ଚଣ୍ଡିଗଡ: ପାକିସ୍ତାନ (Pakistan) ପ୍ରେମ ପାଇଁ ଏକଧିକ ଥର ବିବାଦ ଘେରକୁ ଆସିସାରିଥିବା କଂଗ୍ରେସ ନେତା ନବଜୋତ ସିଂ ସିଦ୍ଧୁ (Navjot Singh Sidhu) ପୁଣି ଥରେ ନିଜ ବୟାନ ପାଇଁ ବିବାଦକୁ ଆସିଛନ୍ତି । ଗୁରୁ ନାନକ ଦେବ ଜୟନ୍ତୀ ଅବସରରେ ପାକିସ୍ତାନର କରତାରପୁର (kartarpur corridor) ଗସ୍ତ କରିଥିବା ସିଦ୍ଧୁ ଏଥର ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ (Imran Khan)ଙ୍କୁ ନିଜ ବଡ ଭାଇ ବୋଲି ସମ୍ବୋଧାନ କରି ପୁଣି ବିବାଦ ପରିସରକୁ ଆସିଥିବା ଦେଖିବାକୁ ମିଳିଛି ।
ତେବେ ସିଦ୍ଧୁଙ୍କ ଏପରି ମନ୍ତବ୍ୟ ପରେ ବିବାଦ ବଢିବା ସହ ତାଙ୍କୁ ସମାଲୋଚନା ମଧ୍ୟ ଆରମ୍ଭ ହୋଇଯାଇଛି । BJP IT CELL ମୁଖ୍ୟ ଅମିତ ମାଲବ୍ୟ ଘଟଣାରେ ପ୍ରତିକ୍ରିୟା ରଖି, ସିଧାସଳଖ କଂଗ୍ରେସ ଓ ରାହୁଲ ଗାନ୍ଧୀଙ୍କୁ ମଧ୍ୟ ଟାର୍ଗେଟ କରିଥିବା ଦେଖିବାକୁ ମିଳିଛି । ଅମିତ କହିଛନ୍ତି ରାହୁଲଙ୍କ ପ୍ରିୟ ହେଉଛନ୍ତି ସିଦ୍ଧୁ, କିନ୍ତୁ ସେ ଯାଇ ପାକିସ୍ତାନୀ ପ୍ରଧାନମନ୍ତ୍ରୀଙ୍କୁ ନିଜ ବଡ ଭାଇ ବୋଲି ସମ୍ବୋଧନ କରୁଛନ୍ତି ।
ଆହୁରି ମଧ୍ୟ ଅମିତ କହିଛନ୍ତି, ସିଦ୍ଧୁଙ୍କ ଏପରି ବ୍ୟବହାର କିଛି ନୂଆ କଥା ନୁହେଁ । ଗତଥର ସେ ପାକିସ୍ତାନ ଗସ୍ତ କରିଥିବା ସୟମୟରେ ପାକିସ୍ତାନ ସେନାମୁଖ୍ୟ ଜେନରାଲ ବାଜୱାଙ୍କୁ ଆଲିଙ୍ଗନ କରିବା ସହ ପ୍ରଶଂସା କରିଥିଲେ। ତେବେ କଂଗ୍ରେସ ହାଇକମାଣ୍ଡ ପଞ୍ଜାବ ପ୍ରଦେଶର ନେତୃତ୍ବ କ୍ୟାପଟେନ ଅମରିନ୍ଦର ସିଂଙ୍କ ହାତରୁ କାଢିନେଇ ଜଣେ ପାକିସ୍ତାନ ପ୍ରେମୀଙ୍କ ହାତରେ ଟେକି ଦେଇଥିବା କହି ତାତ୍ସଲ୍ୟ କରିଛନ୍ତି ଅମିତ ।