କୋଲକାତା:ସୌରଭ ଗାଙ୍ଗୁଲିଙ୍କୁ ନେଇ ମୁହାଁମୁହିଁ ହୋଇଛନ୍ତି ଟିଏମସି ଓ ବିଜେପି । ଦୁହିଁଙ୍କ ମଧ୍ୟରେ କଥା କଟାକଟି ହୋଇଛି । ସୌରଭ ଗାଙ୍ଗୁଲି ବିସିସିଆଇ ବସ୍ ଭାବେ କାମ କରିବେ ନାହିଁ ବୋଲି ଖବରକୁ ନେଇ ରାଜନୀତି ଜୋର ଧରିଛି । ବିଜେପି ଓ ପଶ୍ଚିମବଙ୍ଗର କ୍ଷମତାସୀନ ଟିଏମସି ମଧ୍ୟରେ ବାକଯୁଦ୍ଧ ଆରମ୍ଭ ହୋଇଯାଇଛି । ସୌରଭ ଗାଙ୍ଗୁଲିଙ୍କୁ ହଟାଇବା ପଛରେ ବିଜେପିର ହାତ ଥିବା କହିଛନ୍ତି ଟିଏମସି ନେତା ତଥା ସାଂସଦ ସାନ୍ତନୁ ସେନ।
ବିଜେପି ଉପରେ ଆଟାକ କରିଛନ୍ତି ଟିଏମସି ନେତା ସାନ୍ତନୁ ସେନ । ଟ୍ବିଟ କରି ସେ କହିଛନ୍ତି, ''ସୌରଭ ଗାଙ୍ଗୁଲି ବିଜେପିରେ ସାମିଲ ନ ହେବାରୁ ତାଙ୍କୁ ବିସିସିଆଇ ଅଧ୍ୟକ୍ଷ ପଦରୁ ହଟାଇ ଦିଆଯାଇଛି । ଅମିତ ଶାହ କିଛି ମାସ ପୂର୍ବରୁ ସୌରଭ ଗାଙ୍ଗୁଲିଙ୍କ ଘରକୁ ଯାଇଥିଲେ । ତାଙ୍କୁ ବିଜେପିରେ ସାମିଲ ହେବାକୁ ବାରମ୍ବାର କହିଥିବା ସୂଚନା ମିଳିଥିଲା । ଗାଙ୍ଗୁଲି ବିଜେପିରେ ସାମିଲ ନ ହେବାରୁ ତାଙ୍କୁ ବିସିସିଆ ଅଧ୍ୟକ୍ଷ ପଦରୁ ହଟାଇ ଦିଆଯାଇଛି । ସେ ରାଜନୈତିକ ପ୍ରତିଶୋଧର ଶିକାର ହୋଇଛନ୍ତି । ଅମିତ ଶାହଙ୍କ ପୁଅକୁ ବିସିସିଆଇ ସଚିବ ଭାବେ ରଖାଗଲା ମାତ୍ର ଗାଙ୍ଗୁଲିଙ୍କୁ ହଟାଇ ଦିଆଗଲା ଏହା ରାଜନୈତିକ ଆକ୍ରୋଶର ଏକ ନମୁନା । ଆମେ ଆପଣଙ୍କ ସହ ଅଛୁ ଦାଦା ।''