ୟରେ ମଧ୍ୟ ନିର୍ବାଚନ ହେବା ପରେ ବରିଷ୍ଠ ଅମଲାତନ୍ତ୍ର ଯାଇ ସେହି ରାଜ୍ୟର ମୁଖ୍ୟମନ୍ତ୍ରୀଙ୍କୁ ଭେଟି ତାଙ୍କର ବିଜୟ ପାଇଁ ଅଭିନନ୍ଦନ ଜଣାଇଛନ୍ତି ।