ମୁମ୍ବାଇ: ମହାରାଷ୍ଟ୍ର ଭୂଷଣ ପୁରସ୍କାର ବିତରଣରେ ଅଘଟଣ । ଖୋଲାପଡିଆରେ ବିତରଣ ସମ୍ମିଳନୀ ଚାଲିଥିବା ବେଳେ ଅଂଶୁଘାତରେ ୧୧ ଜଣଙ୍କ ମୃତ୍ୟୁ ହୋଇଥିବା ବେଳେ ପାଖାପାଖି ୧୨୦ ଜଣ ଆହତ ହୋଇଛନ୍ତି । ଆହତମାନଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଅଧିକାଂଶ ଲୋକଙ୍କର ସ୍ବାସ୍ଥ୍ୟବସ୍ଥା ଗୁରୁତର ରହିଥିବା ବେଳେ ମୃତ୍ୟୁ ସଂଖ୍ୟା ବୃଦ୍ଧି ହୋଇପାରେ ବୋଲି ଆଶଙ୍କା କରାଯାଉଛି ।
ସୂଚନାଅନୁସାରେ, ଗତକାଲି(ରବିବାର) ମହାରାଷ୍ଟ୍ରରେ ଭୂଷଣ ପୁରସ୍କାର ବିତରଣ ସମାରୋହ ହୋଇଥିଲା । ଏଥିରେ ଲକ୍ଷଲକ୍ଷ ଲୋକେ ଯୋଗଦେଇଥିଲେ । ଏହି କାର୍ଯ୍ୟକ୍ରମରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ, ମୁଖ୍ୟମନ୍ତ୍ରୀ ଏକନାଥ ସିନ୍ଦେ, ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ପ୍ରମୁଖ ସାମିଲ ହୋଇଥିଲେ । ତେବେ ଡହଡହ ଖରାରେ କାର୍ଯ୍ୟକ୍ରମ ଅନୁଷ୍ଠିତ ହେଉଥିବା ବେଳେ ଅନେକ ଲୋକେ ଅଂଶୁଘାତର ଶିକାର ହୋଇଥିଲେ । ଫଳରେ ଅସୁସ୍ଥଙ୍କୁ ଶୀଘ୍ର ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ବର୍ତ୍ତମାନ ସୁଦ୍ଧା ୧୧ଜଣଙ୍କ ମୃତ୍ୟୁ ହୋଇଥିବା ବେଳେ ୧୦୦ରୁ ଅଧିକା ଜଣ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଏନେଇ ଏକନାଥ ସିନ୍ଦେ ଟ୍ବିଟକରି ସୂଚନା ଦେଇଛନ୍ତି ।
ଦୁଃଖପ୍ରକାଶ କଲେ ସିନ୍ଦେ: ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଟ୍ବିଟକରି କହିଛନ୍ତି, "ମୁମ୍ବାଇର ଖରଘର ଠାରେ ପୁରସ୍କାର ବିତରଣ ସମାରୋହ ଆୟୋଜନ କରାଯାଇଥିବା ବେଳେ ଅନେକ ଲୋକ ଯୋଗ ଦେଇଥିଲେ । ତେବେ ହଠାତ୍ କିଛି ଲୋକ ଅଶୁଂଘାତରେ ଅସୁସ୍ଥ ହେବାରୁ ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ୧୧ଜଣଙ୍କ ମୃତ୍ୟୁ ହୋଇଯାଇଛି । ୨୪ଜଣ ହସ୍ପିଟାଲରେ ଚିକିତ୍ସତ ହେଉଛନ୍ତି । ଏହା ନିଶ୍ଚିତ ଦୁଃଖଦ ଘଟଣା ଅଟେ । "
କାର୍ଯ୍ୟକ୍ରମରେ ଯୋଗ ଦେଇଥିଲେ ଅମିତ ଶାହ: ମୁମ୍ବାଇର ଖରଘର ଠାରେ ଆୟୋଜିତ ଭୂଷଣ ପୁରସ୍କାର ବିତରଣ ଉତ୍ସବରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ ଯୋଗଦେଇଥିଲେ । ତେବେ ଅନେକ ସ୍ଥାନରୁ ଲକ୍ଷାଧିକ ଲୋକ ଯୋଗ ଦେଇଥିଲେ । ସ୍ଥାନୀୟ ପାଣିପାଗ ବିଭାଗର ତଥ୍ୟ ଅନୁସାରେ ଗତକାଲି ୩୮ ଡିଗ୍ରୀ ରେକର୍ଡ କରାଯାଇଥିଲା । ଟେଣ୍ଟର ବ୍ୟବସ୍ଥା ହୋଇନଥିବାରୁ ଖରାରେ ଏଭଳି ଅଘଟଣ ହୋଇଥିବା ଅଭିଯୋଗ ହୋଇଛି ।