ହାଇଦ୍ରାବାଦ: ଦୁଷ୍କର୍ମ, ବର୍ତ୍ତମାନ ଏହି ଶବ୍ଦ ସମସ୍ତଙ୍କ ପାଇଁ ଏକ ନିତିଦିନିଆ ଘଟଣା ହୋଇଗଲାଣି। ଖବରକାଗଜ ଠାରୁ ଆରମ୍ଭ କରି ବୈଦ୍ୟୁତିକ ଗଣମାଧ୍ୟମ ସବୁଠି କେବଳ ଦୁଷ୍କର୍ମ ଚର୍ଚ୍ଚା । ଭାରତରେ ଏତେ ମାତ୍ରାରେ ଦୁଷ୍କର୍ମର ସଂଖ୍ୟା ବଢିବାର କାରଣ କଣ ? ଆମ ଦେଶ କଣ ନାରୀଙ୍କୁ ସୁରକ୍ଷା ଦେବାରେ ବିଫଳ ? ନା ଆମ ଦେଶରେ ସେଭଳି କଡା ନିୟମ କିଛି ନାହିଁ ? ଏ ପ୍ରଶ୍ନ କେବଳ ଆମର ନୁହେଁ ବରଂ ସମଗ୍ର ଦେଶର ଜନତାଙ୍କ। ନିକଟରେ ହାଇଦ୍ରାବାଦରେ ହୋଇଥିବା ଗଣଦୁଷ୍କର୍ମ ଓ ହତ୍ୟା ମାମଲା ସମଗ୍ର ଦେଶକୁ ପୁଣି 2012ର ସେହି ଛାତିଥରା ଘଟଣାକୁ ମନେ ପକାଇ ଦେଇଛି।
ଦିଲ୍ଲୀ ଗଣଦୁଷ୍କର୍ମ କୌଣସି ଛୋଟ ବିଷୟ ନଥିଲା ତଥାପି ଦୁଷ୍କର୍ମକାରୀଙ୍କୁ ଏଯାଏଁ ଦଣ୍ଡିତ କରାଯାଇ ପାରିନାହିଁ। ଏ ମାମଲାରେ ମାନ୍ୟବର ସୁପ୍ରିମକୋର୍ଟ ଫାଶୀ ଦଣ୍ଡାଦେଶ ଦେଇଛନ୍ତି ମାତ୍ର ତାହା ଏଯାଏଁ କାର୍ଯ୍ୟକାରୀ ହୋଇପାରିନାହିଁ । ଏହାର 8ବର୍ଷ ପରେ ହାଇଦ୍ରାବାଦରେ ପୁଣି ସେହି ସମାନ ଘଟଣାର ପୁନରାବୃତ୍ତି ଦେଖିବାକୁ ମିଳିଛି। କ’ଣ ସମ୍ବିଧାନରେ ଦୁଷ୍କର୍ମକାରୀଙ୍କ ପାଇଁ ସ୍ବତନ୍ତ୍ର ସମୟସୀମା ରହିଛି କି? ଏହି ସମୟସୀମା ପାରି ନହେବା ଯାଏଁ ଦୋଷୀଙ୍କୁ ଦଣ୍ଡ ଦିଆଯାଇପାରିବ ନାହିଁ!
ବିଭିନ୍ନ ଦେଶରେ ଦୁଷ୍କର୍ମ ପାଇଁ ଅଲଗା ଅଲଗା ଦଣ୍ଡବିଧାନ ରହିଛି । ଶୁଣିଲେ ବିଶ୍ବାସ ହେବନି, ଯେଉଁ ଦେଶ ନାରୀଙ୍କୁ ପୁରୁଷଙ୍କ ସହ ସମାନ ମାନନ୍ତିନି, ଏପରିକି ନାରୀଙ୍କୁ ନେଇ ସେମାନଙ୍କର ଚିନ୍ତାଧାରା ଅତି ନିମ୍ନ, ସେଭଳି ଦେଶରେ ଦୁଷ୍କର୍ମକାରୀଙ୍କ ପାଇଁ କଡା ଦଣ୍ଡବିଧାନର ବ୍ୟବସ୍ଥା ରହିଛି । ହେଲେ ଯେଉଁ ଦେଶରେ ନାରୀକୁ ଦେବୀ ରୂପରେ ପୂଜା କରାଯାଏ, ସେହି ଦେଶରେ ଦୁଷ୍କର୍ମକାରୀଙ୍କୁ ପୋଲିସ ହେପାଜତରେ ନେଇ ଖୁଆଇପିଆଇ ରଖେ।
ନିକଟରେ ଅଭିନେତ୍ରୀ ତଥା ସାଂସଦ ହେମା ମାଳିନୀ ହାଇଦ୍ରାବାଦର ଗଣଦୁଷ୍କର୍ମ ଉପରେ ଏକ ତାଚ୍ଛଲ୍ୟ ଭରା ବୟାନ ଦେଇଥିଲେ । ସେ କହିଥିଲେ କି, ଏଠି ଲୋକେ ମନ୍ଦିର ଯାଉଛନ୍ତି, ଆଧ୍ୟାତ୍ମିକ ଆଡକୁ ଅଗ୍ରସର ହେଉଛନ୍ତି ତଥାପି ନାରୀଙ୍କୁ ଦୁଷ୍କର୍ମ କରୁଛନ୍ତି । ରାଜ୍ୟସଭା ସାଂସଦ ଜୟା ବଚ୍ଚନ, ଯିଏ ସର୍ବଦା ନାରୀଙ୍କ ପାଇଁ ସ୍ବର ଉତ୍ତୋଳନ କରିଥାନ୍ତି , ସିଏ ପ୍ରଥମ ଥିଲେ ଯିଏ ନିର୍ଭୟାଙ୍କ ପୀଡାକୁ ସଂସଦରେ ଉପସ୍ଥାପନା କରିଥିଲେ । ସେ ମଧ୍ୟ ହାଇଦ୍ରାବାଦର ଏଭଳି ଲଜ୍ଜାଦାୟକ ଘଟଣା ପରେ ଅପରାଧୀକୁ ‘ମବ୍ ଲିଚିଂ’ ଭଳି ଦଣ୍ଡ ଦେବାକୁ ସଂସଦରେ ଗୁହାରି କରିଥିଲେ। ବର୍ତ୍ତମାନ ଆସନ୍ତୁ ଜାଣିବା ଦୁଷ୍କର୍ମକୁ ନେଇ କେଉଁ ଦେଶରେ କଣ ଦଣ୍ଡବିଧାନ ରହିଛି...
