ପାଟନା:ଜିନ୍ସ ଓ ଟି-ସାର୍ଟ ପରି କାଜୁଆଲ ପୋଷାକ ପରିଧାନ କରି କାର୍ଯ୍ୟାଳୟ ଆସିପାରିବେ ନାହିଁ ଶିକ୍ଷା ବିଭାଗରେ କାର୍ଯ୍ୟରତ ଅଧିକାରୀ ଓ କର୍ମଚାରୀ । କାର୍ଯ୍ୟାଳୟକୁ କେବଳ ଫର୍ମାଲ ଡ୍ରେସରେ ହିଁ ଆସିବାକୁ ପଡିବ । ବିହାର ଶିକ୍ଷା ବିଭାଗ ନିଜ କର୍ମଚାରୀଙ୍କ ପାଇଁ ଏପରି କିଛି ନିୟମ ଲାଗୁ କରିଛି । ରାଜ୍ୟ ଶିକ୍ଷା ବିଭାଗ ନିର୍ଦ୍ଦେଶକ ସୁବୋଧ କୁମାର ଚୌଧୁରୀଙ୍କ ଦ୍ବାରା ଏହି ନିର୍ଦ୍ଦେଶାବଳୀ ଜାରି କରାଯାଇଛି । ବିଭାଗରେ କାର୍ଯ୍ୟରତ ସମସ୍ତ ଅଧିକାରୀ ଓ କର୍ମଚାରୀଙ୍କୁ କେବଳ ଫର୍ମାଲ ଡ୍ରେସରେ କାର୍ଯ୍ୟାଳୟ ଆସିବା ପାଇଁ ଜାରି କରାଯାଇଥିବା ନିର୍ଦ୍ଦେଶାବଳିରେ କୁହାଯାଇଛି । କିଛି କର୍ମଚାରୀ ଓ ଅଧିକାରୀ ସାଧାରଣ ପୋଷାକ ବା କାଜୁଆଲ ଆଉଟଫିଟରେ ଅଫିସ ଆସୁଥିବାର ଦେଖାଯାଇଥିଲା । ଏହା ପରେ ଏପରି ନିଷ୍ପତ୍ତି ଗ୍ରହଣ କରାଯାଇଛି ।
ଅର୍ଡରରେ ଉଲ୍ଲେଖ କରାଯାଉଛି, ଏହା ଦେଖିବାକୁ ମିଳୁଛି ଯେ, ଏକାଧିକ କର୍ମଚାରୀ ଓ ଅଧିକାରୀ କାଜୁଆଲ ପୋଷାକ ପରିଧାନ କରି କାର୍ଯ୍ୟାଳୟ ଆସୁଛନ୍ତି । ଯାହା ଫଳରେ ଅଫିସ କଲଚର ପ୍ରଭାବିତ ହେଉଛି । ସେମାନଙ୍କୁ ନିଜ ପରିଧାନ ଉପରେ ବିଶେଷ ଦୃଷ୍ଟି ଦେବାର ଆବଶ୍ୟକତା ରହିଛି । ତେଣୁ ଏଣିକି ସେମାନଙ୍କୁ କେବଳ ଫର୍ମାଲ ପୋଷାକରେ ହିଁ ଅଫିସ ଆସିବାକୁ ପଡିବ । ବିଭାଗରେ କାର୍ଯ୍ୟରତ ସମସ୍ତ ଅଧିକାରୀ ଓ କର୍ମଚାରୀ ଏହି ପରିଧାନ ସମ୍ପର୍କିତ ନିୟମ ଅନୁପାଳନ କରିବେ ବୋଲି ଅର୍ଡରେ କୁହାଯାଇଛି । ଏହି ଅର୍ଡର କାର୍ଯ୍ୟକାରୀ କରିବା ପାଇଁ ବିଭାଗର ପ୍ରମୁଖ ଶାସନ ସଚିବଙ୍କ ସମେତ ସମସ୍ତ ଅଧିକାରୀଙ୍କ ନିକଟକୁ ପଠାଇ ଦିଆଯାଇଛି ।