ଲକ୍ଷ୍ନୌ: କୁହାଯାଏ ମାଆ ଅଛି ଯାହାର ଭୟ ନାହିଁ ତାହାର । ମାଆ ପାଖରେ ସମସ୍ତେ ସୁରକ୍ଷିତ । ଯେତେ ବାଧାବିଘ୍ନ ଆସିଲେ ମଧ୍ୟ ମାଆ ନିଜ ସନ୍ତାନକୁ ରକ୍ଷା କରିଥାଏ । ହେଲେ ଉତ୍ତରପ୍ରଦେଶରେ ଏହାର ଓଲଟା ଘଟଣା ଦେଖିବାକୁ ମିଳିଛି । ଏଠାରେ ମାଆର ମମତା ମରିଯାଇଛି । ପ୍ରେମିକ ସହ ମିଶି ସଇତାନ ସାଜିଛି ମାଆ । ନିଜ ଜନ୍ମକଲା ଛୁଆଙ୍କୁ ହତ୍ୟା କରି ଡ୍ରେନରେ ଫିଙ୍ଗି ଦେଇଛି । ଯେଉଁ ହାତ ପିଲାଙ୍କ ପାଇଁ ସୁରକ୍ଷା କବଚ ପାଲଟିଥିଲା ତାହା ପାଲଟି ଯାଇଛି ମୃତ୍ୟୁର ମାଧ୍ୟମ । ଉତ୍ତର ପ୍ରଦେଶର ମେରଟରୁ ଏହି ଛାତିଥର ଘଟଣା ସାମ୍ନାକୁ ଆସିଛି । ଏହି ଘଟଣାରେ ପୋଲିସ ମୋଟ ୬ଜଣଙ୍କୁ ଗିରଫ କରି ତଦନ୍ତ ଆରମ୍ଭ କରିଛି ।
ସୂଚନାଅନୁସାରେ, ଘଟଣାଟି ଗତ ମାର୍ଚ୍ଚ ୨୨ ତାରିଖର । ମେରଟର ଜଣେ ମହିଳା ପ୍ରେମିକ ସହ ମିଶି ନିଜର ୧୦ ବର୍ଷର ପୁଅ ଏବଂ ୬ ବର୍ଷର ଝିଅକୁ ହତ୍ୟା କରିଛି । ମହିଳାଙ୍କ ପ୍ରେମିକର ନାମ ସାଉଦ ହୋଇଥିବା ବେଳେ ସେ ସ୍ଥାନୀୟ ଅଞ୍ଚଳର କାଉନସିଲର ବୋଲି ଜଣାପଡିଛି । ପୋଲିସ କହିବା ଅନୁସାରେ, ଏହି ହତ୍ୟାକାଣ୍ଡରେ ମହିଳାଙ୍କ କିଛି ପଡୋଶୀ ମଧ୍ୟ ସାମିଲ ଥିଲେ । ଘଟଣାରେ ବର୍ତ୍ତମାନ ସୁଦ୍ଧା ୬ଜଣଙ୍କୁ ଗିରଫ କରାଯାଇଛି । ତେବେ ହତ୍ୟା ପରେ ଅପରାଧ ଲୁଚାଇବା ପାଇଁ ଅଭିଯୁକ୍ତ ମାଆ ଥାନାରେ ଛୁଆ ନିଖୋଜ ଥିବା ସମ୍ପର୍କରେ ଏତଲା ଦେଇଥିବା ଜଣାପଡିଛି ।