ନୂଆଦିଲ୍ଲୀ/ଗାଜିଆବାଦ: ଗାଜିଆବାଦର ଏକ ପ୍ରାଥମିକ ସ୍କୁଲରେ ମଧ୍ୟାହ୍ନ ଭୋଜନରେ କ୍ଷୀର ପିଇବା ପରେ ପିଲାମାନଙ୍କର ସ୍ୱାସ୍ଥ୍ୟ ସମସ୍ୟା ଦେଖାଯାଇଥିବା ଅଭିଯୋଗ ହୋଇଛି । ପ୍ରାୟ 25ଜଣ ପ୍ରାଥମିକ ଛାତ୍ରଛାତ୍ରୀଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ଅଭିଯୋଗ ଅନୁସାରେ, ଆଜି (ବୁଧବାର) ପ୍ରେମ ନଗରରେ ଥିବା ପ୍ରାଥମିକ ବିଦ୍ୟାଳୟରେ ମଧ୍ୟାହ୍ନ ଭୋଜନରେ କ୍ଷୀର ପିଇଥିଲେ । ଏହା ପରେ ଏକାକାଳୀନ ଏକାଧିକ ଛାତ୍ରଛାତ୍ରୀଙ୍କର ପେଟରେ ଯନ୍ତ୍ରଣା ହେବା ସହ ମୁଣ୍ଡବିନ୍ଧା ଏବଂ ବାନ୍ତି ହୋଇଥିଲା । ଏ ସମ୍ପର୍କରେ ତୁରନ୍ତ ସ୍ୱାସ୍ଥ୍ୟ ବିଭାଗକୁ ସୂଚନା ଦିଆଯାଇଥିଲା । ସ୍ୱାସ୍ଥ୍ୟ ବିଭାଗର ଏକ ଟିମ୍ ଘଟଣାସ୍ଥଳରେ ପହଞ୍ଚି ତୁରନ୍ତ ଆମ୍ବୁଲାନ୍ସ ମାଧ୍ୟମରେ ପିଲାମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଥିଲେ । ସେମାନଙ୍କର ଚିକିତ୍ସା ଜାରି ରହିଛି ।
ସୂଚନା ପାଇବା ମାତ୍ରେ ଗାଜିଆବାଦର ମୁଖ୍ୟ ଚିକିତ୍ସାଧିକାରୀ (ସିଏମଓ) ତୁରନ୍ତ ଘଟଣାସ୍ଥଳରେ ପହଞ୍ଚି ପିଲାମାନଙ୍କର ଅବସ୍ଥା ଅନୁଧ୍ୟାନ କରିଥିଲେ । ପିଲାମାନଙ୍କୁ ପ୍ରାଥମିକ ଚିକିତ୍ସା ଦିଆଯାଇଛି ଓ ବର୍ତ୍ତମାନ ସମସ୍ତଙ୍କର ଅବସ୍ଥା ସ୍ୱାଭାବିକ ରହିଛି । ମଧ୍ୟାହ୍ନ ଭୋଜନ ଖାଦ୍ୟରେ ତ୍ରୁଟି କାରଣରୁ ଏପରି ହୋଇଛି କି ନାହିଁ ତାହା ଏ ପର୍ଯ୍ୟନ୍ତ ପ୍ରଶାସନ କିମ୍ବା ହସ୍ପିଟାଲ କର୍ତ୍ତୃପକ୍ଷ ନିଶ୍ଚିତ କରିନାହାନ୍ତି । ଛାତ୍ରମାନଙ୍କ ଅଭିଯୋଗ ଅନୁସାରେ, ସେମାନଙ୍କୁ ଆଜି ଦିଆଯାଇଥିବା କ୍ଷୀରର ସ୍ବାଦ ଖଟା ଥିଲା । ଏହାକୁ ପିଇବା ପରେ ହଠାତ୍ ସେମାନଙ୍କ ସ୍ୱାସ୍ଥ୍ୟ ଖରାପ ହେବାକୁ ଲାଗିଲା । ପିଲାମାନଙ୍କ ସୂଚନା ଅନୁସାରେ ଅଭିଭାବକମାନେ ସ୍କୁଲରେ ନିମ୍ନମାନର ଖାଦ୍ୟ ମିଳୁଥିବା ଅଭିଯୋଗ କରିଛନ୍ତି ।