ହାଇଦ୍ରାବାଦ: ‘‘ମା ମୁଁ ଜରୁରୀ ଅପରେସନରେ ଯାଉଛି । କେତେ ଦିନ ଲାଗିବ ଜାଣିନାହିଁ । ହୋଇପାରେ 10 ଦିନ ମୋବାଇଲ ବନ୍ଦ ରହିପାରେ । ବ୍ୟସ୍ତ ହେବୁ ନାହିଁ । ଅପରେସନ ସଫଳ କରି ଫେରିବି। ଫେରିଲା ଫୋନ କରିବି । ଘରେ ସମସ୍ତେ ଖୁସିରେ ଥିବ । ବାପାଙ୍କ ଧ୍ୟାନ ରଖିବୁ ।’’ ଗୁରୁବାର ରାତି 11 ଟା ବେଳେ ସହିଦ ଯବାନ ପ୍ରମୋଦ ନେଗୀ ନିଜ ମାଙ୍କୁ ଫୋନ କରି ଏମିତି କହିଥିଲେ । ଆଉ ଏହାର ଠିକ 13 ଘଣ୍ଟା ପରେ ସେନା କାର୍ଯ୍ୟାଳଯରୁ ପରିବାରକୁ ଫୋନ ଆସିଲା ପ୍ରମୋଦ ନେଗୀ ସହିଦ ହୋଇଛନ୍ତି...
ଏହାବି ପଢନ୍ତୁ- 9 ରେ ନୀତୀଶ ଓ ନବୀନ ଭେଟଘାଟ, ଚର୍ଚ୍ଚା ଜୋରଦାର
ଶୁକ୍ରବାର ଜାମ୍ମୁ କାଶ୍ମୀରର ରଜୌରୀରେ ସ୍ପେଶାଲ ଫୋର୍ସର ୫ ଜଣ ଯବାନ ସହିଦ ହୋଇଛନ୍ତି ।। ଆଣ୍ଟି ଟେରୋରିଷ୍ଟ ଅପରେସନ ବେଳେ ଏହି ୫ ଯବାନ ସହିଦ ହୋଇଛନ୍ତି। ଘଟଣାସ୍ଥଳରେ ୨ ଯବାନ ପ୍ରାଣ ହରାଇଥିବା ବେଳେ ପରେ ଆଉ ୩ ଜଣ ଯବାନଙ୍କ ଚିକିତ୍ସାଧୀନ ଅବସ୍ଥାରେ ସହିଦ ହୋଇଛନ୍ତି । ରଜୌରୀର କାଣ୍ଡି ଜଙ୍ଗଲରେ ସେନା ଆତଙ୍କବାଦୀ ଏନକାଣ୍ଟର ବେଳେ ଘଟିଛି ଏହି ଘଟଣା ।
ସହିଦ ହୋଇଥିବା 5 ଜଣ ବୀର ଯବାନ ହେଲେ ହାବିଲଦାର ନିଲମ ସିଂ, ନାଏକ ସୁବେଦାର ଅରବିନ୍ଦ କୁମାର, ଲାନ୍ସ ନାଏକ ରୁଚିନ ସିଂ ରାୱତ, ପିଟିଆର ସିଦ୍ଧାନ୍ତ ଛେତ୍ରୀ ଓ ପିଟିଆର ପ୍ରମୋଦ ନେଗୀ । ଆଜି ସମସ୍ତ ସହିଦ ଯବାନଙ୍କ ଆର୍ଥିବ ଶରୀର ନିଜ ନିଜ ପରିବାରକୁ ସେନା ପଠାଇଛି । ତେବେ ସହିଦ ଯବାନ ପିଟିଆର ପ୍ରମୋଦ ନେଗୀଙ୍କୁ ନେଇ ଏକ ଘଟଣା ଏବେ ସାମନାକୁ ଆସିଛି । ଯାହା ହିମାଚଳ ପ୍ରଦେଶ ସମେତ ସାରା ଦେଶବାସୀଙ୍କୁ ସ୍ତବ୍ଧ କରିଦେଇଛି ।
ସହିଦ ଯବାନ ପାରା ଟ୍ରୁପର ପ୍ରମୋଦ ନେଗୀ ଗୁରୁବାର ରାତି 11 ଟାରେ ଘରକୁ ଫୋନ କରି ନିଜ ମାଙ୍କ ସହ କଥା ହୋଇଥିଲେ । ସ୍ବଳ୍ପ ସମୟର କଥାବାର୍ତ୍ତା ବେଳେ ସହିଦ ପ୍ରମୋଦ ନିଜ ମାଙ୍କୁ କହିଥିଲେ ‘‘ ମା ମୁଁ ଜରୁରୀ ଅପରେସନରେ ଯାଉଛି । କେତେ ଦିନ ଲାଗିବ ଜାଣିନାହିଁ । ହୋଇପାରେ 10 ଦିନ ମୋବାଇଲ ବନ୍ଦ ରହିପାରେ । ବ୍ୟସ୍ତ ହେବୁ ନାହିଁ । ଅପରେସନ ସଫଳ କରି ଫେରିବୁ। ଫେରିଲା ଫୋନ କରିବି । ଘରେ ସମସ୍ତେ ଖୁସିରେ ଥିବ ।’’ ଆଉ ଏହାର ଠିକ 13 ଘଣ୍ଟା ପରେ ଅର୍ଥାତ ଶୁକ୍ରବାର ମଧ୍ୟାହ୍ନ 12 ଟା ବେଳେକୁ ସେନା କାର୍ଯ୍ୟାଳଯରୁ ପରିବାରକୁ ଫୋନ ଆସିଲା ପ୍ରମୋଦ ନେଗୀ ସହିଦ ହୋଇଛନ୍ତି...ଯାହାକୁ ନେଇ ପରିବାର ପୁରା ଭାଙ୍ଗି ପଡିଥିବା ବେଳେ ପୁରା ଅଞ୍ଚଳରେ ଶୋକର ଛାୟା ଖେଳିଯାଇଛି । ମାଙ୍କ ସହ କଥା ହୋଇଥିବା ଶେଷ ସମୟରେ ଆଲୋଚନାକୁ ମନେ ପକାଇ ସମସ୍ତେ ସ୍ତବ୍ଧ । ପରିବାର କେବେ ଭାବିନଥିଲେ କେଇ ଘଣ୍ଟାରେ ଏମିତି ଘଟିଯିବ ବୋଲି ।