ବ୍ରହ୍ମପୁର: ଗଞ୍ଜାମର ରଷିକୁଲ୍ୟା ମୁହାଣରେ ଚାଲିଛି ଅଲିଭ୍ ରିଡଲେ କଇଁଛଙ୍କ ମିଳନ ପ୍ରକ୍ରିୟା । କଇଁଛଙ୍କ ସୁରକ୍ଷା ପାଇଁ ବନ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ନିଆଯାଇଛି । କଇଁଛଙ୍କ ମିଳନର ଗତିବିଧି ଅନୁଧ୍ୟାନ କରିବା ଲାଗି ଜିଲୋଜିକାଲ ସର୍ଭେ ଅଫ୍ ଇଣ୍ଡିଆ(Geological Survey of India) ପକ୍ଷରୁ ଏହି ବିରଳ ପ୍ରଜାତିର ସାମୁଦ୍ରିକ କଇଁଛଙ୍କ ପିଠିରେ କରାଯାଇଛି ସ୍ବତନ୍ତ୍ର ଟ୍ୟାଗିଂ । ପ୍ରଥମ ଦିନରେ ୨୨ ଗୋଟି ଅଲିଭ ରିଡଲେ କଇଁଛଙ୍କ ଟ୍ୟାଗିଂ କରାଯାଇଥିବା ସୂଚନା ଦିଆଯାଇଛି ।
ପ୍ରତ୍ୟେକ ବର୍ଷ ଶୀତ ଋତୁରେ ଗଞ୍ଜାମ ଜିଲ୍ଲା ଋଷିକୂଲ୍ୟା ମୁହାଣକୁ ଅତିଥି ରୂପେ ଅଲିଭ ରିଡଲେ କଇଁଛଙ୍କ ଆଗମନ ହୋଇଥାଏ । ଏହି କଇଁଛଙ୍କ ସୁରକ୍ଷା ପାଇଁ ବନ ବିଭାଗ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଥିବା ବେଳେ ଚଳିତ ବର୍ଷ ଠାରୁ ଆରମ୍ଭ ହୋଇଛି ଅଲିଭ ରିଡଲେ କଇଁଛଙ୍କ ଟ୍ୟାଗିଙ୍ଗ୍ ପ୍ରକ୍ରିୟା । ପ୍ରଥମ ଦିନରେ ୧୧ ଗୋଟି ଲେଖାଏଁ ପୁରୁଷ ଏବଂ ମହିଳା ପ୍ରଜାତିର ଅଲିଭ ରିଡଲେ କଇଁଛଙ୍କ ଟ୍ୟାଗିଙ୍ଗ କରାଯାଇଥିବା ବ୍ରହ୍ମପୁର ACF ଅଶୋକ କୁମାର ବେହେରା ଗଣମାଧ୍ୟମକୁ ସୂଚନା ଦେଇଛନ୍ତି ।