ଶ୍ରୀନଗର: ଲେହ ବିମାନ ବନ୍ଦରର ରନ-ଓ୍ବେରେ ଫସି ରହିଲା ବାୟୁସେନାର ବିଶାଳ ପରିବହନ ବିମାନ C-17 ଗ୍ଲୋବମାଷ୍ଟର । କୌଣସି ଯାନ୍ତ୍ରିକ ତ୍ରୁଟି କାରଣରୁ ଏବି ବିଶାଳ ସାମରିକ ପରବହନ ବିମାନଟି ରନ-ଓ୍ବେରେ ଅଟକି ରହିଛି । ଫଳରେ ବିମାନ ବନ୍ଦରରେ ଫ୍ଲାଇଟ ଅପରେସନ ସମ୍ପୂର୍ଣ୍ଣ ଅଚଳ ହୋଇପଡିଛି । ଅବତରଣ କରିବାକୁ ଓ ଉଡାଣ ଭରିବାକୁ ଥିବା ସମସ୍ତ ବିମାନକୁ ବାତିଲ କରିବାକୁ ପଡିଛି । ବର୍ତ୍ତମାନ ସୁଦ୍ଧା ରନ କ୍ଲିୟର ନହେବା କାରଣରୁ ଆସନ୍ତାକାଲି ପର୍ଯ୍ୟନ୍ତ ଫ୍ଲାଇଟ ଅପରେସନ ବନ୍ଦ ରଖିବାକୁ ଘୋଷଣା କରିଛି ବିମାନ ବନ୍ଦର କର୍ତ୍ତୃପକ୍ଷ ।
ବିମାନ ବନ୍ଦର କର୍ତ୍ତୃପକ୍ଷଙ୍କ ସୂଚନା ଅନୁସାରେ, ଏହି ସାମରିକ ବିମାନରେ କିଛି ଯାନ୍ତ୍ରିକ ତ୍ରୁଟି ଦେଖାଯାଇଥିଲା । ଫଳରେ ରନ-ଓ୍ବେରେ ହିଁ ବିମାନଟି ଫସି ରହିଛି । ବିମାନର ଯାନ୍ତ୍ରିକ ତ୍ରୁଟି ନିରୂପଣ ଓ ଏହାର ସମାଧାନ କରିବାକୁ ବାୟୁସେନାର ବୈଷୟିକ ଟିମ ପ୍ରୟାସ ଜାରି ରଖିଛି । ହେଲେ ଆଜି ଓ ଆସନ୍ତାକାଲି ପର୍ଯ୍ୟନ୍ତ ମଧ୍ୟ ଫ୍ଲାଇଟ ଅପରେସନ ବନ୍ଦ ରଖିବାକୁ ଘୋଷଣା କରାଯାଇଛି । ଆସନ୍ତାକାଲି ସୁଦ୍ଧା ବିମାନର ଯାନ୍ତ୍ରିକ ତ୍ରୁଟି ସଜଡାଯିବା ପରେ ରନ-ଓ୍ବେ କ୍ଲିୟର ହେବ । ପରେ ବିମାନ ସେବା ସ୍ବାଭାବିକ ହେବା ନେଇ ଆଶା କରାଯାଉଥିବା ବିମାନ ବନ୍ଦର କର୍ତ୍ତୃପକ୍ଷଙ୍କ ପକ୍ଷରୁ ସୂଚନା ମିଳିଛି ।