ଉତ୍ତର କୋରିଆ: ବିନା କୌଣସି ଦୟା ଯାଚିକାରେ ଦୁଷ୍କର୍ମକାରୀକୁ ମୃତ୍ୟୁ ଦଣ୍ଡ ଦିଆଯାଇଥାଏ। ଫାଶୀ ନୁହେଁ ବରଂ ବନ୍ଧୁକଧାରୀ ସ୍କ୍ବାଡ୍ ଅପରାଧୀର ମୁଣ୍ଡ ତଥା ଶରୀରର ବିଭିନ୍ନ ଭାଗକୁ ଗୁଳି କରିଥାନ୍ତି । ଯେପରି ଅପରାଧୀର ବଞ୍ଚିବାର କୌଣସି ବି ସୁଯୋଗ ନ ରୁହେ।
ଚାଇନା: ଏଠାରେ ଶାରୀରିକ ନିର୍ଯ୍ୟାତନା ଏକ ବଡ ଅପରାଧ । ସମ୍ପୁର୍ଣ୍ଣ ଯାଞ୍ଚ ପରେ, ଅପରାଧୀ ପ୍ରମାଣିତ ହେବା ପରେ ଦୋଷୀକୁ ପଛପଟୁ ଗୁଳି ମରାଯାଏ । ଏପରିକି କେତେକ ମାମଲାରେ ଅପରାଧୀର ଗୁପ୍ତାଙ୍ଗକୁ କାଟି ଦିଆଯାଏ।
ସାଉଦି ଆରବ: ଦୁଷ୍କର୍ମ କରିଥିବା ଅପରାଧୀଙ୍କୁ ଧରିବା ପରେ, ଏଠାରେ ପ୍ରଥମ ସମ୍ପୂର୍ଣ୍ଣ ଯାଞ୍ଚ ହୁଏ ଓ ଅପରାଧୀକୁ ଲୋକଙ୍କ ମଧ୍ୟରେ ଛାଡି ଦିଆଯାଏ। ଏହାପରେ ଅପରାଧୀ ଲୋକଙ୍କ ଆକ୍ରୋଶର ଶିକାର ହୋଇଥାଏ ଓ ପଥର ମାଡରେ ତା'ର ଜୀବନ ଯାଇଥାଏ।
ଇରାନ: ଅପରାଧୀଙ୍କୁ ଏଠାରେ ଗୁଳି କିମ୍ବ ଫାଶୀ ଦିଆଯାଏ। 100ଦିନ ମଧ୍ୟରେ ଏହା କାର୍ଯ୍ୟକାରୀ ହୁଏ । କିଛି କିଛି କ୍ଷେତ୍ରରେ ଅପରାଧୀଙ୍କୁ ଆଜୀବନ କାରାଦଣ୍ଡ ଦିଆଯାଇଥାଏ।
ଆଫଗାନିସ୍ତାନ:ଏଠାରେ 4ଦିନ ମଧ୍ୟରେ ଅପରାଧୀକୁ ଦଣ୍ଡ ଦିଆଯାଏ । ଫାଶୀ କିମ୍ବା ଗୁଳି କରି ହତ୍ୟା କରାଯାଏ । ଅନେକ ମାମଲାରେ ଅପରାଧୀ ନିଜେ ଫାଶୀ କିମ୍ବା ଗୁଳି ମଧ୍ୟରୁ ଚୟନ କରିଥାଏ।
ପାକିସ୍ତାନ: ଗଣଦୁଷ୍କର୍ମ, ଶିଶୁ ନିର୍ଯ୍ୟାତନା ଆଦିରେ ଅପରାଧୀକୁ ମୃତ୍ୟୁଦଣ୍ଡ ଦିଆଯାଇଥାଏ । ଏପରିକି ନାରୀ ସହ ଦୁଃର୍ବ୍ୟବହାର ପ୍ରଦର୍ଶନ କଲେ ମଧ୍ୟ ଫାଶୀ ଦଣ୍ଡ ଦିଆଯିବାର ପ୍ରାବଧାନ ରହିଛି।