ମୁମ୍ବାଇ: ବିଜ୍ଞାପନରେ ଦେବାଦେବୀଙ୍କ ନାଁ ବ୍ୟବହାର କରିବା ଉପରେ କଟକଣା ଲଗାଇଛନ୍ତି ବମ୍ବେ ହାଇକୋର୍ଟ । ବିଭିନ୍ନ ଗଣ ମାଧ୍ୟମରେ ଦେବାଦେବୀଙ୍କୁ ନେଇ ବିଜ୍ଞାପନ ପ୍ରସ୍ତୁତ କିମ୍ବା ଦ୍ରବ୍ୟର କଭର ଉପରେ ଦେବାଦେବୀଙ୍କ ଫଟୋ ବ୍ୟବହାର କରିବା ଉପରେ କଟକଣାକୁ ଜାରି କରାଯାଇଛି । ବମ୍ବେ ଉଚ୍ଚ ନ୍ୟାୟାଳୟର ଜଷ୍ଟିସ ଟିଭି ନାଲାଓ୍ବାଡେ ଓ ଜଷ୍ଟିସ ଏମଜି ସିଭାଲିକରଙ୍କୁ ନେଇ ଗଠିତ ଦୁଇ ଜଣିଆ ଖଣ୍ଡପୀଠ ଏହି ରାୟ ଶୁଣାଇଛନ୍ତି ।
ଏପରି ଧର୍ମୀୟ ଭାବନା ସହ ଜଡିତ ବିଜ୍ଞାପନକୁ ପ୍ରସ୍ତୁତ କରିବା ଉପରେ କଟକଣା ଜାରି କରାଯାଇଛି । ଏପରି କିଛି ଦ୍ରବ୍ୟ ବ୍ୟବହାର କରି ସାରିବା ପରେ ଫିଙ୍ଗି ଦିଆଯାଉଥିବାରୁ ତାହା ସାଧାରଣରେ ଧର୍ମୀୟ ଆସ୍ଥାକୁ କ୍ଷତି ପହଞ୍ଚାଉଥିବା ଉକ୍ତ ପିଟିଶନରେ ଦର୍ଶାଯାଇଥିଲା । ତେଣୁ ଏହି ସବୁ କାର୍ଯ୍ୟକଳାପରେ ସମ୍ପୃକ୍ତ ବ୍ୟକ୍ତି ବା ସଂସ୍ଥା ବିରୋଧରେ ରାଜ୍ୟ ସରକାରଙ୍କ ଦ୍ବାରା ପ୍ରଣିତ ଅଘୋରି ଆକ୍ଟ ଓ ବ୍ଲାକ ମ୍ୟାଜିକ ଆକ୍ଟ 2013 ଅନୁସାରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବା ନେଇ ପ୍ରାବଧାନ କରିବା ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି ।